壹科林

中階 action cam互鬥  Casio EX-FR100 VS GoPro HERO+LCD

Ads by Google

提到 action cam,好多人自然會諗起 GoPro,除了體積細、拍片質素好之外,配件夠多亦都是原因之一。不過,近年 Casio亦都積極開發 action cam,雖然只是後起之秀,但提供更多拍攝功能,令 action cam不再局限「 action」先用得。
而新一代的 Casio Exilim EX-FR100正式到港,定價比上一代平之餘,配件亦都更齊全,這部後起之秀與 GoPro的產品,邊個更好用?今期特別用同屬中階級數的 GoPro HERO+ LCD作比較,你就知應該買邊部。

規格比較

 

〈測試一〉按鍵操控度  GoPro Win


由於 EX-FR100(左)的按鍵比較細粒,戴手套後未必摸到,反而 HERO+ LCD的按鍵分布夠散又大粒,就算戴住手套都好易摸到。

玩得 X-games,通常都要做足保護措施,而手套更加必備,要戴住手套都可以正常操作到 action cam,好重要。由於 GoPro專為運動用家而設,在這方面設想較周到,例如特大按鍵、分布夠散,就算戴住手套去摸,都知邊個掣打邊個掣。相反, EX-FR100的按鍵大部分放置在機頂或屏幕側,密集之餘戴手套亦未必知邊個掣打邊個掣,每次都要除手套先可操作,方便程度大打折扣。

〈測試二〉顯示方便性  Casio Win


要「飛芒」, EX-FR100(右)的屏幕已經做得到,慳到不少配對時間。

Action cam通常安裝在頭頂、胸前等位置,要睇到構圖如何,就一定要另駁一個顯示裝置先睇到。 HERO+ LCD內置藍牙及 Wi-Fi連接,配合專用 app便可駁手機睇拍攝畫面,但如果運動途中發生意外,隨時手機都跌爛。反而 EX-FR100採用分體設計,可直接將相機屏幕拆下裝在其他位置睇構圖,就算出意外都總比跌爛手機好。

〈測試三〉三防能力  GoPro Win


HERO+ LCD(左)本身已經有防水防撞殼,硬度極高;相反 EX-FR100只靠膠邊防水濺,擋到大雨但不能浸水。

在惡劣環境下操作,三防能力好重要,由於 HERO+ LCD設有不可更換的三防外殼,除了防撞、防塵之餘,防水深度亦達到 40米,上天下海都無問題。至於 EX-FR100雖然機身都有防撞同防塵能力,但防水能力只達到防水濺,若果要浸水,就要買一個球形的防水殼,機身體積立時倍增。

〈測試四〉影片質素 平手

用得 action cam,拍片效果好重要,因為大部分時間都以拍片為主。今次特別手提兩部 action cam以 1080p@30fps格式,並以邊跑邊拍形式拍攝,以測試拍片時效果。而兩機在拍片時,顏色及細緻度同樣有不錯表現,就算快速轉動鏡頭時殘影亦不算嚴重,效果令人滿意。至於拍片方便程度,由於 EX-FR100將拍片、影片鍵都同時設在機身,相比起要轉模式的 HERO+ LCD更順手,不過用慣用熟之後,其實分別不大。




GoPro HERO+LCD細緻度都算幾高,而左搖右擺的情況下亦未見窒格,非常順暢。


Casio EX-FR100畫質感覺與 DC相當近似,而細緻度亦夠高,只是有輕微曝光過度,但對整體畫面影響不大。 〈測試五〉相片質素  Casio Win

雖然 action cam以拍片為主,但如果相機功能夠好,平時都可以拎出街影相用。而兩部機中,以 EX-FR100的影相能力較強,無論在細緻度、顏色還原度上,都貼近 DC相機質素,而可提供的設定選擇亦都較多。至於 HERO+ LCD拍攝出來的相片,略嫌曝光不足,同時顏色還原度亦較差。




GoPro HERO+LCD測光系統明顯比拍片時較弱,有明顯的曝光不足,相信是由於機體不設重點測光功能所致。


Casio EX-FR100拍攝質素貼近 DC,主體測光準確之餘,雲層的「爆光」位亦能保留一定的細緻度,唯一是廣角鏡頭有明顯變形。 總結:男女有別

雖然兩部機同為 action cam,不過明顯針對的用家群有所不同, EX-FR100會比較適合運動強度較低,但又愛影相的用家,同時又想 action cam可以在日常生活中用得着。反而 HERO+ LCD會適合運動強度高,對相片質素要求不高的 X-games用家。

撰文:蘆甘
攝影:鄭樹清
mailto:features@nextdigital.com.hk

 

    文章標籤

    Casio EX-FR100 GoPro HERO+LCD

    全站熱搜

    tvb4life 發表在 痞客邦 留言(0) 人氣()