G.E.M.硬撬男友 JW自我增值反擊

自脫離黎明後,JW(王灝兒)過檔新公司後推出的新歌《矛盾一生》唱到街知巷聞,其MV點擊率至今高達三百七十多萬。

Ads by Google

人氣回升的她,新聞多多,突傳遭好姐妹鄧紫棋(G.E.M.)硬撬拍拖兩年的有米男友Mark。直言「好耐冇拍拖」的JW,愛情失意,事業得意,決心寄情工作,狂睇心靈書籍,又學唱歌及勤做運動,努力增值裝備自己。

JW被傳遭好姐妹撬牆腳,但日前如常溜冰,心情大好。

JW坦承與Mark(左二)關係密切,但強調大家只是好朋友關係,不避嫌經常結伴一起玩樂。

JW和G.E.M.沒有受爭仔是非影響,日前更與何超蓮三個頭貼頭合照,力證友誼未變。

姐妹依舊

JW跟 G.E.M.識於微時,早於十多年前的歌唱比賽已經碰頭,即使入行後大家仍一齊玩,但早前 G.E.M.被拍得跟其拍拖兩年的富貴男友Mark約會,疑似硬撬JW牆腳。不過好姐妹一條心, G.E.M.否認跟Mark有發展空間,而JW亦代她澄清︰「我覺得佢哋真係朋友嚟o架!我o依家係single,同Mark一路都係朋友,我只係同佢阿妹夾份搞時裝生意。」

不但為 G.E.M.講好說話,JW還在社交網上載三人連同眾好友的大合照闢謠,力證友情不變,而日前重踏情敵G.E.M.去玩開的太古城溜冰場,她也毫不避忌。雖然曾表示「冇人追好耐,冇拍拖好慘,大家唔好喺我傷口灑鹽」,但年僅廿五歲的她,思慮過後,強調現階段還是事業行先︰「以前細個鍾意玩,現在要放多啲時間做嘢和屋企。」

JW扶着欄杆借力,提起單腳滑行,嘗試向難度挑戰。

自費學戲

講得出做得的她,積極狂操,不時跑步練氣,又溜冰、打網球做運動修身。她自小已學溜冰,滑得有板有眼,也懂得作高難度挑戰的單腳滑行。外表嬌小的她,動靜皆宜,日前她溜完冰後,便到書局睇心靈及健康的書籍,多方面增值,以準備來年的工作。

「我呢排忙錄音,預計二月中出新歌,另外又畀錢上堂跟彭秀慧學戲,因為想開拓多方面發展,到時有適合角色,可以演戲。其實我細個已經好有表演慾,所以上堂嗰時好享受,成日上到過晒鐘。」

昔日由黎明發掘入行,首年便攞得新人獎及金曲金獎,惜後勁不繼,至上年七月轉投新公司,新歌《矛盾一生》好評如潮,總算收回失地,她透露最終目標︰「做歌手一定想開騷、開巡迴演唱,但要儲多啲好歌先,再配合天時地利人和,o依家响音樂逐步逐步行。」JW始終年輕,還有大把機會。

全站熱搜

tvb4life 發表在 痞客邦 留言(0) 人氣()