韓國男子組合 INFINITE世界巡迴演唱會,最後一站嚟到香港,七位成員跳足兩個半鐘, fans值回票價。

日韓到會

INFINITE香港演唱會 動感無限

Ads by Google

2016年韓國男團繼續掘金,今年打頭陣嚟到香港舉行演唱會嘅有七人男子組合 INFINITE! 2013年泊咗 SM Entertainment呢個大碼頭之後,一直平步青雲。上年年中開始舉行第二次世界巡迴演唱會「 INFINITE EFFECT」,終於巡到最後一站香港站。七位成員零舍 hyper,狂講廣東話,搞到 fans全場尖叫聲不絕呀!

巡迴尾場 不停道謝

INFINITE出道第六年,由上年開始嘅巡迴演唱會「 INFINITE EFFECT」,係組合第二個世界巡迴,除咗亞洲之外,仲去到倫敦、柏林、洛杉磯、墨西哥等等,嚟緊二月喺韓國舉行 encore演唱會,門票開賣 12分鐘已經賣晒,可見人氣之高!至於今次嘅香港站,係巡迴最後一場嘅海外場,所以七位成員都特別賣力。一開場以三首快歌《 BTD( Before The Dawn)》、《 Paradise》、《 Be Mine》炒熱全場氣氛,佢哋著住白色西裝又唱又跳,毫不留力,幾首歌之後已經滿頭大汗,白恤衫濕透猶如透視裝, fans們梗係睇到眼定定! INFINITE喺演唱會不停向 fans道謝,幾乎每唱幾首歌就停一停,問大家鍾唔鍾意佢哋演出,聽到大家嘅歡呼聲就多謝大家,演唱會尾段仲逐個逐個工作人員講多謝,叫 fans俾掌聲佢哋。韓國組合最講求禮數,呢方面做到足!




三位於組合入面年紀最細嘅成員 L、成烈同成種組合 INFINITE F,行鄰家男孩路線,最受女 fans歡迎。


成烈同成種感情好好,突然玩騎膊馬, fans立即尖叫!


優鉉特別為演唱會製作新歌《 Every day》,唱功了得, fans都好想佢推出個人大碟。 小分隊落力 苦練廣東話

INFINITE七個人唱出多首大熱作品,好似《 Come Back Again》、《 Destiny》等等,之後就以小分隊形式演出,先有主音優鉉單飛唱出新歌《 Every Day》;之後就有行 Hip Hop路線、東雨同 Hoya組成嘅 INFINITE H;上年推出個人專輯嘅聖圭唱主打歌《 Kontrol》;最後到 L、成烈同成種嘅 INFINITE F。小分隊嘅演出可以比較大膽,同組合嘅路線唔一樣,每位成員可以建立自己嘅特色,令演唱會更加豐富,不過最重要係可以俾其他成員抖吓!
去到演唱會最尾,成員逐一向 fans道謝,佢哋仲每人學咗一句廣東話,好似「我會俾大家更多更多嘅愛」、「我會好好記住今晚」、「我好鍾意大家,唔好唔記得我」,雖然發音有待改善,不過誠意搭夠,已經足夠令台下 fans個個大聲尖叫!




東雨同 Hoya組成嘅 INFINITE H大唱 rap,仲大騷街舞,別具一格。


最近嘅韓星演唱會,都鍾意拋啲紀念品落台俾 fans,一般常見有玫瑰花,今次扔紙飛機,幾有新意。


優鉉於 2月 8日生日,隊友瞞住佢送上蛋糕,令佢大感驚喜。

撰文:關錦雯
攝影、攝錄:胡春輝(部分為網絡圖片)

 

    全站熱搜

    tvb4life 發表在 痞客邦 留言(0) 人氣()