(由左至右)
Shirley楊澤怡( 21歲)
Ceci李詩穎( 21歲)
Mizaki潘穎琳( 21歲)
Christy周葆諭( 16歲)
FFx唔少出騷衫,甚至當日接受訪問嘅衫褲都喺旺中購買, 4位成員都唔介意,仲覺得又平又靚。

真面目

平有平唱 出騷袋一萬 行頭$180  FFX賺凸:我哋係 MK妹

Ads by Google

上年一首〈 Sugar Baby〉 MV,製作費 900蚊,加上唔合拍嘅舞步,極 MK嘅打份,反而有 3百萬點擊,令騎呢 FFx一夜成名。
刀仔鋸到大樹,令 FFx繼續玩 cheap招,原來過去一年無論出騷定頒獎禮, FFx嘅戰衣都喺旺中(旺角中心)入貨,每件唔過兩嚿水,上週四帶埋新歌〈 MK Pop〉到中環出騷,騷價過萬,入場費$500都爆滿,戰衣只不過$180, FFx賺凸啦,佢哋話:「我哋唔介意俾人叫 MK,亦唔覺旺中啲衫 cheap!」後生女着咩都靚㗎啦!

 


一首〈 Sugar Baby〉令騎呢組合 FFx上位,雖然騎呢又 MK,但過去一年 FFx就係憑住呢招狂執騷,最神奇係喺大學界都受歡迎, 7間大學都有請佢哋出騷,雖然騷價低,一、二萬有找,但密食,一個月都有 4至 5場,最重要係成本低。
「啲衫都唔 cheap!」
FFx由〈 Sugar Baby〉 MV製作費都係得 900蚊,但就有 300萬點擊,又上埋娛樂版頭條,本小利大,之後亦繼續呢條慳錢路線。平時女藝人最花錢嘅買衫, FFx原來超平,大部份都喺旺角中心購買,就連上年 12月出席新城頒獎禮,上台攞勁爆新登場組合銀獎,套衫都喺旺中買, 200蚊有找。

FFx雖然多騷出咗,但依然行慳家路線,出騷好多時自己梳頭、化妝,就連新歌〈 MK Pop〉舞步都係自己設計,認真犀利。

上年〈 Sugar Baby〉 300萬點擊, 9百蚊製作費,又上埋娛樂版 C1,本小利大,恨死唔少歌手。

旺中掃貨
FFx喺旺中買慣買熟,當日 4人着住嘅棒球褸賣緊$59,老闆娘仲話賣剩幾件,證明唔少 MK妹都係跟住 FFx買衫。
前週四( 4日) FFx親到旺中相熟鋪頭,唔少店主一見 FFx即刻撲出嚟,仲話佢哋着過嘅衫,一定賣斷;上週四 FFx更由旺角殺到入中環,喺蘭桂坊開騷,入場費 300蚊至 500蚊都爆滿,當然繼續着旺中$180衫登台啦。隊長 Shirley說:「 MK係香港最出名嘅地方,我哋4個又會成日去,唔覺得 MK係一件醜嘅事。我哋唔介意俾人話 MK妹囉,啲衫旺中買都唔 cheap,最緊要有效果,靚唔靚先?同埋等粉絲覺得我哋冇距離嘛。」

唔只服飾, FFx連波鞋、頭飾和首飾都係喺旺中買晒,一次搞掂, Shirley(箭嘴)頸鏈仲係 25蚊貨仔。

有粉絲
除咗唔少賣衫老闆識 FFx,就連行過都有粉絲要求合照,仲要係女粉絲,非常難得。

跳出 MK
FFx上週四由旺角殺過去中環蘭桂坊出騷,表演新歌〈 MK Pop〉,入場費 300蚊至 500蚊都爆場㗎。

上年 FFx喺新城頒獎禮攞咗「勁爆新登場組合銀獎」,套衫都係旺中貨, 150蚊搞掂,估唔到呢!
騎呢女冇運行
樂壇騎呢組合多,但好似 FFx咁上到位之餘,有 300萬點擊又揾到錢,真係冇第二隊!靚過佢嘅大把,醜過佢哋仲多,但都冇佢哋咁多人識!呢啲真係整定,冇得葡萄。

Cherie

o.m.G
組合都未出道,但成員 Cherie黃芊詠已搭上賤男周永恒,本來係大好機會爆紅,可惜大家對永恒嘅賤男新聞厭咗,連帶佢女友都冇人想識。


H unterZ
相信超毒嘅宅男先會認識,雖然金剛女友陳蕊蕊做隊長,其他成員都有樣有身材,可惜就冇人識,呢行有時認真做,反而唔得。

《蘋果日報》圖片

AD2
數騎呢組合點可以冇佢,當街露乳暈呢招都出埋,仲邊有得輸?之後二人反目兼拆伙, Amy繼續騎呢, Aily就北上發展,仲搭上富二代,唔使做喇。
採訪、撰文:娛樂組
攝影:楊學

tvb4life 發表在 痞客邦 留言(0) 人氣()