黃百鳴大爆星爺拍戲秘史

二十四年前的電影《家有囍事》,肯定是港產片中的經典,幾多場面loop過無限次?幾多對白背到滾瓜爛熟?幾多畫面歷久不衰,更獲封網上cap圖王?

Ads by Google

今年賀歲檔期,《家有囍事》將重新上映。舊片新上,除了數碼修復,還加入十分鐘未曝光片段;此外,《家》片的監製兼要角黃百鳴,更親爆拍攝背後,周星馳(星爺)鮮為人知的秘聞逸事!

黃百鳴將二十四年前的《家有囍事》修復兼加長,重新在戲院放映;訪問時,他手舞足蹈地憶述跟周星馳、張國榮及張曼玉等的拍攝點滴。

當年火速在影壇冒起的星爺,黃百鳴形容:「叫佢做乜都得」,好易話為。

星爺當初揀角色時,曾揚言「打死唔做乸型」,但着裙「戲仿」西片《危情十日》搞笑,卻冇say no。

想夥拍曼玉

原本的《家有囍事》是沒有周星馳(星爺)份兒的,三兄弟角色分別敲定為林子祥、黃百鳴和張國榮(哥哥)。可是,電影開拍前,林子祥在三藩市的寓所發生火警,他未能趕返港演出,黃百鳴惟有臨急抱佛腳找星爺頂上。

黃百鳴憶述:「搵星仔嗰時,佢開好高嘅片酬,急於用人都照畀佢,仲同佢講明錢可以畀,但係三兄弟之中花心細佬個角色唔揀得。星仔係想同張曼玉(Maggie)做對手嘅,唔使問梗係想同靚女做對手啦;但之前已經畀劇本張國榮睇咗,哥哥OK咗(花心細佬個角色)!」黃百鳴任由星爺在餘下兩兄弟中揀一角,當時星爺聲言「打死唔做乸型」,惟有選做不忠丈夫一角。

後來,哥哥約黃百鳴見面傾戲,坐低劈頭一句說:「百鳴,你唔好同我爭,我睇完劇本,我要做cam cam哋嗰個。」而且,哥哥更指明,Tomboy對手要由毛舜筠來演,肯定好睇。黃百鳴覺得張國榮選角是計過度過,但此舉竟誤打誤撞,成全了星爺的心願,能夠跟張曼玉做拍檔。

網上流傳星爺對Maggie有好感,更有追求之意,黃百鳴斬釘截鐵的說:「咁我冇聽過喎,就算追都係拍戲嗰時追,拍完戲Maggie肯定唔睬佢!」

星爺和張曼玉戲中的一幕親熱場面,「巴黎鐵塔反轉再反轉」無論名堂和姿勢,都成為港產片中的經典。

撐珍妹入屋

影壇盛傳,星爺難服侍,黃百鳴眼中卻不是這回事,還力讚對方說:「嗰時佢好好o架,叫佢做乜都得,同埋好跟劇本做。」其實,星爺也曾就一、兩場戲提出個人意見,當中最神來之筆便是Maggie撞破他和李麗珍(珍妹)偷食一場,

黃百鳴娓娓道來:「原本話星仔同珍妹踩到番梘跌落花園,撞正Maggie經過,三人會合偷食就穿煲;但星仔話可以加料,跌落樓嘅過程加。最後大家都應該記得,嗰段戲星仔跌落去見到Maggie就喺下面,擰轉頭又見珍妹喺上面,心諗唔掂嘞,於是雙掌一撐,將珍妹撐番上間屋度,出嚟真係幾好笑,而且得星仔一個諗到,喺跌落樓咁短促嘅時間,都可以玩到啲嘢。」

當年的星爺跟足劇本做戲之餘,也會提供不少好橋,最神一場是講他跟珍妹偷情,雙雙跌落樓時怕撞上Maggie,星爺惟有用雙掌撐珍妹返上屋,但又大力過龍,珍妹由樓梯碌番落樓。

    全站熱搜

    tvb4life 發表在 痞客邦 留言(0) 人氣()