爆壹爆

吳亮星玩殘釣魚友

Ads by Google

早排,叻盡省港澳嘅立法會議員吳亮星,引述朋友短訊話,「五條書局友」坐洗頭艇返大陸叫雞被拉,用來解釋銅鑼灣書店五名成員被失蹤的「滅門案」,「用自己方式返大陸」呢個原因,連見慣江湖無賴嘅爆哥聽完,都幾乎喺床上碌落地。

冇幾耐,就有出海釣魚嘅老友阿發打電話來爆粗,話俾呢個洗頭星累乜死,佢話十幾年前的確有雞蟲喺香港仔碼頭出發、專去伶仃島叫雞嘅洗頭艇,但已經冇咗好多年,可能洗頭星早年有坐過就唔知。依家主要係釣魚友先會約埋出海上大陸,呢類艇通常插上黃旗叫黃旗艇。
阿發仲話,港人到大陸海域釣魚,都有內地發出嘅釣魚證,原則上係可以唔用回鄉證就去到大陸水域,不過規定唔可以上岸,但好多本地釣魚友都會偷偷上岸食飯,但冇鹹濕嘢,完全唔係洗頭星條友亂乜咁講,不但破壞晒釣魚友形象,仲搞到好多釣魚友好麻煩添。因為本來兩邊政府都唔會點嚴查釣魚友,但自從洗頭星無端端亂噏廿四,大陸嗰邊就嚴查呢類活動,搞到麻煩多多,好多人暫時都唔敢跟團出海,佢好㷫咁話:「用吓個腦啦洗頭星,一般黃旗艇係最少十幾人一早約好兼早上出發,李波夜晚失蹤,邊有人夜晚一條友失驚無神有興趣,又潮漲搵到艇出海洗頭㗎傻仔。」




網上有人相約釣魚友出發上大陸,但反應已不如以前熱烈。


香港魚友可以用此證以「自己方式」入大陸。


黃旗艇最少要十幾人包艇才能成行。 西裝友圖書館貼街招溝女

插爆洗頭星,諗諗吓爆哥其實都係一個文化人,於是去圖書館吸收知識,兼向學院妹請教吓英文。去到自修室,竟發現有人仲狼,枱上留下一張字條,寫住「如溫書溫到悶,可 WhatsApp我解悶^^」,仲有聯絡電話添。邊位文青咁老土,竟然用貼街招識女仔咁出位?爆哥好奇下扮女 WhatsApp佢,話咁快對方就回覆,呢位仁兄睇來好心急。佢自稱叫阿 Ben,又問爆哥幾時見到張街招,話冇諗過真係有人覆。爆哥約佢見面,佢即光速話 OK,相約午飯期間喺圖書館見面。

之後一身西裝 look、戴住眼鏡,自稱喺中環做銀行嘅阿 Ben現身。佢見爆哥猛問佢點解,當堂失望又尷尬,佢講因要進修考試搏升職,所以成日去圖書館溫書,好上進喎。爆哥問佢係咪成日靠呢招追女仔,佢即時否認,仲話係第一次,亦冇諗過有人會回覆佢。佢仲自爆失戀,問佢係咪想識學生妹,佢就話:「中環都冇學生妹。」其實佢斯斯文文,要識女仔大把機會,用到呢條橋,真係邊有女睬你呀。




留紙仔等女上釣。


四眼仔在 WhatsApp已展開攻勢。 14K鬍鬚勇 寒冬惡戰


鬍鬚勇一生行走江湖,都以真誠待人,日前有街坊在餐廳野生捕獲他。

香港經歷六十年最寒冷冬天,江湖傳來消息,聽講 14K揸 fit人鬍鬚勇突然入院,江湖人都紛紛為佢情況擔憂,其實佢十年前確診患結腸癌,多年來出入醫院治療,佢一直積極面對,永不言敗,但今次睇嚟情況嚴重,大批江湖兄弟、門生都日夜在病房守候,鬍鬚勇罕有作咗一首悲情詩 WhatsApp送給兄弟,身體雖然虛弱,但鬍鬚勇意志非常堅強,思路仍十分清晰,全詩共十九句,第一句詩用一個字作開頭,其後每一句都多加一個字,作到第十句,之後又每句遞減一個字,全詩工整更呈現三角形,「余此生死而無求,願名天長地久。」可說是鬍鬚勇的心跡,好多人都為之擔心,好彩捱過嚴寒,佢又出院啦。




向江湖好友發出心跡。

鬍鬚勇一生在江湖打滾,卻少與人結怨,深得江湖中人俾面,可以話係香港黑社會活字典,鬍鬚勇曾替大陸傳媒撰寫專欄,所以喺內地甚具知名度,江湖中傳言大陸電視台特登派人採訪他,由佢講述香港近四十年來黑幫變遷和社會舊貌,黑道中人個個都話鬍鬚勇堅•犀利。

爆哥乜料

金融界撈家,穿梭黑白政商界,朋友遍布旺角至中環,每星期都八到
唔同料,同《壹》仔讀者過吓癮!

 

    tvb4life 發表在 痞客邦 留言(0) 人氣()