專題 Log In

猴年激炒!趨吉避凶通勝

Ads by Google

羊年臨近尾聲,上星期忽然嚟一個超級寒流,搞到香港結冰又落冰粒,連天文台都話預計唔到,可見未雨綢繆嘅重要性!
所以今年《搵車快線》繼續為大家準備歲駕通勝,預測來年有關駕車、踩車嘅運程,為大家喺猴年出車做足準備!而且今年兩大神算蘇民峰同麥玲玲,不約而同指出猴年必多車禍,各車迷為保出入平安,梗要睇定來年歲駕運程!

蘇師傅以五行推算屬金車款今年最好賣,即係圓渾車身兼係金、白、銀顏色,兼齒音嘅牌子 Citroen、 Honda、 Hyundai、 Hummer最好賣,好似白色 Honda Civic Type R就冇得輸($586,880)!其次就係屬水嘅車款,即係波浪形加黑、藍、灰顏色車身,兼用唇音讀音嘅牌子如 BMW、 M-Benz、 MINI、 Ferrari、 Maserati、 Peugeot、 Porsche、 VW。

蘇民峰:金木交戰之年 必多車禍

「今年百分之一百肯定多交通意外,因為猴年屬於 4撞車年。乜嘢係 4撞車年呢?原來每逢蛇年、猴年、豬年、虎年就係 4個容易發生交通意外嘅年份,仲要今年嘅立春八字叫「金木交戰」,指明刀傷車禍特別多!而且根據以往經驗唔一定係揸車撞,上一次撞車年就全世界多處撞火車,做乘客一樣有危機!至於單車都屬於交通一部分,踩單車時亦要留意!特別喺農曆 1月、 7月交通意外月,無論揸車、踩車定係坐車都要更加小心!」

《蘇民峰寒、平、熱命人揀車顏色指南》
蘇師傅話如果想化解,唔理咩生肖,都可以依熱、寒、平命格去選擇車身顏色,再按生肖所屬嘅五行,揀相剋嘅五行屬性車廠牌子同車牌號碼,就可以將危機減至最低。







麥玲玲:驛馬相沖 交通易外多


所有擋災催運飾物,都可以掛喺倒後鏡,放喺中控台櫃桶一樣 ok!

「丙申猴年,最大嘅危機就係多交通意外。因為立春八字中嘅年柱地支「申」同月柱地支「寅」形成「寅申沖」,即係驛馬相沖!除咗民生治安較差,交通事故都特別多同嚴重。而且無論海、陸、空交通,來年都一樣多意外,而意外除咗壞車之外,亦要小心交通工具系統失靈,所以無論屬乜嘢生肖都好,來年駕駛者同乘客都要小心!」



玲玲師傅話丙申猴年嘅地支屬金,白色車較旺。不過今年易有交通意外,最好揀架四平八穩、安全性高啲嘅車款,好似 Lexus嘅新 RX 200t四驅 SUV($649,000),大大架、視野又好,揸出街自然信心大增,做司機、做乘客都更加安全放心!




男裝全黑曜石串手鏈$788( a)

《黑曜石擋災劫》
猴年咁多交通意外,玲玲師傅就建議大家可以喺車上或隨身攜帶一啲擋煞法寶,其中以黑曜石最百搭,咩生肖都用得。因為黑曜石屬於天然火山琉璃之一,暗藏龐大嘅辟邪化煞能量,可以驅趕負能量同保護自己嘅氣場,具備僻邪化煞之效,任何人佩戴都可以逢凶化吉。

12生肖揀車攻略

每年各生肖運程都會大洗牌,呢個 12生肖揀車攻略,就係集合咗 2大玄學神算對丙申猴年各生肖駕駛運程嘅總集,兩位師傅更會針對 12生肖車迷提供 tips,揀咩車、點趨吉避凶都清楚晒!




Honda Civic Type-R即使用棍波原來都難唔到蘇師傅,拉利棍波佢都揸過㗎!


SUV四驅車夠大多穩陣,玲玲師傅表示最安全。 高危 No.1 炒車【猴】

蘇民峰:
屬猴本命年犯太歲,代表變動特別多,至於變化好與壞就要再仔細睇命格,未必一面倒係負面改變。不過今年受到凶星「劍峰」、「伏屍」影響,容易受金屬所傷,所以揸車、坐車都比較高危。而且肖猴今年吉星全無,又有「指背」影響人際關,容易引起悲觀情緒,發得白日夢多揸車自然容易撞車,撞咗自己都唔知呀!農曆 1月、 7月都係撞車高危月,尤其 7月最易瀨嘢!
五行屬性:屬金剋木
屬木數字: 3、 8、 E、 J、 S、 Z
合適牌子: Jaguar、 Suzuki、 Subaru、 smart

麥玲玲:
除受凶星「劍峰」、「伏屍」影響,揸車、坐車都易有意外,另有「伏屍」會影響家人健康,出車前記得校好冷氣溫度,以免家人著涼。不過屬猴幸有「歲駕」、「文昌」、「天廚」等吉星幫助,代表事業、學業都有唔錯發展,應酬多,當然最好有架體面靚車出入啦!不過要記住如果揸車應酬就絕對不能醉駕!除咗犯法、仲累己累人!
當旺顏色:紅色
催運車飾:龍形、鼠形飾物



車款推介  Jaguar XE Prestige
屬木嘅 Jaguar XE Prestige,鋁合金車架喺歐洲撞擊測試達 5星標準,仲拎埋 2015 Euro Ncap Best in Class Rating獎項,加上 50:50前後重量分佈同大量安全設備,集優良操控、安全硬淨於一身!



肖猴如意掛飾$248( a)

高危 No.2 破財【虎】

蘇民峰:
今年沖太歲嘅虎,容易發生感情、事業、住屋嘅變化,換車嘅機會都幾高!吉星有「驛馬」即多外出工幹,但揸車就要小心多顆凶星!先有易發生大破財嘅「大耗」,仲有易受金屬所傷嘅「血刃」,即使有「月空」、「天解」、「解神」等吉星逢凶化吉,但都要小心因撞車而破財。
五行屬性:屬木剋土
屬土數字: 0、 5、 A、 I、 K、 N、 Q、 U、 Y
合適牌子: Alfa Romeo、 Aston Martin、 Audi、 Infiniti、 Kia、 Nissan

麥玲玲:
肖虎今年除沖太歲同有「大耗」、「血刃」外,亦都要留意「歲破」容易得罪權貴而破財,尤其小心意外撞到貴車,加上仲有「驛馬」多揸車外出就更要小心。另外受「欄杆」影響,做事一波三折,揸車同買賣車都特別多阻滯。但有「天降」減低凶星力量,情況都唔算太嚴重。
當旺顏色:藍色
催運車飾:狗形、馬形飾物



車款推介  Infiniti QX80
最安全嘅屬土車款,非 Infiniti QX80莫屬!屬土嘅肌肉線條,加上巨無霸級嘅身形,所有道路使用者都一定留意到你,加埋超多安全系統,大吉利是炒車都唔會傷到自己。



肖虎隨身手繩$288( a)

高危 No.3 官非【馬】

蘇民峰:
肖馬今年有「八座」吉星,容易升職,而今年屬於驛馬年有更多機會外出走動。不過受凶星「囚獄」影響,除咗多是非,外出揸車嘅碰撞機會都大,雖然冇損傷星唔會有大損傷,不過容易收告票同要上法庭之類,揸車就要嚴守交通規則嘞!
五行屬性:屬火剋金
屬金數字: 4、 9、 C、 G、 H、 X
合適牌子: Citroen、 Honda、 Hyundai、 Hummer

麥玲玲:
合太歲嘅馬仔,今年會較多麻煩瑣碎事,加上並無任何吉星,即使可以接收對宮肖鼠嘅事業權力吉星力量,不過力量只得 3成,但有好過冇。另外,受凶星「羊刃」同「天狗」影響,容易思想偏激同有小意外發生,仲有可能會破相同開刀做手術,無論揸車定做乘客都要留意。
當旺顏色:白色
催運車飾:羊形飾物



車款推介  Honda S660
屬金牌子唔多選擇,而且屬金外形最好小而靈巧、圓渾最好, Honda K跑 S660就完全配對,兩座位加開蓬揸出街有型之外, K-Car偈亦夠慳油,走動多都唔怕油費貴!



Alpacasso掛飾$49( d)

平安 No.1 財運【鼠】

蘇民峰:
肖鼠今年屬財運年,加上「金匱」幫助,眾生肖中最好!仲有「將星」、「三台」等提升地位同權力,係時侯換架靚車慶祝!不過有「五鬼」多小人,當旺都唔好太張揚惹事非,而且「飛符」、「官符」、「年符」 3粒凶星,會有突如其來嘅官非!不過 15、 16年多屬小是小非,最多都係收吓「牛肉乾」,唔使太擔心。
五行屬性:屬水剋火
屬火數字: 2、 7、 D、 L、 R、 T
合適牌子: Daihatsu、 Lamborghini、 Land Rover、 Lexus、 Lotus、 Renault、 Toyota

麥玲玲:
過去兩年肖鼠運程反覆,但因為猴、鼠、龍相合,事業、財運都有提升。除咗「將星」、「三台」,玲玲師傅更批多一粒「唐符」權力吉星,事業同財運都非常樂觀,只需留意官非有關嘅小破財就冇問題,馬路之上最安全!
當旺顏色:墨綠色
催運車飾:牛形飾物



車款推介  Lamborghini Huracan LP 580-2
既然財運係眾生肖之首,揀屬火嘅牌子而又有屬火嘅尖角外形,當然首推今年林寶細牛 Huracan新增嘅尾驅版 LP 580-2,不過小心超速畀人扣分。



牛形公仔$280( e)

平安 No.2 晦氣【雞】

蘇民峰:
得到吉星「太陽」相助,除咗易有男貴人,事業會有唔錯發展。肖雞仲有「咸池」帶嚟霧水桃花;另桃花亦可以代表人緣佳,所以不妨揀架小車仔,坐近啲就自然再 friend啲啦!駕駛方面,肖雞今年被「晦氣」影響,容易空歡喜一場而影響心情,揸車時心情應放鬆,而且需要加倍集中。
五行屬性:屬金剋木
屬木數字: 3、 8、 E、 J、 S、 Z
合適牌子: Jaguar、 Suzuki、 Subaru、 Smart

麥玲玲:
除咗「太陽」、「咸池」,吉星仲有「天乙」、「天空」同「唐符」幫助,除咗易有男貴人,肖雞者事業會有唔錯發展潛質,從事創作行業嘅更必定多靈感!玲玲師傅同樣叫肖雞車友小心被容易空歡喜一場嘅「晦氣」影響心情,揸車乜都唔好諗,專注路面!
當旺顏色:橙紅色
催運車飾:龍形飾物



車款推介  Suzuki Hustler
屬木外形宜四方,屬木兼盒形嘅 Suzuki Hustler就絕對啱晒!雖然車仔細細,不過就五臟俱全,而且總共有 11隻色揀,無論你係平、熱、寒邊種命格,都實揀啱色!



龍形匙扣$90( c)

平安 No.3 貴人【兔】

蘇民峰:
今年肖兔太歲暗合,加上有「紫微」、「龍德」貴人星,再有「玉堂」相助,「暴敗」、「天厄」等凶星都影響唔到佢,今年絕對係貴人年!識做嘅,不妨考慮入手舒適車款,接載今年將會出現嘅貴人出入。
五行屬性:屬木剋土
屬土數字: 0、 5、 A、 I、 K、 N、 Q、 U、 Y
合適牌子: Alfa Romeo、 Aston Martin、 Audi、 Infiniti、 Kia、 Nissan

麥玲玲:
同樣預測為貴人主道嘅一年,不過就要小心代表言多必失嘅「暴敗」,容易出現「三更窮、五更富」嘅情況。另外,仲要小心「破碎」、「天厄」,會有小意外嘅機會,出門小心啲就可以。
當旺顏色:金色
催運車飾:狗形飾物



車款推介  Audi Q7
屬土嘅 Audi Q7,第二代更科幻,而且依然大大架,車廂空間有增無減, 7個座位都非常闊落,加上車上大量豪華設備,就算同時有 6位貴人要上車都受得起!



Snoopy冷氣風口香精$75/對( b)

喊包【狗】

蘇民峰:
雖然肖狗今年冇吉星,不過今年為暗合年,有潛在助力,多為工作上伙伴,如客戶、上司等,有架靚車出入自然吸引人幫你。不過,去年腸胃病會延至今年農曆 6月,呢段時間出車前都要小心身體健康;另外,仲要小心「天哭」容易因小事大哭一場,唔開心就要冷靜一吓先好揸車喇!
五行屬性:屬土剋水
屬水數字: 1、 6、 B、 F、 M、 P、 V、 W
合適牌子: BMW、 M-Benz、 Ferrari、 Marserati、 Peugeot、 Porsche、 VW

麥玲玲:
肖狗冇吉星幫助,而且有多顆凶星影響,如對家中長輩健康有影響嘅「喪門」,揸車要多留意長輩上落車;仲有容易遇上小驚嚇嘅「天哭」,揸車時可能有突如其來嘅事情導至交通意外,所以駕駛要格外留神。
當旺顏色:桃紅色
催運車飾:兔形飾物



車款推介  Marserati Ghibli
Marserati入門型號 Ghibli,波浪線條絕對配合屬水嘅波浪要求!另外 Ghibli雖為入門,但其乘坐級數已經係頂級之作,見人都夠晒體面,而且空間都算寬敞,載長輩都冇投訴!



Melody冷氣風口香精$65( b)

是非【豬】

蘇民峰:
肖豬今年屬太歲相害,加上「天官符」嘅是非星,容易招惹是非,喺道路上要多加忍讓!不過,好彩有吉星「地解」逢凶化吉,所以都只會係小事小非,加上有「太陰」女貴人出現,女同事無論係上司定下屬,都有機會幫到你!
五行屬性:屬水剋火
屬火數字: 2、 7、 D、 L、 R、 T
合適牌子: Daihatsu、 Lamborghini、 Land Rover、 Lexus、 Lotus、 Renault、 Toyota

麥玲玲:
雖然係「害太歲」,但肖豬今年除有「太陰」女貴人外,仲有「玉堂」令個人才華得以發揮,無論事業、正財家偏財都有唔錯收鑊。不過,受「六害」、「亡神」、「貫索」同「孤辰」影響,人際關係同家宅運易受衝擊,而且多口舌是非。
當旺顏色:紫色
催運車飾:羊形、兔形飾物



車款推介  Lexus RX
屬火尖角到爆炸嘅 RX,無論外形、舒適、設備都頂呱呱,女貴人見到一定印象深刻!而且 SUV車身夠高大外,更有擋風玻璃投射表板,可以多留意路面唔怕分神。



肖豬隨身手繩$288( a)

買車【牛】

蘇民峰:
肖牛去年受沖太歲嘅變動影響,會延至今年立秋先完。而凶星方面要小心「死符」帶來小疾病,「陰煞」則要提防小女人出現,另有「小耗」小破財,如果有心儀愛車都可以考慮入手應咗佢!而且吉星有逢凶化吉嘅「月德」、旺人緣桃花嘅「天喜」,仲有利地位提升嘅「扳鞍」,不妨多外出應酬,製造桃花或事業發展。
五行屬性:屬土剋水
屬水數字: 1、 6、 B、 F、 M、 P、 V、 W
合適牌子: BMW、 M-Benz、 Ferrari、 Marserati、 Peugeot、 Porsche、 VW

麥玲玲:
肖牛除咗「月德」、「天喜」,更有「國印」提升事業,從事文書工作或創作就更加有利!不過受凶星「死符」影響,需要特別關心長輩健康,尤其男性長輩要特別關心。另「扳鞍」則好懷參半,有機會轉工,但未必係好事,所以要小心考慮。
當旺顏色:粉紅色
催運車飾:鼠形飾物



車款推介  BMW 7-Series
地位提升當然要揀架高級行政房車!屬水嘅 BMW全新 7系,增加咗大量高科技設備,載朋友肯定覺得多嘢玩。



Minnie香精座$68( b)

孤獨【龍】

蘇民峰:
肖龍今年屬暗合年,容易有貴人暗中扶你一把,但要小心提防去年嘅腸胃不佳,要到年中先至有好轉。今年吉星全無,凶星則有「華蓋」,心情經常自覺孤獨、悶悶不樂,宜相約朋友傾計談心;但如果從事創作藝術嘅朋友,反而有正面嘅作用。
五行屬性:屬土剋水
屬水數字: 1、 6、 B、 F、 M、 P、 V、 W
合適牌子: BMW、 M-Benz、 Ferrari、 Marserati、 Peugeot、 Porsche、 VW

麥玲玲:
龍同猴各地支形成「申辰令」,兩生肖相合,令肖龍者有暢順發展,尤其同肖猴、肖鼠者最旺!其「華蓋」星同蘇師傅解釋相同,但受「黃幡」影響,工作上會有壓力,而且亦較多機會受傷,另「白虎」亦都像徵損傷,尤其動物咬傷或金屬損傷,駕駛者要小心有輕微血光之災!
當旺顏色:綠色
催運車飾:雞形飾物



車款推介  VW Touareg
心情孤獨,當然要外出散下心,屬水嘅 VW Touareg啱啱 facelift,擁有強勁四驅系統同升降避震,無論出入城市定係野外爬山都一樣應付得到,加上可載 7個人,一班朋友出車自然打開心窗啦!



翠兒頭枕套$38( b)

卷舌【蛇】

蘇民峰:
屬蛇今年屬太歲刑、合年好壞參半,得到 4顆貴人星「貴人」、「歲合」、「福德」、「福星」幫助,易得貴人相助嘅同時,亦有「劫煞」因朋友而小破財同「卷舌」嘅口舌之爭,好似借車畀朋友揸就盡量避免嘞!好彩有「天德」逢凶化吉,可以減少別人報服心。
五行屬性:屬火剋金
屬金數字: 4、 9、 C、 G、 H、 X
合適牌子: Citroen、 Honda、 Hyundai、 Hummer

麥玲玲:
「刑」、「合」、「破」太歲令肖蛇者今年非常複雜,不過有「福星」、「八座」等吉星令到心情愉快。此外仲有「祿勛」代表錢財有進帳,財運都 ok。不過就要小心「披麻」影響個人同長輩嘅健康,宜多做善事同攝太歲保平安。
當旺顏色:黃色
催運車飾:雞形、牛形飾物



車款推介  Honda Vezel
肖蛇多口舌之爭,而且運程複雜,屬金嘅 Honda Vezel,將 SUV同 Coupe二合為一嘅線條,就好似肖蛇者要將好與壞二合一,一樣可以完美合體!



肖蛇如意掛飾$248( a)

桃花【羊】

蘇民峰:
羊年犯太歲會延至西曆 8月 7日,不過肖羊今年重桃花,除咗「陌越」助地位提升外,「紅鶯」更令人緣大增,單身人士亦都有著落,有伴侶者感情會更好!不過凶星有「病符」小疾病,除咗腸胃,仲要好好管理自己情緒。
五行屬性:屬土剋水
屬水數字: 1、 6、 B、 F、 M、 P、 V、 W
合適牌子: BMW、 M-Benz、 Ferrari、 Marserati、 Peugeot、 Porsche、 VW

麥玲玲:
肖羊擺脫犯太歲重新出發,有「紅鶯」桃花帶旺人緣,不過要小心「寡宿」入主,容易走向孤獨,所以宜多啲搵朋友遊車河傾訴,但有伴侶就要小心桃花以免出現「牆外桃花」。
當旺顏色:棗紅色
催運車飾:馬形飾物



車款推介  M-AMG C63 S
屬水嘅 M-AMG C63 S,夠體面又高性能,無論自己遊車河、載朋友定載另一半都完全滿足晒,不過唯一要小心自己情緒,因為好影易踩深油門超速㗎!



Monchhichi馬形公仔$220( e)

蘇民峰:顏色唔啱可擺陣

如果𠵱家先發覺架車隻顏色唔夾,都唔使搞到要換車、噴油咁大陣仗,蘇師傅話其實仲有方法可以化解!「如果車身顏色唔啱,簡單啲其實喺車廂加啲相合顏色嘅嘢已經有唔錯效果,好似加椅套、換地毯之類。如果都係唔安心,仲可以用顏色紙同女皇頭五毫子喺車上擺陣!」



熱命人買錯色可以用 1個女皇頭五毫子夾喺 2張黑咭中間;加 6個女皇頭五毫子成十字形,用 2張白色咭紙夾住,放喺司機位凳低。



寒命人買錯色,就可以用 3個女皇頭五毫子排成直線,用 2張綠咭夾實;再加 9個女皇頭五毫子砌成兩個菱形,再用 2張紅色咭夾實,同樣放司機位凳低就可以化解。

麥玲玲:路路平安太歲掛

各生肖一般都可以放相合生肖擺設互相增運,呢個為之「六合」。但 4個犯太歲生肖猴、虎、豬、蛇就有啲唔同,因為犯太歲自身難保,做唔到互助功效,唯有改以「三合」用 2個生肖嘅力量幫助犯太歲嗰個生肖,前文為猴、虎、豬、蛇提供嘅催運飾物就係嘞!另外,玲玲師特別為犯太歲車友整咗個有終極化解能力嘅運吉祥物「路路平安太歲車掛」!呢款掛飾上嘅木牌刻上丙申猴年當值掌管流年禍福嘅太歲星君—管仲大將軍,犯太歲同流年健康運比較差嘅生肖就最啱使,掛喺倒後鏡就 ok!




路路平安太歲車掛$368( a)


「三合」生肖掛飾,使用相合兩種生肖,幫助犯太歲生肖逢凶化吉。 四輪、二輪行大運

踏入新一年,指定動作當然係行大運啦!究竟兩大神算會指點大家去邊同幾時出發呢?𠵱家話你知!



初一行大運有利方位



蘇民峰:
今年大年初一( 8/2)行大運最好,因為年初一為「更新日」,係屬金嘅日子,最有利出發時間為上午 7:00至下午 3:00之內。而行大運方法,可以以屋企為中心,出門口之後依照當旺方向進發就可以,以香港境內為限就 ok,唔係行得愈遠就愈旺㗎!
吉凶方位方面,可以留意右邊方位,主要唔好去東北就 ok,因為東北為大病位,宜避之則吉。



麥玲玲:
玲玲師傅都一樣推介年初一行大運,最佳出發時間為丑時(上午 1:00-上午 2:00)、卯時(上午 5:00-上午 7:00)、辰時(上午 7:00-上午 9:00)、已時(上午 9:00-上午 11:00),方法都係向當旺方向行。
當旺方向方面,玲玲師傅就較為簡單,正東就係當日財位,西南就有「貴神」助貴人運。不過當日未有文昌同桃花位,但就可以喺屋企東南位放水種植物或色彩鮮艷嘅花,效果會比行大運更加好。另外,行大運當日切記勿到西面同西北,因為西邊有「五鬼」、西北有「死門」星,會多是非同影響健康。

行東、西南包冇衰

綜合兩大神算,年初一都係行大運最佳日子,雖然兩位師傅提供嘅行大運方位有少少出入,但就不約而同咁指出東面係財位、西南方係貴人位,行呢兩個方位包冇衰!《搵車快線》就推介埋兩條揸車、踩車都啱行嘅路線畀大家!



【西南貴人】揸入大嶼山•踩入迪欣湖
如果向西南進發,又踩得單車,相信非大嶼山欣澳莫屬!入到欣澳有個幾大嘅時租停車場,泊低車仲可拎埋架單車踩入迪欣湖,如果冇單車,其實喺海邊坐吓睇風景已經好正!



【正東財位】揸車入北潭涌•踩車入海下
以荃灣為中心,香港最東面非西貢區莫屬,如果想今年財運亨通,可以考慮揸車入北潭涌郊遊吓,呼吸埋新鮮空氣,人都醒啲!如果係單車迷,你仲可以帶埋單車,經閘口踩入黃石碼頭或者海下灣,今年一定發!



欣澳

查詢:
a.吉慶堂( http://www.jiqingtang.hk 
b. AES( 2391 0370)
c. Zense& Co.( 2771 2733)
d. Greenly 1( 2384 3288)
e. Funny Place( 2781 0795)

撰文:黃德禹
攝影:葉偉豪
汽車提供: Reliance Motors Ltd.( 2380 2231)、皇冠汽車( 2820 4020)
單車提供: Bike Depot( 2719 9820)

    全站熱搜

    tvb4life 發表在 痞客邦 留言(0) 人氣()