警察配合 689展開大搜捕,將減廢回收倉當「危險武器庫」,環保人士事後喺警署外要求警方放人。

眾人諸事

一月簽《惜食約章》 警察做麥記大嘥鬼

Ads by Google

旺角爆發警民衝突後,警方兩日後(初四)高調公布破獲一個「武器庫」,更安排「大龍鳳」,大晒檢獲嘅刀、辣椒油、化學品等,但有環保人士事後嘲笑警方擺烏龍,將環保倉當做武器庫。

 


警察上門查案,懷疑遺下麥記套餐外賣,部分更只係「咬咗一啖」。諷刺嘅係警務處簽咗《惜食約章》,但前線警察照做「大嘥鬼」。

警方喺環保倉調查時,有警員懷疑喺現場遺下多份麥記套餐外賣,有部分只係「咬咗一啖」,就隨意被人棄置,警察被指毫無公德心同浪費,喺環保人士地頭浪費食物,簡直係喺人家頭上釘蝨乸。
689叫人減少廚餘,環境局就搞咗個惜食行動,仲整咗份《惜食約章》,但約章成效不彰,上年十一月審計報告揭發環境局邀請十二個政府部門簽《約章》,但到上年中,仲有八個部門冇響應唔簽,其中警務處解釋,約章相關承諾「對警務處而言屬嶄新而專門的課題」喎,所以就唔簽喇!
睇番《約章》截至今年一月中嘅參與機構名單,原來警務處榜上有名,嶄新而專門嘅課題係咪忽然變得唔新兼易入手,所以好快簽名加入?之不過,簽咗約章即係承諾減少廚餘,尊重珍貴嘅食物同自然資源,但轉個頭就有前線警員肆無忌憚做「大嘥鬼」,黃錦星係咪要開聲譴責吓呢?
屢破「武器庫」警方愛虎頭蛇尾

政改表決前夕,警察又高調聲稱阻止本土派激進分子喺亞視舊廠房製造炸彈,事後三名被告被拒保釋,未受審已坐咗半年監。(郭永強攝)

究竟環保倉係咪同時又係武器庫,要待下回分解,但香港人隨時有排等,因為睇番警方記錄,過去唔少關鍵時刻破獲嘅武器庫大案,好多都仲未埋尾收科,好似二○一四年佔領運動後期,雙學呼籲將行動升級再包圍政總,結果唔少人浴血龍和道,翌日四點鐘許 Sir公布喺大角咀搗破一個武器庫,拘捕咗四男一女,包括城邦派陳雲嘅弟子「中出羊子」,警方當時話各人涉嫌「非法管有槍械及管有工具可作非法用途」,但事發至今超過十四個月,案件未有下文,隨時不了了之。

佔領運動期間,警方都曾破獲「武器庫」,仲拘捕陳雲弟子「中出羊子」,但事發至今超過十四個月,案件無晒聲氣。《蘋果日報》圖片

另外一單,就係舊年政改表決前夕,警方高調宣稱阻止咗本土派激進分子喺亞視舊廠房製造炸彈,五名被告事後被控「串謀製造炸藥」同其他五項控罪,案件多次押後,上月廿日最終將案件轉介高等法院審理,但三名被告被拒絕保釋,還柙監房看管,換言之,未受審已經坐咗半年監。
檢控雙重標準 差人恐嚇唔使拉

陳巧文當年瞓身參加社運,一度被奉為女神,但有前高級督察喺網上公開恐嚇,暗示要性侵對方,警方跟進之後不了了之。

警方過去一星期有殺錯冇放過,連騷亂當晚唔喺現場只係網上留言嘅網民,都控以不誠實或犯罪意圖取用電腦罪,至今最少兩人已成為被告。警方一直強調,網上留言跟現實有同樣後果,但從來冇講清楚同言論自由之間嘅界線,諷刺嘅係有警務人員背景嘅網民發表恐嚇言論,就一直逍遙法外。
二○一○年社運人士陳巧文一度成為話題,網上警察討論區有前高級督察公開留言恐嚇,話「要是老夫出手招呼他,他便大件事了,分分鐘有 BB……」,明顯暗示要性侵對方,警方曾話跟進調查,但到依家已經冇咗下文。

黃姓警長曾喺學民思潮《破折號》專頁留言,話要將 TVB記者「女姦男殺」,但未見警方執法。

另一例子,法官包致金個姪女 Amina涉掌摑交通警察,兩個警察事後喺社交網站吹水,有人講咗一句:「吓!佢咁寸,開槍打死佢。」警方之後邀請兩人錄口供,之後指初步調查後,認為事件不涉刑事成分,純粹係兩人情緒發洩喎!
仲有一例,佔領期間無綫七警打人報導出街後,有高層強行撤下報導,換來新聞部多名編採人員聯署,之後一名黃姓警長喺學民思潮《破折號》專頁留言,話要將 TVB記者「女姦男殺」,唔知依法辦事嘅警方又拉咗人未呢?
陸偉雄公子忽然唔幫本土派

陸以量到過警署了解旺角示威者狀況後,了解完就冇再跟進個案。唔知佢支持本土派之餘,又支唔支持武力抗爭呢?

旺角騷亂後,本土派話有本身嘅律師幫手,但唔係雨傘革命嗰時搵開嘅義務律師。有消息話當日其中一個去過差館探示威者嘅律師,係大狀陸偉雄個仔陸以量( Brandon),○九年佢喺倫敦大學學院取得法律碩士學位,主攻商業法律,但亦有處理刑事訴訟嘅經驗,包括牽涉警方同廉政公署嘅案件。
不過消息話 Brandon到警署了解示威者情況後,就聲稱好忙,唔得閒跟進 case。本刊嘗試搵佢了解原因,但未有回覆。
查實 Brandon幾支持本土派,追得貼《熱血時報》嘅 post,《熱血》話入境處縱火案主犯施君龍、八歲偷渡來港後入讀港大醫學院嘅 Betty都係罪犯,現成為「新香港人」, Brandon留言話「相信港豬們應該覺得呢個故事好勵志」。本土民主前線召集人黃台仰寫嘅選舉世代之爭,講明「賣港政團必須滅亡香港才能得救,本土派就是手刃這些賣港賊的戰士」,叫群眾投本土派入議會, Brandon都有 like㗎。
撰文:巫不言
news@nextdigital.com.hk

    tvb4life 發表在 痞客邦 留言(0) 人氣()