next1.jpg

烈日當空下,二人肉緊狂啜,火辣辣!

娛頭

獨家 泰國舌戰 剝晒揼骨  Mandy洗米華帶女返港入學

Ads by Google

農曆年假,洗米華(周焯華)同 Mandy Lieu一家三口遊泰國,享受溫馨家庭樂之餘,二人手牽手行沙灘睇日落,浪漫氣氛下,升溫洗米華肉緊攬實 Mandy,連環激嘴,火辣辣!
據知,一直希望接 Mandy母女返港同住的洗米華,已鐵定 5月實行一家團聚大計。八個月大的周願,亦會留在香港讀書。

 


夠秤返 playgroup
一幕世紀拖手,洗米華公開認愛,三角戀告一段落; Mandy更加得到洗米爸點頭,確認「新阿嫂」地位。而一直傳跟母姓的 Mandy B女,已確認是跟父姓周,名願。
據知,始終唔情願讓 Mandy兩母女長時間隱居英國,想有更多時間睇住 B女成長,盡父親責任的洗米華,在周願出世後,已開始鋪路,四出在港島南區搵獨立屋,準備今年五月接 Mandy母女返港定居。
「搵屋嘅事華哥已經有心水,預計五月 Mandy就可以搬返香港,囡囡將來都會留喺香港讀書;五月返到嚟, B女就滿一歲要返 playgroup,所以 Mandy會先安排個女去學校面試。」知情者透露。
再無顧慮,大時大節,洗米華攞正牌陪 Mandy母女周遊列國。農曆年前,一家三口去了一轉布吉,旅程中段,顧家的洗米華並冇忽略家人,暫時抽身幾日,陪洗米爸同大仔周柏豪去東京旅行,之後再折返泰國,陪 Mandy繼續遊曼谷、芭堤雅過情人節。
之前本刊曾報導過洗米華專程飛倫敦,接埋 Mandy母女同飛布吉,這次更是 B女出世後,第一趟一家三口外遊,老豆洗米華全程抱實周願又呵又氹,個樣甜到漏,不過好戲在後頭。

囡囡交低俾親戚照顧, Mandy同洗米華去 Surin沙灘拍拖。

二人攬埋一嚿,望住大海睇浪,浪漫到爆。

一家三口在水中影全家福,幸福滿瀉。《蘋果日報》圖片
消費平民化
身家億億聲的洗米華,對 Mandy一向疏爽冇手軟,反而 Mandy成日錫住男友荷包。
為安置 Mandy母女返港定居,洗米華鎖定在港島南區買獨立屋, Mandy二話不說,月前將手上市值過億元的珒然單位放盤,套現幫男友慳一筆。今次泰國之旅,消費亦好平民,沿途經過高級食肆、名店,全部過門不入;二人鍾情多人熱鬧的市集,又或者唔使花錢的沙灘睇日落,堅貼地。
旅程其中一日, B女交託同行親友照顧,洗米華和 Mandy二人世界。等司機期間,二人你踢我我踢你耍花槍, Mandy見男友衣背污糟,即用手撥乾淨。
經過一輪深情對望,洗米華突然一手攬實 Mandy再一啖嘴埋去,錫完面珠唔夠喉,再打埋個車輪,脷疊脷啜足半分鐘,洗米華仲肉緊到揸實 Mandy條裙,十個激烈!

著住比堅尼的 Mandy,身材弗到漏,抱住八個月大周願錫錫。《蘋果日報》圖片

曬到㷫烚烚, Mandy同洗米華坐喺樹下飲沙冰降溫。

Mandy拎起電話 selfie,洗米華擺出 chok樣配合。

洗米華除衫晒肌, Mandy細心幫男友摺好背心。
傳有咗照揼骨
之後去到 Surin沙灘,繼續煙韌!落車前,洗米華已經除定衫,赤膊騷肌,著低胸花裙加熱褲的 Mandy,有長腿有玉背,噴血度更勝一籌。
沙灘人來人往,但大部分都是外國人,二人放低戒心,攬埋一嚿,望海睇浪。情到濃時,洗米華又嚟料,不停手捽住 Mandy的白滑玉背,之後一手攬實,嘴對嘴肉緊啜,非常陶醉。被啜爆的 Mandy,同樣流露出享受表情。
熱嘴一輪後,二人走去幫襯平價泰式按摩。室外按摩店無遮無擋, Mandy若無其事剝去身上的比堅尼,只包住毛巾,同洗米華各自趴在按摩床上,邊按摩邊對望傾偈。其間,按摩師騎上背推油,由膊頭捽到股位,推勻全身。
最近有傳 Mandy再度懷有「華種」,佗住四個月男丁。
現場所見, Mandy伏在按摩床上,任按摩師騎上背,又推又捽又揼,旅程中亦不見 Mandy有任何避忌戒口,凍飲、沙冰、雪糕全部生冷嘢照放入口。究竟有冇大肚,真係撲朔迷離。

二人齊齊歎泰式按摩, Mandy脫下身上的比堅尼,只包住毛巾。

被傳懷孕的 Mandy,任按摩師推按全身。

上身剝晒的 Mandy,背脊曬到紅晒,清晰見到身上的比堅尼印。

洗米華伸手扶實 Mandy上船,好 gentleman!

過咗一日二人世界, Mandy同洗米華返碼頭上船,會合寶貝女。

洗米華飛去倫敦接 Mandy同女一齊出發去泰國,更全程抱實囡囡又呵又氹。
啜住沙冰睇日落
捽到㷫烚烚,二人之後去了海邊一間露天餐廳,坐低樹下飲沙冰降溫。
飲住沙冰,望住大海,睇住日落談心, Mandy更如小鳥依人,挨實男友心口,二人不時默默望實對方甜笑,何其浪漫!
睇完日落,二人去了 The Surin Phuket過夜二人世界,直到第二日中午,著住黑色吊帶背心的 Mandy和洗米華繑實返到 Ao Por Marina碼頭,落樓梯時,洗米華緊張地捉實女友玉手扶她上船,坐駁艇返上遊艇。

停車場等車,二人四目交投一輪,洗米華突然進攻,攬實 Mandy。

脷疊脷近半分鐘,洗米華仲肉緊到揸實 Mandy條裙。

慾火情侶
圈中人拍拖,十個有十個收收埋埋!但情到濃時,難免忍唔住,甚至在公眾場合上演惹火真人騷,做一陣慾火拖友。


章子怡 霍啟山
章子怡 04年搭上霍震霆次子霍啟山,有次二人孖住到中環 Dragon-i夜蒲,大跳辣身舞,離開時,又在停車場內相擁激吻,女方更大嗌對方 baby,非常肉緊。


陳雅倫 李思捷
13年,李思捷跟比自己大十一年的姐姐陳雅倫撻着,在派對飲大兩杯後,二人慾火攻心,即使在旺角街頭,陳雅倫照舐男方耳仔,上的士後,更在車廂內又啜又 un。


孫佳君  Olivier
14年,成功搭上米芝蓮大廚 Olivier,鬼妹性格的孫佳君在男友的主場餐廳大豪放,又啜又錫,無數次打茄輪,肉緊到伸脷舐耳,旁若無人。


蔡慧敏 楊南日
留學期間搭上楊紫瓊已婚胞弟楊南日,二人夜蒲 Dragon-i後,慾火焚身,在附近公園激吻,當街肉搏。
孕婦不宜做泰式按摩
泰式按摩是泰國古代醫學文化之一,曾被皇族視為強健體魄和治療身體勞損的健身方式。透過泰式按摩能令血液迴轉加快,可紓解過度壓力而產生的肌肉痠痛和心理疲勞,達到排除體內毒素、改善血液循環的功效。但一般懷孕期間婦女,不建議做全身按摩,因按摩等物理衝擊作用,容易導致子宮收縮及早產,特別在懷孕初期的三個月,胎盤功能還在建構中,更加不宜。
撰文、攝影、攝錄:娛樂組

    tvb4life 發表在 痞客邦 留言(0) 人氣()