陳龍斌小時候,是是但但改了一個英文名 Common(似龍斌發音),結果被人取笑。他長大後就發現,生來就要與普通人並肩作戰。

坦白講

我撐你

Ads by Google

陳龍斌,四十二歲,中文大學崇基學院神學院助理教授、上週被控暴亂罪的學民思潮成員林淳軒的老師。
他從影片看到林在旺角事發當晚分隔警察與示威者,憑客觀證據相信學生不涉暴力行為。
他眼中的林淳軒,是一個對社會有透徹理解的成熟少年。

我日日見肥仔淳軒戴住副圓框眼鏡,好似見到《玩轉腦朋友》入面嘅阿愁。我同淳軒一樣有卡通臉:四眼、圓臉,但我瘦過佢,所以我好鬼鍾意佢。
淳軒其實係阿樂,見到佢自自然然就好想笑,間中佢又會爆幾句爛 gag,成個開心果咁。淳軒同黃之鋒、黎汶洛好唔同,佢同人相處時,唔會一輪嘴講好多嘢,去邊度食飯又無乜所謂,但討論時佢會表達自己嘅睇法,聽得出有思想。
今個學期我教佢聖經,佢一堂都無走過。新年前,淳軒問我,可唔可以下次去探露宿者和難民時,帶埋佢去。原來呢個學民思潮成員,政治視野比其他人闊,更洞悉了更深的內涵:政治,是為弱勢。
大半年前,淳軒喺樹仁讀緊傳理系,申請轉來讀神學,面試嗰陣我第一次見佢就認得:呢個咪雨傘運動黃之鋒絕食時,推住佢坐輪椅個肥仔。當時我仲挑機問:「你究竟想讀中大,定真係想讀神學呀?」
我記得淳軒話我知,點解決定唔做記者改為做傳道人,因為來到廿二歲嘅人生,佢發現做媒體唔能夠帶出一股正面嘅改變力量,反而自己嘅信仰,可以令佢更深層探索:在這個紛亂社會,如何有一顆堅定嘅心,迎難而上。或者,呢個係佢經歷雨傘運動之後嘅沉澱?
價值革命

林淳軒是黃之鋒的中學死黨,近年之鋒在鏡頭前鋒芒畢露,淳軒在背後默默支持。

淳軒聽我講過:《聖經》中耶穌本具有足夠魅力和本錢,發動群眾來一場流血革命,但結果,他來了一場價值革命。
你可能會話:「我哋好憎梁振英,要抗爭先得,唔似你班耶穌佬齋噏。」或者一時三刻我哋改變唔到現實環境,但宗教讓人心裡總有一片屬於自己嘅天地,知道點樣為自己堅信嘅價值走下去。
淳軒細細個就跟媽媽返教會,佢點會未聽過價值革命?
當日我決定收佢讀神學之前,特登走去搵佢教會牧師和朋友,我要確保佢唔係一時衝動。結果好多人話我知,淳軒係一個好知道自己做緊乜嘅人、成熟沉穩。所以,唔好被佢個卡通樣呃到你,佢成個腦,都係哲學。
我都好知自己做緊乜,五四運動時,蔡元培全力聲援被捕學生,今天,我都一樣。
撰文:盧曼思
攝影:葉漢華
攝錄:關永浩

    文章標籤

    坦白講 我撐你

    全站熱搜

    tvb4life 發表在 痞客邦 留言(0) 人氣()