肥媽戴平DD

每晚十時半睇無綫,都會見到肥媽(Maria Cordero)邊鬧陸浩明邊教大家食平DD,真係令東姑喺烹調方面獲益良多。原來肥媽唔單止喺買餸方面,揸緊買平DD呢個宗旨,就連買珠寶首飾、衣着鞋襪方面都一樣堅持買平DD慳多啲!

Ads by Google

近幾年,肥媽教煮餸教到爆紅,登台走埠,接job接到手軟,三月十八、十九日又話要喺紅館開《肥媽友誼長存30周年演唱會》,唔使問阿媽,都知佢賺到盤滿缽滿等退休啦!大家更加會以為佢實會買多幾件珠寶首飾、名牌手袋嚟獎勵自己,如果你咁諗嘅話,就真係大錯特錯喇!

日前,東姑就同肥媽、黑妹姐,以及近年喺大馬回流返港拍劇嘅王綺琴飯聚團年。打扮得珠光寶氣嘅肥媽一嚟到,就話要借東姑支筆一用,佢話:「你哋真係要幫我解釋下,出面好多人都以為我有好多錢,有人仲問我有冇幾千萬身家?我有嘅話,就一早退休啦!唱到家陣六十二歲咩!你哋成日以為我穿金戴銀好富貴,其實我手上啲戒指大部分係人哋送,我自己只會買朱義盛。我對耳環十幾蚊,仲啱啱跌咗一隻,咁易唔見嘅嘢,我又點會買真嘢吖?」東姑建議無綫可以開多個節目叫《慳多DD》畀肥媽做主持。

肥媽、黑妹姐(右)同王綺琴(左)認識多年,大家情如姊妹,肥媽表示個唱之後,將會半退休,到時就會跟兩位姊妹學打高爾夫球及行山。

肥媽笑言好多朋友都以為佢穿金戴銀好富貴,查實除咗左手隻珍珠戒指係佢買畀亡母之外,其他戒指都係朋友送贈嘅。

 

飯後,肥媽坐黑妹姐順風車,但佢就邊坐邊鬧爆架跑車嘅車廂太窄唔啱肥人坐,仲即場示範上落車畀東姑睇,認真搞笑!

    全站熱搜

    tvb4life 發表在 痞客邦 留言(0) 人氣()