有指王君馨一度向兩女破冰,但闊太林夏薇依舊唔俾埋身。

娛樂偵訊

遭聯手排斥 王君馨求和 胡定欣心軟 林夏薇企硬

Ads by Google

賀歲劇《公公出宮》柴娃娃,劇情氣氛輕鬆觀眾 like爆!不過現實中,兩女主角胡定欣與林夏薇,卻不時聯手排斥進取型的王君馨,絕非一團和氣!
有指王君馨一度試圖跟二人破冰,但只拆掂胡定欣,闊太林夏薇,依舊睬你都傻!

 


心病積落七年
因為合作《公公出宮》,令胡定欣與闊太林夏薇成為死黨,兩人開工經常孖公仔,更聯手杯葛王君馨。
據了解,王君馨為解結,在拍攝後期曾主動向積怨多年的胡定欣求和。其實早在○八年,兩人一起參加湖南衞視節目《舞動奇跡》時,有 34D及港姐銜頭,加上跳舞底厚的王君馨好快成為風頭躉,大大威脅同是大熱的胡定欣。有指胡定欣睇王君馨唔順眼,彩排時經常單打玩針對。
心病早種,去年在《公公出宮》碰頭,事業已拋離對方的胡定欣,實行當王君馨透明,好姊妹林夏薇亦同聲同氣,聯成一線,藐爆表現進取的王君馨。
「其實 Grace(王君馨)冇做錯乜嘢,只係份人比較 aggressive(進取),又比較熱情,好易令人覺得佢搶韁同扮嘢。 Nancy(胡定欣)同 Rosina(林夏薇)就係睇佢呢啲唔順眼,加上 Nancy一早已經唔 like佢,所以開工都唔會睬 Grace。
「有段時間返內地拍外景,一放飯兩個女主角就約埋其他女仔一齊食,永遠唔叫 Grace,做到出晒面,大家都知佢俾人排斥, Grace亦好難受,但都係忍住冇出過聲。」一名劇組工作人員說。

遭聯手排斥
胡定欣同林夏薇係好姊妹,兩人拍《公》劇時聯成一線藐王君馨。

早前《公》劇宣傳,有指王跟已破冰的胡定欣有兩句,林夏薇則繼續唔騷佢。

要一班男主角吹雞約埋食飯,王君馨先有機會同排斥她的胡定欣、林夏薇坐埋一枱。
忍夠求破冰
直至尾段,王君馨決定主動踏出一步。「 Grace知 Nancy唔妥自己好多年,合作拍《公公出宮》前都試過喺化妝間撞到, Grace主動同對方打招呼, Nancy都冇反應;後來劇集拍到尾聲,有日 Grace主動問 Nancy之前係咪做咗啲嘢令佢唔舒服,若果有,佢願意道歉。
「 Grace低聲下氣到咁嘅地步, Nancy好難唔接受,同 Grace有番兩句,冇以前咁僵!但 Rosina(林夏薇)就繼續落閘,唔俾 Grace埋身。如果 Rosina在場, Nancy都會繼續扮唔騷 Grace。」
本刊曾致電王君馨,向她求證被《公公出宮》兩女主角排斥一事,但她堅持不就此事回應。

撩合照破冰
拍《公》期間,一直想破冰的王君馨常揀一班演員玩自拍,希望跟兩女主角破冰,但合照後胡定欣與林夏薇繼續唔騷佢。

08年王君馨跟胡定欣參加內地與大台合作的節目《舞動奇跡》而結怨,當日王君馨勝出當舞后。

性格進取又熱情的王君馨,去年有份拍住發哥、張家輝等演出賀歲片《賭城風雲 3》。
總有是非
有人就有是非,娛圈女星明爭暗鬥,磨擦當閒事,甚至擺明車馬,唔妥到出面,都冇有怕。


李麗珍 李若彤
13年曾志偉成功游說一班影圈中女助大台埋位拍劇集《 M Club》,點知李麗珍與李若彤為戲份多少問題有意見,二人在片場面左左,珍妹更試過在圍讀劇本時遲大到同 no show,用行動以示不滿。


陳敏之 徐子珊
08年拍《美麗高解像》時,有傳陳敏之聯同有份埋位的 friend底伍詠薇及苑瓊丹,對徐子珊玩針對。在一場掌摑戲中,陳敏之更堅打,搞到徐子珊要敷冰消腫。


佘詩曼 楊思琦
03年拍重頭劇《無名天使 3D》,阿佘不滿楊思琦資歷淺卻搶到好角色,於是搵埋曾傳不和的郭羨妮,忽然扮 friend聯手杯葛,食飯永不預楊思琦。
撰文、攝影、攝錄:娛樂組

    tvb4life 發表在 痞客邦 留言(0) 人氣()