新車激試

慳家 7人選  Toyota Sienta Hybrid

Ads by Google

經過近 20年嘅洗腦及長測, hybrid混能系統總算成為車主嘅慳油指標,而 Toyota嘅 hybrid大軍亦都遍佈多個車系,等唔同層面用家都有多個選擇。不過香港市場芝麻咁細,實在好難要代理引入所有 hybrid車款,所以一直喺香港流行嘅 7人車,現時就只得 Alphard Hybrid同 Prius V,車價郁吓都過 40萬,實在非一般小康家庭用家可負擔。
喺強烈訴求之下,代理終於引入最新一代 Sienta Hybrid!喺原有周身賣點、小家庭至愛嘅 Sienta加埋 hyrbid系統,即係又實用又慳家,最重要係車價$248,920起,似乎真係好無敵!究竟有幾慳?就搵埋目前最慳家嘅 Prius C同佢一齊做個超過 100km嘅耗油測試,睇吓啱唔啱慳家算爆用家。

其實 Sienta只係推出咗唔夠半年,唔少新車都只係啱啱交到客人手上,從漸多新車行街就知。現時 Sienta最平版本賣$209,300,同 Hybrid版只差$39,620,相信令好多新車主眼紅,後悔咁早買咗汽油版 Sienta。 Hybrid版 Sienta又唔單只改咗動力系統,連帶外表細微之處都有分別。







藍色為記

有別於 Prius, Sienta Hybrid係建基於汽油版型號上,如果好似 Lexus嘅 hybrid車咁只改下車身型號章,霎眼真係分唔到。藍色係 Toyota hybrid系統嘅代表顏色,以往所有 hybrid版本都換上藍色車章,包圍基本上冇改動,今次 Sienta Hybrid一反常態,雖然車身包圍同汽油版完全一樣,但代表性藍色大幅擴散。點擴散法?仲記唔記得 Sienta個好似面譜一樣嘅車頭設計?由頭、尾燈伸延出嚟嘅黑色配件、倒後鏡殼及車側裝飾,全改為藍色,配合純白色車身,實在同早前好似京劇面譜嘅汽油版有唔同觀感,筆者覺得有 Maserati feel。
對比同場嘅 Prius C, Sienta Hybrid嘅原創性當然有所不及,因為 Prius C只有單一 hybrid型號,車身設計以 hybrid系統為依歸,車頭同擋風玻璃成一斜度,風阻更低,有助慳油。




原本唔係咁討好嘅車頭設計,換咗配色之後即時好樣咗!


尾燈伸延至泵把嘅藍色配件實在搶眼,襯埋白色車身更出位。


倒後鏡殼成個變藍,而且內置指揮燈。


尾輪沙板位前方呢一大塊配件原為黑色,轉為藍色好睇啲!


進行超過 100km長測前,先喺錦田油站同時入滿油。


Sienta Hybrid嘅充電池剛好收喺前座同中排地台底,地台完全唔使升高,亦唔影響座椅變化。 表板翻新

由 Sienta變成 Sienta Hybird,老早估到可以見到嘅改變唔會多,而事實上 Sienta Hybrid嘅車廂空間及座椅改動係零,抵讚!點解冇改動都要讚?全因以往嘅 hybrid系統電池組合多數收入車底,而 Sienta地台特低,而且第 3排座位仲可以潛入中排底,實在冇乜空間再收藏電池。點知廠方可以巧妙將電池組合收喺前排與中排間嘅地台底,聯同中排底特扁油缸,根本對空間零影響!仲唔抵讚?就算係 Prius C,後排座墊都唔可翻起成平坦空間啦!







車廂著車掣都改為藍色,連印字都由「 ENGINE」改為「 POWER」。


Prius V嘅跳字速度計表板更加簡單,冇 Sienta Hybrid嘅出力計,但 hybrid運作圖像真啲。


後排可以完美潛入中排底,得出平坦尾箱,係 Sienta一大賣點。

空間雖不變, Sienta Hybrid嘅轉變只有駕駛者先發覺,表板除去引擎轉數表,改為 hybrid系統出力表,指針指向唔同區域時,指針中心圈都會變色,藍色代表充電、青及綠色代表唔同階段慳油、冇晒燈就係最耗油,亦係最大出力。此外,表板中央位置嘅顯示屏都加入 hybrid系統運作圖。




後排空間當然唔可以同大 size 7人車比較,男士們坐落剛剛好,但舒適性一般。


中排唔單只可以調校背部角度,更可以前後滑動。


前座有活動式手枕及高度調校,舒適性唔錯。


Sienta Hybird駕駛艙同汽油版完全一樣,所有方便設備都得以保留。


Prius C嘅中控台自成一格,冇其他車共用零件,原創性高!


Sienta Hybrid簡化咗嘅 hybrid系統運作圖再冇部模擬車仔圖案,但反而更加清晰。 不同油耗

汽油版 Sienta採用 1,496c.c.引擎, Hybrid版唔係求其加個摩打了事,係換上 Prius C嘅 1,497c.c.引擎加摩打,系統總馬力比 Prius C少 1匹,剛好 100匹。究竟同一台引擎配喺唔同車身上有冇好大耗油分別?我哋專程為兩車安排一次路程超過 100km嘅耗油實試,先喺錦田加德士油站入滿油,再激劈上全港最高嘅大帽山出荃灣,經青衣入機場,最後再原路折返。路況集合油門全開嘅山路、 60km/h均速嘅市郊路,仲有全港最高限速 110km/h嘅公路。此外,今次測試耗油兩車都喺同一條件下進行,如全程 D波、一車載兩人及用 22.5度恆溫冷氣。




兩車唔只用同一個動力系統,引擎艙佈局亦相同,但高身啲嘅 Sienta Hybrid(上)剩番多啲空間。





表板中央顯示屏嘅耗油統計版面,都加入咗電量同 EV純電動行走距離數據。


Sienta改為 hybrid版後再冇停車自動熄匙掣,反而多咗 ECO、 EV全電動模式掣,同電動行車發聲提示掣。


CVT波箱都係冇變,但就冇咗 S波催谷高轉,只可以用 B波拖波同提高動能回收效果。


由元朗出發,去完機場返番元朗,測試距離約 110km,用咗近 4小時。

結果 Sienta Hybrid行咗 109.1km,入油費$118.8,即$1.09/km; Prius C行咗 113.4km,入油費$92.7,即$0.82/km。兩車有$0.27/km差距,相信只有一個原因,就係車重! Sienta Hybrid車重達 1,380kg,而 Prius C只有 1,120kg, 260kg差距相等於 4個成年男士重量呀!所以 Sienta Hybrid已經盡咗力,再者以一部 7人車做到接近$1.0/km已經好叻仔。




出入機場以 110km/h巡航,兩車表現性能差唔多,但 Prius V車廂明顯靜啲。


上大帽山時 Prius V起碼比 Sienta Hybrid輕鬆 20%以上,劈彎車身亦冇咁側。


以錦田加德士油站為起點及終點,全程超過 100km。


Sienta Hybrid全程行咗 109.1km,油表只跌咗一格。


Prius C用咗一格油,行得比 Sienta Hybrid多少少,有 113.4km。


如果以測試當日$13.94/L油價計算, Sienta Hybrid(左)同 Prius C耗油有$0.27/km差距。

撰文:袁國基
攝影:葉偉豪

 

    文章標籤

    Toyota Sienta Hybrid

    全站熱搜

    tvb4life 發表在 痞客邦 留言(0) 人氣()