眾人諸事

李國章拖女睇戲 跟阿爺學吸毒

Ads by Google

香港大學學生要求改革校務委員會,上個月發起一星期罷課。新任校委會主席李國章一於少理,當晚去咗灣仔米芝蓮一星餐廳國福樓度食好西。佢之後首度主持會議被學生包圍,事後開記招炮轟學生似吸咗毒,直頭信口雌黃。

據知,李國章拒絕咗學生對話條件,包括會面要喺港大校園進行等等,搞到對話陷入僵局。但嗰邊廂,上星期日黃昏,佢同被爆出「父女戀」嘅 DBC數碼電台市場推廣部主管何婷媚 Monique,一齊去金鐘 AMC Pacific Place睇戲。
佢哋睇嗰套電影叫《 PARTY冇限耆》( Dirty Grandpa),呢套三級片講述由羅拔迪尼路飾演嘅阿爺剛剛喪妻,捉埋乖孫去海灘派對喪玩,又教個孫啪丸、溝女同喪蒲。咦?呢頭批評完學生吸毒,估唔到李國章嗰頭就去睇戲,同阿爺學啪丸。
呢套戲嘅題材都幾啱李國章。佢三年前喪妻,最近似乎放低傷痛,同年約四十歲嘅 Monique擦出愛火花。唔係信口雌黃㗎,坐喺李國章附近嘅讀者,目擊李國章睇戲睇到勁開心,一邊拖住 Monique隻手,一邊食爆谷,一邊笑到格格聲。至於同學生對話喇喎,擺埋一邊先啦。

馬斐森引希斯堡慘劇 曲線撐學生?


馬斐森來自英國,鍾意踢波同睇波,當然了解希斯堡慘劇嘅前因後果。(翁少陽攝)

港大校長馬斐森上星期陪同李國章出席記者會,發言一改之前力撐學生嘅口徑,跟隨教育沙皇一致批評學生,話上週二學生包圍校委會嘅行動,令佢感到人身安全受威脅,又同意李國章話公民黨喺背後煽動學生。馬斐森星期日回覆公民黨主席余若薇嘅一封信,仲加料話當晚佢被學生包圍,令佢諗起一九八九年希斯堡球場釀成九十六人死亡嘅人踩人慘劇。




希斯堡慘劇導致九十六人死亡,大部分死者係對陣利物浦同諾定咸森林嘅球迷。(網上圖片)

政界唔少人對馬斐森印象唔錯,對佢今次突然掉轉槍頭「疑中留情」。有明眼人搵番希斯堡慘劇獨立調查委員會上星期發表嘅最新報告,嘗試替馬斐森辯護。報告指摘警方安排失當先至係導致人踩人慘劇嘅主因,應該負最大責任。
明眼人話,馬斐森來自英國,亦係標準球迷一名,一定對希斯堡慘劇印象深刻,亦會留意由英國前內政大臣主理嘅調查報告,佢憶述希斯堡慘劇,表面上係批評學生,心底裡可能曲線鬧緊入校園執勤嘅警務人員。不過,呢封信引起香港利物浦球迷會不滿,馬斐森要道歉收場。

禁書會揭桂民海被擄真相?


雖然市面好難搵到,《習近平與他的情人們》仍有網上版出售。

銅鑼灣書店五子被擄事件,中共一直按住一套穿晒崩嘅劇本解畫,以為逼桂民海上電視認錯,加埋出一張李波同太太團聚嘅相,香港人就會收貨。為咗表達對事件嘅持續關注,獨立評論人協會上週六開咗個禁書讀書會,幾名成員各自挑選「中共禁書」,同其他人分享討論。
召集人呂秉權揀咗一本既敏感又香艷、相信由桂民海執筆嘅《習近平與他的情人們》,其中一章講到六四屠城後,兩個參與學運嘅女學生逃到福建,當時喺福建做嘢嘅習近平親自審問兩人。呢啲情節都未係最誇張,作者寫到呢度更大灑鹽花,話其中一位女生為咗逃走,不惜情挑習近平。
獨評會中人講笑咁話,呢本書咁出位,一定令習近平龍顏大怒,要將桂民海捉返去大陸。究竟現實情況同禁書內容會唔會一樣,由習總親自審問桂民海呢?



獨評會搞禁書讀書會,呂秉權(箭嘴示)分享《習近平與他的情人們》,情節誇張失實,仲大灑鹽花,佢講笑咁話,習總睇完一定好嬲,派人越境捉桂民海返大陸受審。

民政署踢爆  689送暖超然作假

一場半世紀以來最冷嘅寒潮,除咗令香港人可以追冰,仲反映埋香港呢個小城嘅人情冷暖。當政府一邊廂將千億元計公帑做大白象工程,但寒潮之中,就有唔少露宿者要入住避寒中心取暖,就算熱心市民自發想送物資,卻竟然要食「閉門羮」,因為民政署職員會搵警察到場阻止,市民於是要喺門外食住西北風分發物資,想入內探訪嘅人更加難越雷池半步。




689最愛抽水,甚至不惜使出語言偽術,誤導市民以為佢去避寒中心派餅俾入住嘅露宿者。(網上圖片)

不過,早前 689曾經「以身作則」,喺 facebook度高調自爆去咗探訪避寒中心,仲幫中心賣廣告,話避寒中心「有暖氣,亦提供毛氈、床墊、熱水、瓶裝水、杯麵和飯盒」,同時話自己「向避寒市民送上餅乾和暖飲」,咁點解特首做得,市民就唔可以探訪又唔派得物資?唔通因為佢夠超然?
謎底終於解開,多得有線新聞嘅報導,民政署解釋,話原來梁振英只係分發民政署預備嘅物資,即係佢向避寒市民送上嘅餅乾同暖飲,其實入住嘅人本來自己都拎到,根本唔使佢分發,更加唔使佢多此一舉拍醒人去接收。堂堂特首天寒地凍去探訪竟然兩手空空上陣,事後仲要抽水借探訪講繼續起樓,呢份寒意先令大家最打冷震。

撰文:巫不言
插圖:詹震寰

 

    tvb4life 發表在 痞客邦 留言(0) 人氣()