楊永仁的恒發洋參開設在文咸西街,今次 911暴跌,不少南北行街坊中招。《蘋果日報》圖片

中環人語

咬住條參 永不翻身

Ads by Google

上市編號( 911)嘅恒發洋參上週四一開市暴插九成變仙股,有小股東攬住兩條當日股票推介會的紀念品——野生洋參,向小宗哭股喪。




小股東攬住兩條野山洋參,自此泥足深陷。

洋參大王楊永仁喺文咸西街發跡,聽講唔少海味鋪老闆中晒招;最抵死係連海味街附近啲銀行職員都推介埋一份;去年底恒發仲發可換股票據,有人拍心口話「點都托住喺七毫子樓上」,否則揸住票據嘅人可以換日本山崎威士忌浸嘅花旗參;當時日本威士忌炒到冇貨,看似矜貴,再吹多嘴話大陸軍方部隊上場打野戰,要含住片洋參增加戰鬥力,所以大有市場;恒發變成仙股後停牌,有人私底下安慰小股東,謂不是被「𡁻咗隻殼」,計小宗話,小股東何不學吓老人家臨終前為見子孫最後一面,將嗰兩條野山洋參切片,含住喺喉嚨補氣吊吓命好過喇!

金融逍遙客:港大學生哥 無料無口才

游走於中港台併購、私募投資的金融多棲動物,現為多間上市公司主要股東及董事




(郭永強攝)

強國財團乘人民幣強勢,近年在海外大舉投資,目標一係大都會核心資產,一係知名品牌,如萬達買 AMC院線、比華利山靚地,復星併購 clubmed及葡萄牙保險公司,單單數十億嘅 deal,喺財經市場都是大新聞,買到鬼佬經紀聽到中國人有興趣嘅項目,都加多兩錢肉緊。呢啲經紀角色,十多年前香港人有絕對優勢勝任。作為東西橋樑,香港一有語言優勢,二有人脈經驗,但時移世易,國內民企財團,中高層管理已盡由長春藤海歸專業管理,一口純正美語加上本身已有華爾街的關係,與鬼佬做 deal,級數已非維多利亞港內的 HKU或 CU師兄可比。
看着電視上圍剿李國章及眾多校委會成員嘅畫面,逍遙客真係心噏,即使出師如何有名,手法盡是古惑仔影子,小聰明伎倆。連一向照顧學生溫文儒雅嘅校長,都講生命受威脅呢啲重話,可感受到當時呢班學生哥暴力程度。聽到學生代表慷慨激昂的質問,激動咆哮有餘,內容卻空洞無物,一味話我要見你,依家就見,唔見就唔好怪我哋點點點……睇到咁嘅畫面,逍遙客恍似聽到電影中黑幫大佬講數的對白,唔怪得校長都發火。一句對學生表現極度遺憾,冇料又冇口才的學生代表即場已高下立判。
呢班學生哥可能好有理想卻空有一腔熱情,但能力完全不逮,毫無章法嘅做法,早喺佔中時間已暴露無遺。學生可視為一個社會及教育制度的產品,而當下出咗咁嘅產品,宏觀嚟睇,要怪真係唔怪得呢班學生,肯定係整個社會嘅問題,亦係我哋教育環境出咗問題。香港競爭力的衰落,若一味怪外部因素,唔識反省檢討自身問題,對改善自己絕對毫無幫助。逍遙客間公司近年招請剛畢業大學生,唔好話知識面或能力,只係工作態度呢個基本要求上,合格嘅已愈來愈買少見少。繼續出啲咁嘅產品,香港幾時先可重振雄風?

中環寸嘴:恒指見 24,000點

工廈大王楊耀松長子,出入高級酒店、銀行及知名食肆,與各路人士打交道,透過美酒佳餚,察看人生百態,讓讀者「嗒」落有味。

嗱,喺度同大家講,我話自己「剝」 bra係剝得多,不過冇肌膚接觸嘅,冇計啦,家族係「洋雜世家」,底衫褲乜都做,我都係「睇辦睇得多」先成日剝 bra咋!不過我唔鍾意做 trading,俾人走數血本無歸,𡃁仔時,陳寶珠前夫開嗰間大大百貨執笠走數,見住啲姑丈去港督府請願。
有個老友花廿皮買本雜誌,睇咗我十一月尾登出嚟張路紙,話恒指跌到 14,000點,佢信邪避過一劫,咁就唔怕兩公婆去「好酒好蔡」食小便飯,呢鋪咪「上咗鋼板任佢斬」,埋單一皮嘢落樓,不過老友唔識知恩圖報請我去食多餐;唔及得樓下逍遙客,翻啅五次「好酒好蔡」咁富貴。
都話日本仔好陰濕,殺出個負利率,我啲 Yen decumulator先至鬆一鬆咋,咁就去上環西苑整碗乾燒翅啷吓口,吸收吓骨膠原,皮膚冇咁易皺,咁啱撞到個老闆娘顧太,回憶吓以前喺溫哥華開山劈石嘅日子,總言之搵啲好嘢食,好過啪維他命丸!嗱,再「些牙」張路紙,嚟緊我睇 24,000點,仲唔挾你空倉,不過都係鬼佬嗰句 sell in May& go away!




楊國佳


半隻鹽焗雞,家陣唔係好多酒樓識整呢啲傳統美食,真•鹽焗㗎!


呢個股市大跌浪,我做啱咗一半;如果唔係點有心情整碗蟹肉乾燒翅啷吓口!


我唔介意同大家「些牙」呢張高人指點嘅路紙,睇通條攤路就好做嘢。 大鱷中港瀨嘢 


Hayman Capital○九年曾持有《經濟日報》 6.054%,後來沽售,有份接貨的基金經理指 Hayman手上的貨要「打柴」。(關永浩攝)

花旗國對沖基金佬空群而出,「沽」注一擲,不過講就梗係兇狠,所謂猛虎不及地頭蟲,呢班大鱷喺大陸同香港都瀨過嘢㗎!




(網上圖片)

對沖基金: Hayman Capital
創辦人: Bass J Kyle
年齡: 46歲
瀨嘢之作: 07-08年持有經濟日報( 423)超過 5%權益,估計入貨價在$2以上,在$5.2、$3.354及$1.381均有增持,至 09-10年間,以每股一元多沽清手頭股份,損手離場。




(網上圖片)

對沖基金: Pershing Square
創辦人: Bill Ackman
年齡: 49歲
瀨嘢之作: 2011年以 200倍槓桿比率購入認購期權( call option),賭港元升值 30%,但最終沒有實現。




(網上圖片)

對沖基金: Paulson& Co
創辦人: John Paulson
年齡: 60歲
瀨嘢之作:投資加拿大上市大陸林業公司 Sino-Forest,被 Muddy Waters踢爆造假,公司後來清盤, John Paulson旗下基金損手$7億美元。

    全站熱搜

    tvb4life 發表在 痞客邦 留言(0) 人氣()