老師雖然唔想人再提,但佢當年喺《玉郎漫畫》內專欄《太公報》度嗰啲二次創作笑話,真心經典!

A.C.G.U.

二次創作始祖 甘小文:我唔驚網絡 23條!

Ads by Google

拉布失守,網絡 23條二讀通過,離正式實施又近一大步,網民人人自危,擔心以後冇得玩二次創作,上 facebook出 post都會俾人拉!
之但係睇番 30幾年前,仲未有「二次創作」、「惡搞」等 term嗰陣,甘小文已經喺《玉郎漫畫》攞身邊所有事物嚟「玩」,創作出一個個經典笑話。作為二次創作始祖,小文老師超過 10年冇推出個人漫畫作品,卻喺𠵱家網絡 23條殺到嚟之際,再度推出新作《大神們的武林》,繼續抽時事水,喂,唔驚俾人告咩?點知佢話:「網絡 23條對我冇影響!」小文老師,係勁嘅!

上大陸拉老翻咩


老師雖然唔想人再提,但佢當年喺《玉郎漫畫》內專欄《太公報》度嗰啲二次創作笑話,真心經典!

黃玉郎「忘記」咗佢當年出過本勁經典嘅二次創作刊物《玉郎漫畫》,今日力撐網絡 23條,話係維護業界利益。小文老師都係版權持有人喎,首先請佢利申,點睇網絡 23條?怕唔怕新書俾人擺上網任人睇呀?
點知老師竟然直豎姆指大嗌一聲:「 Good!」咁豁達,係咪真心㗎?「唓,之前我上大陸啲活動,諗住冇人會識我,但又唔係喎,有人搵我簽名㗎!佢哋點識我啫?咪又係睇咗網上老翻漫畫!其實老翻都係一種宣傳!」但係老翻影響你收入喎?「啲老翻全部喺大陸,唔通網絡 23條通過咗,可以搵國際刑警上大陸拉人咩!條條例都搵嚟搞嘅!」

上帝先係一次創作

𠵱家啲人不停拗何為「二次創作」?其實玩咗 30幾年嘅小文老師又點睇?佢話:「呢個世界根本冇一次創作!創作本身就要從其他嘢取材,只有上帝先係做一次創作!上次啲示威者得問啱㗎,『金鐘罩』問邊個攞版權呀?唔通問達摩咩!呢啲直頭係五、六、七、八次創作啦!」
老師自己唔會用網絡 23條去維權,但係新書都有諷刺政治成分,點解唔驚有人搞佢呢?「好多人以為我會用番《太公報》嗰套惡搞方式去畫新書,其實我好怕人再提《太公報》,都咁耐歷史啦,仲提嚟做乜!今次好多嘢都係我自己作嘅,好似再講『少林寺』會 out,所以我改咗名做『方丈寺』。」原來新書有好多係原創成分,唔怪得老師唔驚網絡 23條啦!老師仲話新書故仔寓意就係要講「破舊立新」,不論對而家個社會定漫畫圈都有借古諷今嘅隱喻,「仲用舊嗰套模式去創作,唔掂喎!」




新作畫風同內容不離小文老師嘅搞笑本色,仲抽埋唔少時事水,古代人都講「堅離地」!


書中都有出現金鐘罩等武功,小文老師話唔怕俾人告侵權之餘,亦都唔怕 out,「睇吓你點玩呢啲武功㗎啫!」


為免過氣,小文老師不停因應時事修改內容同畫面,好似中間個「驢寵物」就係成幅畫畫完先加上去,唔怪得頭兩期書籌備咗兩年幾。


小文老師玩嘢地將角色造型畫到好似粵語長片人物,營造出老套感覺去搞笑。時事抽水內容就唔會講到太白,讀者要諗一諗先會明。 

多年前老師仲惡搞過本刊前身《壹本便利》而推出《一本大便》,當年若有網絡 23條,政府可以跳過本刊去代表本刊告老師,咁就唔會有咁啜核嘅書名喇!



小文老師新作《大神們的武林》玩借古諷今,故仔講武林中突然出現一個練成科學化神功嘅狂魔「屠狗輩」,輕易打敗晒各大門派嘅舊式武學,於是武林中人齊齊諗計對付佢。作品屬於精裝漫畫,預計 7至 8期完,每本賣$48,第 1期已於 2月 1日發售,第 2期暫定 3月出版。

撰文:陳兆奇
部分攝影:傅新發

    全站熱搜

    tvb4life 發表在 痞客邦 留言(0) 人氣()