電視精

《再一次 Happy Ending》鄭敬淏發力追女團

Ads by Google

上年特別多韓國偶像公開戀情,可惜去到年尾,已經有好幾對分手,偶像拍拖實在唔容易!
不過凡事總有例外,少女時代成員秀英 3年前同演員鄭敬淏拍拖,至今打風都打唔甩。鄭敬淏有女友加持,愈來愈紅,上年有套《為純情著迷》口碑唔錯, 2016年乘勝追擊,夥拍張娜拉拍新劇《再一次 Happy Ending》,無獨有偶就係要追女團成員!
話晒追到韓國女神,唔知劇中有無一兩招可以偷到師?

單親爸遇上過氣女團

韓國盛產組合,女團多到數唔晒,不過始終青春有限,爆得起可以留喺娛樂圈繼續轉型發展,不過大部分都逃唔過退出嘅命運。《再一次 Happy Ending》將呢個破壞幻想嘅事實拍成電影,都算係破格。
故事講述第一代妖精少女團體五位成員年屆三十,當中有成功爬到上天后位置,亦有人嫁入豪門,不過女主角就回歸平淡,喺婚姻介紹所工作,遇上做娛樂記者嘅單親爸爸男主角,一開始梗係不打不相識,由鬥氣寃家開始,慢慢成為情侶。齋睇個劇名已經知道,最後一定係有情人終成眷屬,劇中主要講韓國現代人對感情同婚姻嘅睇法,由剩女、結婚,到離婚、再婚,相信女觀眾特別有共鳴。開播兩個星期,隨住口碑愈來愈好,收視率逐步上升,唔知可唔可以成為 2016年第一套高收視劇集呢?




劉仁娜扮醜女,電一頭大鬈髮加大眼鏡,第一眼真係認唔出,不過隨住劇情發展,應該會變番靚。


張娜拉呢兩年回流韓國,拍咗多套電視劇,《命中注定我愛你》、《記得你》都有唔錯成績,喜劇女王當之無愧。


故事一開始已經講男女主角飲醉酒而衝動結婚,當然唔少得錫錫戲份。


鄭敬淏一向擅長演愛情喜劇,新劇《再一次 Happy Ending》做娛樂記者,同張娜拉大鬥演技,唔知女朋友秀英睇到會唔會呷醋呢? 女二劉仁娜搶鏡

男主角鄭敬淏最為人熟悉係同少女時代嘅秀英拍拖,其實佢拍過唔少韓劇,當中大部分係愛情喜劇,形象健康入屋。上年《為純情著迷》飾演暖男社長,吸納唔少女劇迷,今次飾演單親爸爸,呢類住家男形象又係女劇迷最愛。嚟緊兩年韓劇界將鬧小生荒,鄭敬淏絕對可以坐穩一線位置。
《再一次 Happy Ending》最大睇頭,係各位女團成員。女主角張娜拉雖然已經 34歲,不過天生童顏,就算喺回憶片段中扮十幾歲美少女又唱又跳,都難佢唔到。女團另一位成員係女二劉仁娜,《來自星星的你》入面做奸險情敵,今次要佢扮醜女,難得佢又唔介意增重十磅。佢話希望可以挑戰自己,觀眾對佢嘅四眼醜女 look情有獨鍾,仲話好有親切感,睇怕編劇要加多啲筆墨去寫佢條感情線。




劇中有一場戲喺海邊拍攝,鄭敬淏同張娜拉仲要落水,真係睇到都覺得凍。


劇中出現嘅女團 Angels,除咗有張娜拉及劉仁娜,仲有 2NE1嘅 Dara(下排中)客串,遲啲仲會出原聲大碟。


張娜拉今年 34歲,要著咁得意嘅歌衫,佢話自己以前做歌手都未著過,感覺好新鮮呀。

撰文:關錦雯

 

    全站熱搜

    tvb4life 發表在 痞客邦 留言(0) 人氣()