Major

使乜買!日租 gadget去旅行

Ads by Google

仲有唔夠一個禮拜就過年, plan好晒假期外遊行程嘅你,肯肯定未出發先興奮!已開始執行李的話,總會發覺行程仲爭一啲嘢先至完美,就係好多裝備想帶去外國,但你又冇朋友又冇,想借都冇得借, sosad!買嘅話,一年只係用一兩次,真心唔抵!咁點線好?租咪得囉!其實市面有唔少鋪頭專做旅行裝備出租生意,租到嘅已經唔只 WiFi蛋,就連相機、專業拍攝器材,甚至行李箱都有得租,畀少少日租就有全套裝備出埠,毋慮即決啦!去旅行,租到盡!

【入門篇】 A.上山下水 四防 DC

喺香港就算潛到落水都冇乜嘢好影,但係去到布吉、沙巴、馬爾代夫、澳洲大堡礁等,潛水唔影相不如唔好潛!單靠 GoPro同防水殼潛水影相,相質未必能令大家滿意,最好租多部防水 DC,例如 Olympus TG-3,租 3日只需畀$220。佢有 1,600萬像素、 f2.0大光圈鏡頭同 4倍 zoom,喺一般水底環境影到唔錯相片。而且佢除咗 15米防水功能,仲有 2.1米防震、 100kg防壓同-10度防寒能力,帶佢爬山同滑雪都啱使。( b)

B.多人較抵  WiFi蛋

雖然𠵱家唔少國家嘅上網 SIM咭愈賣愈 cheap,比起逐日計租金嘅 WiFi蛋更平,之但係若然一家大細或同成班朋友多人去旅行嘅話,用 WiFi蛋反而會抵啲。而且各人部手機唔使換 SIM又唔使 set,可以 keep住自己個 no.同香港溝通,始終方便好多。今次推介嘅租蛋公司 CRAZYEGG,更加喺機場有門市,唔使旅行前後仆去市區分店租蛋還蛋,慳番啲腳骨力同時間,不過記住出發前上網預約咗先喎!( a)

C.極限拍攝  GoPro

去到外國,大把機會玩降傘、滑翔傘、森林滑翔、 Bungy Jump等香港玩唔到嘅玩意,呢啲時候唔影相實在嘥料!要影相或拍片嘅話,最好梗係用 GoPro啦!但係平極都兩千幾蚊一部,買嚟一年用兩三次好唔抵,好彩𠵱家都有得租,仲要係新款 HERO4,每日租金都只係$65,即使租埋各類固定配件,都只係每日畀多十幾廿蚊,幾抵!( a)



熱門地區每日租金

租賃 tips

1.通常租賃公司都會給予旅行日期前後各一日免租寬限期,畀顧客去門市攞機同還機(去 CRAZYEGG機場分店租 WiFi蛋除外)。
2.租用各類器材都要畀按金,但多數可用 hold信用咭信用額方式繳付,唔使現兜兜畀 cash。
3.租器材時要仔細檢查(尤其係相機同鏡頭鏡片),必要時可於離開前影低花痕作證,免得還器材時拗數。
4.請記住旅行保險唔包唔係你買、冇單嘅物件,所以啲器材有咩損毀或失竊,都要你硬食賠按金畀租賃公司, claim唔到保險,小心啲!

【進階篇】 A.夜攝必備 腳架

最高難度嘅旅行相係影咩?不外乎影日出、日落、夜景同星空,而呢啲進階旅行相係點樣鍊成?就係靠一支腳架!你冇?咪又去租囉!拍攝器材租賃公司 b3camera有 Manfrotto專業三腳架畀大家租,保證夠晒穩陣去承托專業單反,影沙龍靠晒佢!租金由$70至$80起跳,租 3日大約要$170至$200,其後每日$40至$50。( b)

B.旅行龍友 單反

對旅行相質素有追求嘅遊客,當然唔會用手機或 DC仔影相,甚至連平日用開嗰部輕便無反都嫌唔夠班,咁就要租部專業單反去旅行喇! b3camera提供 Canon 5D Mark III、 Nikon D800等高階機款選擇,不論用開 C社定 N社,都會租到啱用嘅機。雖然首日租金都要$380,租 3日就要$960(其後每日$180),但總好過畀萬幾蚊買部機返屋企長擺啦!( b)

C.因景更換 鏡頭

租得單反,梗要租埋鏡頭!一支天涯鏡唔夠用的話,咪豪啲租多幾支囉!市面啲租賃公司多數有勁多鏡款畀人揀,長炮、廣角、大光圈鏡頭應有盡有,無論去到外國想影乜靚景都冇問題。而最平 zoom鏡 3日租金只係$200,就算 EF 70-200mm f2.8L IS II(小白兔)等大光圈長炮, 3日租金都係$550啫,唔算貴!( b)

D.保護器材 行李箱

租晒一堆專業拍攝器材,單計呢方面,你嘅行李總值已可能超過 10萬,冇理由再用屋企個軟皮爛喼去存放佢哋,又或者你個細喼根本擺唔晒咁多器材,所以最好租埋行李箱。專門出租行李箱嘅 Rent-a-Suitcase,有唔同牌子、尺寸同設計嘅行李箱畀人揀,就算係 Rimowa箱,每日租金都只係$45至$88,若然唔係成日去旅行,真係租好過買!( c)

自己買充電 gadget吧!

帶咁多 gadget去旅行,但酒店房可能只有一兩個插蘇頭,邊叉到咁多部機?所以𠵱家出遊已唔少得帶埋 USB分插充電器或拖板。不過呢啲器材一來未有得租,二來本身都唔貴,三來喺屋企都用得着,一於自己買個啦,唔使煩!



一開四  Philips DLK50340B
電源線一開四嘅 USB充電器,每個 USB插頭最高能有 2.1A輸出,同時叉 4部手機 tablet都夠快,同房兩個人啱啱夠用。$269( d)



USB拖板  Targus SmartSurge APS10AP
拖板上面唔只配備 4個三腳插,更加有兩個 2.4A輸出嘅 USB插頭,幫單反、電腦叉電嘅同時,亦能夠快速叉埋手機同 tablet。$219( e)

查詢:
( a) CRAZYEGG( http://www.crazyegg.com.hk 
( b) b3camera( http://www.b3camera.com 
( c) Rent-a-Suitcase( http://www.rentasuitcasehk.com 
( d) Century Field( 3188 4983)
( e) Good Century( 3619 6500)

撰文:陳兆奇
攝影:傅新發

    全站熱搜

    tvb4life 發表在 痞客邦 留言(0) 人氣()