兩盒鹹,一盒甜

So Comment

香港洲際酒店大堂酒廊 Lobby Lounge 尖沙咀梳士巴利道 18號大堂樓層 電話: 2313 2323(甲一) (蘇施黃)

Ads by Google

《 REGENT的回憶》
驚嚇的……
一日下午同張國榮去 tea,佢突然話想去買個相機,和朋友就行咗去 New World那邊。良久,他們回來了,雙手放在身後,拎住袋嘢,喺完全冇留意亦冇防備下,個死嘢拎咗隻 cat毛公仔“嘩“!一聲放在我面前,我:「呀……呀……呀……!」從座位跑到落地玻璃前,繼續「呀……呀……!!!」我見到 Coffee Shop每人都望住我,上一層 Lobby Lounge亦有人望下來,上兩層飲酒 lounge都有人望落嚟!只見到呢個國榮笑到起唔到身。真係唔明我點解仲可以同佢係朋友。

有益有建設的……
1999年決定要喺千禧做啲有益有建設性嘅事,於是決定戒煙,亦定下日子係 2000年 2月 17號生日那天開始戒掉 27年的惡習。 2000年 2月 16日飯後,又係同國榮及一班朋友又係坐喺 Regent Coffee Shop預備 count down生日。到十一點多,我開始好緊張,因為煙盒仍有 6、 7支煙,唉吔!連呢包煙都食唔晒就要戒煙嘞!十一點半,快啲食多支……十一點九……點多支先至算……十一點十一……快啲吸多幾啖……突然國榮捉住我拿煙隻手,將我支煙大力壓在煙灰缸上「食乜鬼吖! Happy Birthday呀!」呢支就係我一生人食嘅最後一支煙。
跟住 New World又拆, Regent又改做 Intercontinental,冇乜原因下,大家都冇乜再去洲際。

THE RED BOX

最近乜嘢帶番我返洲際呢?乃係金小姐介紹呢個 Red Box( Chinese Tea Set)$608 for 2(閒日);$628 for 2(星期六、日及公眾假期),每日只預備十多 set,所以一定要預訂,免得大家失望,因為我失望過。



〈鮑魚北菇香酥撻〉好好味道!!
〈百花炸蟹箝〉啲蝦膠打得實咗啲
〈鵝肝、雞肉〉酥唔錯



〈胡麻雀肉酥〉 OK
〈焗叉燒餐包〉好食
〈西班牙火腿、元貝〉超級好味
〈蘿蔔酥〉起初以為佢細細件,酥皮多,裏面蘿蔔絲一定少,點會好食……點知佢嘅比例又做得相當唔錯,而且味道極佳。



〈芋頭鹹蛋黃酥〉又少少鹹少少甜, not bad。
〈芒果綠豆蓉雪梅娘〉 OK
〈香脆雜果仁卷〉 refine少少嘅花生糖



〈桂圓杞子淮山雞蛋糕〉相當好食



〈杏仁桂花糕〉質地怪咗啲,味道 OK

其實我哋叫咗 1個 2人 Tea Set, 4個人都食唔晒,仲包兩杯茶, 4條友 Tea完去食飯, 4個都仍然話好飽! Tea Set事小,多謝 Red Box帶畀我一些麗晶酒店回憶,相信以後亦會多啲機會去洲際酒店。只係啲梳化唔係幾好坐啫。

香港洲際酒店大堂酒廊 Lobby Lounge
尖沙咀梳士巴利道 18號大堂樓層
電話: 2313 2323



蘇施黃
資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。

攝影:蘇施黃

    tvb4life 發表在 痞客邦 留言(0) 人氣()