林橙表示各國家所出的硬幣有樹木、人物、珍禽異獸等圖案,十分適合變成素材,製成吊墜、袖口鈕及耳環等有特色的飾物。

青雲路

港版鋼之煉金術師 把銀仔變飾物

Ads by Google

1元、 2元、 5元…硬幣上的數字,是它表面所代表的價值,其實擁有不同形狀及圖案的硬幣,有自己不同的故事,這正是發揮創意的好素材。 80後的林橙成立 Orannie Coinart,教授別人利用硬幣的圖案,製作戒指、吊墜、袖口鈕及耳環等飾物,把生硬的金屬化為創意有心意的設計品,把每個人的故事刻在小小的硬幣上。

「每個國家硬幣都有佢哋嘅設計或背後故事,透過硬幣可以從另一個角度去認識一個國家,好似德國會用鷹、意大利會用但丁、達文西等代表事物出硬幣;有英女皇頭像即係呢個地方曾被英國統治過,但印度冇出過女皇頭嘅硬幣,原來印度獨立前,英女皇伊利莎伯二世都未出現,而硬幣當中嘅花卉、樹木、人物、珍禽異獸甚至海洋生物等圖案,其實好適合做藝術創作嘅素材。」




目前林橙家中有近 6,000個,約有 3、 4百款的硬幣收藏,「有啲自己去旅行收集,另外朋友出遊用剩啲硬幣都會畀我。」


位於非洲的索馬利蘭(Somaliland)推出過 12星座硬幣,受不少愛好星座的女士歡迎。 硬幣說故事

每個硬幣有其歷史,上來製作的學員也有自己的故事,把林橙吸引在其中,「試過有位男士計劃喺土耳其向未婚妻求婚,想搵個土耳其硬幣整成戒指,但我手上冇,要去 ebay訂,好在喺去之前都送到嚟;亦有一位客人,拎咗個過世親人生前送畀佢嘅硬幣上嚟整鏈墜,想常常掛念佢。教班可以聽到唔同嘅故事,識到唔同嘅人,係我鍾意𠵱家工作嘅原因。」
教書般的長氣,開班教授製作硬幣飾物的手作人林橙,原來真是老師出身。 05年,林橙畢業於香港教育學院設計與科技系,他喜愛嘗試新事物及探索世界,轉工及旅遊便成了他的生活主調,「喺中學教咗 1年書後,做過政府工、寶石貿易、金融投資、電工,唔想喺一個地方困死,咩都想試吓;自己另一個興趣係旅行,試過用 1年時間去西藏、巴基斯坦、塞爾維亞、西班牙、巴西、澳洲等地方。」




除吊飾外,林橙還可將硬幣製成袖口鈕。


林橙表示用動物圖案的硬幣製成吊墜是不錯的選擇,圖中的吊墜是用福克蘭群島的企鵝硬幣製成。 美國旅遊得啟發

在一次旅行過程中,令林橙對硬幣產生興趣,更於 14年 7月成立 Orannie Coinart,把家中一角變成工作室,開班教授製作硬幣飾物,「喺美國旅行做沙發客時,見到男屋主整緊隻硬幣戒指用嚟追女仔,呢個係我第一次接觸硬幣製作,覺得好有趣,仲請教埋點整,之後返嚟香港對呢種手藝念念不忘,自己識木工,咁去旅行又會有硬幣剩底,自己就不時玩吓,之後諗不如開班教人整,做個手作人都唔錯。」
為了開班教學,林橙事前作了不少資料搜集及嘗試,「硬幣製造材料有黃銅、白銅、鋁、鎳及鋼等金屬,每個金屬嘅延性及韌性都會唔同,自己要上網搵資料了解每款硬幣嘅成分,好似美金一仙,係銅和鋅合金,一燒就熔會造唔到戒指;另外要不斷實驗,整戒指要用鎚將硬幣打彎,咁用幾多力,打幾多下要再燒軟佢先可以再打?都打裂咗唔少硬幣先摸到個心得。」
Orannie Coinart沒有成品售賣,林橙只開班教授學生親手製作硬幣飾物,每班$450,現時每月約有 40班,月賺約 2萬,「課程包材料及工具,一班 3小時,當中有 1小時係畀啲學員揀硬幣,學員可以喺我收藏中挑選,亦可自攜硬幣,我啲硬幣大部分係自己或朋友去旅行時收集,目前近 6,000個,約有 3、 4百款。」




近來較多人製作硬幣吊墜,一些動物、幾何圖案十分受歡迎。


在硬幣上可以看到當地的風俗文化,如庫克群島(Cook Islands)就把敬拜的海神及盛水的容器作為硬幣圖案,而少見的硬幣形狀亦受到學員的喜愛。 圖案配飾物

林橙會教授學員利用硬幣的圖案及形狀,製作不同的飾物,「嚟整嘅人大多有自己嘅想法,想要咩地方、動物或建築等,我就會搵對應嘅 coin,另外都會畀意見佢哋參考,好似鏈墜、手鏈用動物圖案比較靚。硬幣唔係畫畫,有一定限制,好似長頸鹿、老虎及音符等圖案,出嘅國家唔多,尤其貓好多人要,但主要得馬其頓嘅流通貸幣用貓,未必滿足到客人嘅要求。」
製作硬幣飾物是金工的一種,但林橙表示製作過程簡單,上來參加的學員 9成是女仔。「最初只有戒指班,有學員提出想整其他飾物,於是慢慢推出吊墜、袖口鈕及耳環等飾物,可能係手作仔嘅關係,平日主要吸引女仔上嚟學,多數係用嚟做禮物;去到情人節前夕,會多咗好多男仔上嚟。雖然要用到火槍、鎚等工具,但唔需要用好多力,打磨時女仔會比較細心,反而會比男仔整得靚。」




林橙把家中的一角變為工作坊,用以教授學員製作硬幣飾物。


熱愛旅行的林橙,常常周遊列國,所以收集到不同地方的硬幣。圖中是他到秘魯時所攝。 

Vivian(客人):
覺得一個硬幣就咁睇好似好普通,但親手整硬幣飾物出嚟好有意思,之前去過巴基斯坦,好鍾意呢個地方,於是用巴基斯坦硬幣整咗過吊墜畀自己及朋友。

硬幣戒指自作業

 




1.選擇合心水的硬幣後,用火槍將硬幣燒至通紅,再浸到水中。


2.趁硬幣剛剛降溫,內部仍呈燒軟狀態時,用鎚子在中央鑿孔。


3.將硬幣捶打變彎,再套入打戒指的專用鐵棒上,將硬幣中央的孔撐大。


4.調至適當尺碼後,用機器把戒指壓至平整。


5.進行打磨及拋光。


完成 後記︰去旅行真好

環繞了地球一個圈的林橙,背着一個背包就可以出發,看着他在不同地方拍攝的風景及講述當地的風土人情,又學了一門手藝回來,勾起了記者去旅行的衝動,在這一刻開始,要積極完成過年前所累積的稿件,我要放假啊!

香港硬幣唔整得

據香港《硬幣條例》,沒有明確表示破壞硬幣是屬於違法行為,而陸偉雄大律師指出只要破壞正在香港流通的貨幣便會觸犯香港法例,如把香港硬幣製成飾物機會受到指控,「如果係唔再流通嘅貨幣就可以用嚟創作之用,好似 1仙咁,用嚟整飾物就冇問題。」

點入行?

製作硬幣飾物包含金工及設計的技巧,林橙表示可報讀坊間一些珠寶設計課程學習基本技巧,「坊間有唔少機構會教切割及處理金屬嘅方法,而工藝上嘅技巧就要慢慢磨練,另外網上都可以自學到唔少知識,好似美國麻省理工嘅網站 ocw.mit.edu,上面有唔少短片教化學及金工嘅知識,有興趣可以喺上面學吓嘢。」

課程︰珠寶設計及科技技術員證書課程
機構︰卓越培訓發展中心
對象︰年滿 15歲
費用︰$15,260
時間︰ 540小時
內容︰工業繪圖、基本設計原理、首飾繪圖、物料知識及工場實習等。
查詢︰ http://www.proact.edu.hk 

撰文:曾志恒
攝影:傅新發(部分圖片由被訪者提供)

 

    tvb4life 發表在 痞客邦 留言(0) 人氣()