韓國天王 Rain相隔六年喺香港開騷,雨中騷肌呢一幕成為全晚高潮所在。

外太空

RAIN寶刀未老 騷岩石胸

Ads by Google

喺競爭激烈嘅娛樂圈生存,捱得過汰弱留強仲要成為天王,絕對唔係容易事。韓國天王 Rain(鄭智薰)經歷過高低起跌,上年年尾成立個人公司,決定今年大展拳腳。世界巡迴演唱會「 The Squall 2016王者歸來」嚟到香港站,氣勢絕對唔輸蝕俾一班後起之秀,又唱又跳兩個幾鐘無間斷,一副完美 body令女 fans叫到拆天。想挑戰佢嘅天王之位,一班小弟弟仲未夠班呀!

狂操胸肌 雨中展露

今次係 Rain相隔六年,再次嚟到香港開騷。一出場就唱出幾首佢嘅首本名作《 It's Raining》、《 I'm Coming》、《 Hip Song》,一連串快歌加佢嘅招牌熱舞立即令全場氣氛非常高漲。其實 Rain今年出道十四年,以 33歲之齡仲可以跳到咁激烈嘅舞,喺韓國嚟講算係非常少有。佢先用流利英文打招呼,又講廣東話:「多謝。大家好,我係 Rain,好多謝大家光臨。」嚟過咁多次香港,基本打招呼已經難佢唔到, fans依然叫到拆晒天!
唱完幾首快歌之後,就唱幾首慢歌冧吓 fans,順便可以休息吓。同女 dancer雖然有少少身體接觸,不過一班追隨已久嘅 fans都無尖叫,果然夠資深。高潮位係 Rain招牌雨中濕身,當唱到《我》時, Rain首先好型咁除低白色西裝外套,淨係得件緊身黑背心,佢一手扯爛衫,舞台仲落起雨幕,見到佢喺舞台上赤膊淋雨,尖叫聲已經震耳欲聾,大熒幕個鏡頭仲不時 zoom近佢嘅岩石胸、朱古力腹肌同人魚線,全場簡直陷入瘋狂狀態!雖然呢一幕喺 Rain每一個演唱會都會出現,不過每一次睇都係咁震撼,果然薑愈老愈辣!




撕開件衫呢一下,絕對係全場尖叫聲最高分貝嘅一刻。


Rain露出上半身肌肉同人魚線,據知今次演出之前佢都嚴格控制飲食同狂操,以達到最佳狀態。


34歲嘅 Rain,做地板動作依然綽綽有餘,每一個舞步都強而有力,後輩們要學習。 中韓直播 唱國語歌

演唱會又唱又跳係唔夠, Rain就擅長同 fans交流溝通,氹佢哋開心。一時叫 fans扮佢尖叫,一時又扮嬲,善用自己表情多多嘅專長。佢仲整咗一條短片,回顧初出道到而家嘅演藝生涯,又話自己 2016年準備咗好多禮物,拍電視劇之外,仲有籌備已久嘅大碟,當中仲會有中文歌同英文歌,向 fans開期票要努力工作,唔知係咪暗示未有咁快同女朋友金泰希結婚呢?
Rain亦好照顧 fans,演唱會尾段佢突然拎手機上台,原來佢用韓國大熱嘅 V app直播,叫 fans尖叫,隔住個熒幕都感受到現場氣氛。佢之前都曾經用過呢個 app直播佢去旺角買雞蛋仔,睇嚟佢好鍾意玩直播。最後 Rain以《 La Song》為演唱會畫上句號,唱到唔捨得走仲大送飛吻,咁鍾意香港就嚟多啲啦!




Rain最叻擺可愛 pose氹 fans,回眸一笑又令全場大叫。


Rain迷上玩直播,開緊演唱會都要拎手機同自拍神棍出嚟玩直播。


雖然已經有大美人女朋友金泰希,不過工作還工作,同女 dancer跳舞一樣黐住跳。

撰文:關錦雯
攝影、攝錄:羅錦波

 

    全站熱搜

    tvb4life 發表在 痞客邦 留言(0) 人氣()