眾人諸事

黃大仙靈籤 金猴運程逐個捉

Ads by Google

猴年伊始,萬象更新。羊年中港矛盾加劇,銅鑼灣書店五子失蹤,香港大學是非不斷。阿爺之下,港人之上, 689對上唯唯諾諾,對港人聲音充耳不聞,硬推沙皇上位,打擊政敵不遺餘力,反轉狼肚都係屎,搞到尖啤一身蟻。新春前夕,《壹》仔去黃大仙廟,為國家主席習近平同 689等八人嘅官運或姻緣等求籤,睇吓佢哋猴年運程。送羊迎猴,謹祝讀者猴年順遂,闔府安康,掃走不如意,迎接活潑嘅猴年。

國家主席 習近平

籤文話詩仙李白有日飲悶酒,見水中有月亮倒影,竟然伸手去撈,最終浸死。黃大仙解籤樓佛隱居士將呢支下下籤定性為中籤,代表習近平危機唔少,但未必不能避過。籤文第一句講,習總表面風光強勢,其實只係假象,虛有其表,內裡有好多問題,例如中共權鬥。佢一唔小心,隨時有「被狂風吹散」嘅危險,有苦自己知。習總想穩坐「皇位」,似乎有唔少隱憂。

特首 梁振英

呢支中籤籤文講,孔子食粗茶淡飯,都不厭貧窮,仲快樂地自修其身,不合義嘅富貴都視之如浮雲。唔係吖嘛,聽落幾正面喎。但佛隱一睇支籤就話唔樂觀。佢話孔子係聖人,暗示 689好想繼續做特首。籤文後兩句指 689想大富大貴,可惜推行政策時根本冇心達到目標,淨係掛住個官位,搞到政策如浮雲般唔得實際,搞出好多爭拗。佛隱話即使 689富貴,個心都唔會安樂,大受困擾,連任機會都微。

前特首 曾蔭權

官司纏身嘅曾蔭權使唔使坐監?籤文講,春秋時期季札將軍有把寶劍,徐君好鍾意。季札想遊歷完後將劍贈徐君,點知返嚟發現徐君已死,就將寶劍掛喺佢墓前樹下。佛隱話貪戀寶劍指曾蔭權為人貪心,呢支下下籤暗示佢會身敗名裂,就算唔使坐監,都會搞到一身蟻。

政務司長 林鄭月娥

一直好打得嘅林鄭,最近民望評分跌至新低。官到無求膽自大嘅佢,嚟緊官運會點?佛隱話呢支係下下籤,林鄭好似東施咁想學西施,但山雞豈可勝鸞凰?暗示林鄭想做政務司長做到最好,想為政府同香港市民做好多嘢,結果弄巧反拙。籤文第二句,仲暗示林鄭想領導搞好政府,點知愈搞愈衰,搞到國都破亡。佛隱估計林鄭有好多是非,嚟緊個人威信都會大受打擊,「我睇佢好難做落去喇。」

前全國政協委員 劉夢熊

尖啤得罪 689惹官非。籤文講古人姜太公一直有出身之志,但不合時,於是隱藏在渭水釣魚。文王之後千里求賢士,請姜太公做軍師,仲滅商興周。佛隱話呢支中吉籤唔錯,劉夢熊會有貴人,估計都唔使坐監。

沙皇 李國章

李國章一三年喪妻,最近同緋聞女友拖手睇戲。籤文話,花木蘭當年代父從軍,盡忠盡孝,膽識過人,好多男人都比唔上佢。佛隱話呢支係中吉籤,相信李國章戀情有唔錯發展,但唔代表一切順利,當年花木蘭都喺好耐之後,先俾人發現佢係女兒身。李國章要修成正果,可能仲需要一段時間。

完美 package 劉鳴煒

以為擁有完美嘅 package,姻緣一定無敵?少年,你太年輕了。劉鳴煒支下下籤文講南北朝時期,陳朝末代皇帝陳後主沉迷女色,不理朝政,激發隋高祖起兵討伐。陳後主最終帶妃嬪逃跑,無處可逃下被吊死。佛隱話,劉鳴煒姻緣唔單止無着落,仲好可能有好多貪錢嘅女人埋身,最後呢啲「妖媚」招來惡果。所以大家唔使葡萄,劉生就記得小心啲喇。

港大校長 馬斐森

馬斐森個校長位坐唔坐得穩?呢支中吉籤籤文講陶淵明辭官唔做,返到小屋,過住吟詩飲酒嘅優游生活。佛隱話,陶淵明退休後生活悠閒寫意,相信馬斐森可以做到約滿,做到佢唔再願意做為止。籤文暗示馬斐森離職後,生活非常安穩寫意,相信嚟緊任期唔會有太大風浪,令佢要喺唔愉快情況下離職。

撰文:巫不言
插圖:祝健中
mailto:news@nextdigital.com.hk

 

tvb4life 發表在 痞客邦 留言(0) 人氣()