Catherine(左一)每月舉辦 1、 2次品茶會,名額 12至 16人,每人每次收費$380,「客人可以喺茶會試到 6種茶,有普洱、雲抹、紅茶等。我亦會分享中國茶可以點配搭食物,畀客人試下將茶同芝士或餅乾等西式食物一齊飲,改變佢哋覺得飲茶就要食中式糕餅嘅諗法,多啲新鮮感。」

創業通

90後開茶舍教品茶

Ads by Google

茶仙陸羽在 21歲時決心寫《茶經》,花了超過四分一世紀,才完成世界上第一本研究茶的書籍,可見茶是一門藝術,博大精深。 90後的 Catherine雖自幼在英國留學,但受從事普洱茶葉買賣的母親啟發,對中國茶藝產生興趣,為了向年輕人介紹品茶之樂,故 13年成立「瑜茶舍」經營茶葉生意。
她先在馬會設立專櫃,並向中菜館供應茶葉,吸納高消費的品茶愛好者成為熟客;近月再在工廈設立茶舍,舉辦品茶會,成功吸引平日愛上 cafe喝下午茶的年輕人成為茶友,在茶室細味品茶之雅趣。




茶舍的裝修和家具都由 Catherine親自設計,「我揀咗淺木色嘅家具及柔和嘅燈光,希望畀人溫暖嘅感覺。」

「普洱適合配搭較鹹膩嘅食物,如羊奶芝士;紅茶就最啱配搭甜食,呢個係我哋自家造嘅紅茶餅,都幾夾。」品茶會是 Catherine為吸引年輕客人所設計的活動,除了教授簡單的泡茶技巧外,亦向客人解釋不同中國茶的食物配搭,形式如同品酒會,深受二十多歲的年輕女士歡迎。
15年 10月, 90後的 Catherine在火炭工廈開設了「瑜茶舍」,茶舍就如 cafe一樣,客人可來歎茶及品嘗點心,每人平均消費約$150。「客人仲可以喺店內選購我哋出品嘅茶葉及茶具,最受歡迎係雲南普洱,亦有台灣烏龍出售,每款茶餅由 5、 6百至近萬元不等。平日客人多數係消費能力較高嘅茶葉愛好者,假日就多年輕男女,當嚟飲下午茶。」

到雲南茶山愛上茶

興趣可自小培養出來, Catherine對普洱茶的興趣是受媽媽的薰陶,「媽媽從事收藏級普洱茶買賣,會到雲南嘅茶園搜羅貨源。我自細喺英國讀書,佢想多啲親子時間,一到假期就會帶埋我一齊去睇茶。大學畢業前,我同媽媽去過 4、 5次雲南,參加過邦威古茶樹嘅祭典,當地人成日話:『茶山係祖先留畀我哋用之不盡嘅財富,要好好繼承』。我聽得多,對普洱茶產生好奇,自己開始睇有關中國茶嘅書。」
後來 Catherine讀到《中國茶寮》一書,萌生了經營茶葉生意的念頭,「書中提及可可、咖啡、茶都係有悠久嘅飲用歷史,但𠵱家前兩者喺香港都比茶盛行,源於中國嘅茶愈嚟愈少年輕人接觸,我覺得好可惜,所以想自己成立一個茶葉品牌,將品茶文化推擴至年輕層面。」

與家人合資創業

13年中, Catherine從英國畢業回港,着手建立茶葉品牌,「普洱茶嘅成本高,靚嘅茶后易武每公斤可以過萬,但我資本有限,要先同家人合資成立一個新嘅茶葉品牌『瑜茶舍』,目標客人係高收入嘅茶葉愛好者。當時我一邊以設計為正職,一邊學習經營茶葉生意。」
因家人愛茗茶, Catherine自中學便跟隨母親學習中國茶藝,懂得泡茶的技巧,「家人做茶葉批發,認識中菜食肆嘅負責人,有次香港賽馬會貴賓廂搞咗個中國文化嘅活動,需要人示範沖泡普洱,中菜廳嘅負責人介紹我去幫手。佢哋見我當日泡茶有板有眼,手藝唔錯,就邀請我做茶藝顧問,教佢哋員工泡茶嘅技巧,幫餐廳 set up一個即場泡茶嘅工作區。」




普洱茶適合配搭鹹膩的食物, Catherine就在品茶會上配搭羊奶芝士,中西合璧。羊奶芝士配普洱茶$130


Catherine邀請會製作甜點的朋友,用其品牌的紅茶造成餅乾,作配搭紅茶的甜點。紅茶餅配雲南紅茶$130


「瑜茶舍」推出了適合年輕茶友的新茶葉產品,分量較少,避免喝不完難收藏,而價錢亦較相宜。陳皮普洱茶$80至$200 飲茶學泡茶

Catherine亦善用當茶藝顧問的機會,推廣「瑜茶舍」,「中菜廳後嚟引入咗我哋嘅普洱茶,熟客飲過都向經理查詢茶葉嘅貨源;賽馬會見 V.I.P.對茶葉反應好,就開始向我哋購買茶葉,當積分禮物畀 V.I.P.換購。最後更邀請我去公眾區設立銷售專櫃,出售『瑜茶舍』嘅產品;我放假亦會去睇鋪,同客人傾偈,儲多啲熟客,專櫃每月約做 2萬蚊生意。」另外, Catherine同時為 4間中菜館提供茶藝諮詢服務,包括米芝蓮 3星餐廳的廚魔,「我哋仲向佢哋供應茶葉。」




Catherine指年輕茶友去傳統茶室會感到壓力,「光顧傳統茶室嘅都係較年長嘅客人,店內嘅老師傅見後生仔入到去,佢會覺得你唔似係買茶葉,未必會主動招待。加上喺傳統茶室試茶,十之八九會買,後生仔試完唔啱想走,會好大壓力。呢度似 cafe,叫一壺試吓,唔適合下次可以再嚟試第二款。」


「瑜茶舍」在沙田馬會設有銷售處, Catherine表示:「節日生意會特別好,客人會買茶葉禮盒作送禮之用。」


生普(未經完全發酵的茶葉)如同紅酒,存放愈久,價值愈高, Catherine表示:「有啲客收藏普洱當投資,茶葉一擺就收藏咗幾十年。」賀年古樹普洱茶餅$600/357g 賽馬會設專櫃

15年 6月, Catherine因賽馬會熟客經常問門市地址,令她開始物色地方,並辭去工作,全職經營茶舍,「當時搵鋪位,睇過黃竹坑及火炭,前者嘅單位面積太大,好多超過 2,000呎,租金要$35,000。最終喺火炭搵到呢個近 700呎嘅單位,月租$10,000,價錢合理之餘又近我住沙田;加上火炭近年有好多年輕人開藝術工作室及 cafe,呢區假日感覺悠閒,配合茶舍嘅閑適氣氛。」

為了向年輕人推擴品茶文化, Catherine在茶舍加入新元素,「後生仔覺得飲茶唔夠飲咖啡時尚,我就將茶舍設計到日式 cafe嘅風格,茶具亦選用景德鎮年輕 artist嘅瓷器,一嚟瓷器冇紫砂茶壺咁老土,二嚟成本低啲, 5百蚊都可以買個茶壺返去泡茶,年輕人較易負擔。同時,我亦會喺茶舍教客人最簡易嘅泡茶技巧,只要茶壺加茶杯, 5分鐘就有茶飲,唔需要繁鎖工具,一啲都唔麻煩。」
為了令中國茶可以打入年輕人市場, Catherine正在籌備網店,「設立網店可方便年輕人買茶;我亦搜羅緊貨源,將會推出一條價格相宜嘅副線,好似剛推出嘅陳皮普洱,一粒可以泡 4至 5次,每盒價錢由$80至$200不等,啱年輕茶友預算。」




Catherine因母親是普洱茶的愛好者,自小接觸中國茶,「其實最初去雲南茶山有啲抗拒,因為山路崎嶇,又怕有高原反應。但𠵱家都慣咗去茶山嘅旅程,上到茶園,風景好靚,亦可體驗小數民族純樸嘅民風。」


Catherine會去內地四出搜羅精緻的茶具,「江浙一帶有唔少美術學生或年輕瓷器工匠喺星期日搞 market,出售自己手製嘅瓷器,我會喺市集上選購茶具,多數揀人手上色嘅瓷器。」瓷器製作人會在茶具底部提字,大部分是手寫,所以每個提字都略有不同。


茶舍選用瓷器作茶具,客人若然遇上心儀款式,可以買回家。景德鎮瓷器$860

facebook@yú teahouse瑜茶舍
http://www.yuteahouse.com 



Vinci(客人):
我同幾個女仔朋友一齊參加 Catherine嘅品茶會,學到泡茶技巧之餘,亦學識中國茶要點樣配搭食物,輕鬆度過一個下午。



Kyle(客人):
年輕人飲中國茶,多數諗起茶樓。呢間茶舍可以改變你對中國茶嘅偏見,可以食住精緻嘅蛋糕飲雲南紅茶,加上環境悠閒寧靜,非常舒服。

《開業成本》
裝修:$80,000
租金(兩按一上):$30,000
入貨:$10,000
總投資:$120,000

《每月開支》
營業額:$100,000
租金:$23,000
人工:$95,000(老闆+ 2位兼職老闆)
入貨:$5,000
雜費:$3,000
盈利:$62.000

撰文:杜曉婷
攝影:楊程(部分圖片由被訪者提供)

 

    tvb4life 發表在 痞客邦 留言(0) 人氣()