專題 Log In

深入和牛、松葉蟹產地 京都近郊自駕遊攻略

Ads by Google

因為怕輻射,近 4年關西已經差唔多取代東京成為遊日首選。不過關西遠不及東京咁多新搞作,去得 3、 5、 7次大阪、京都、神戶已經行到爛!如果你仍然滿足於去黑門市場同旅行團迫食海鮮、搭成個鐘頭車去神戶排隊食塊牛排,筆者無話可說。不過我哋揸車嘅當然會選擇自駕遊,逃離遊客同發掘新景點。上年已經同大家介紹過大阪南下和歌山縣紀伊半島睇櫻花嘅自駕遊路線,今年農曆年就再推介大阪北上玩京都近郊嘅滋賀、丹後地區,車程約 570km, 4日 3夜已經可以簡單遊一轉,冬天去仲特別多嘢玩!

【 Day 1】滋賀 琵琶湖畔食和牛

其實京都近郊有大把適合自駕遊嘅好地方,好似東面嘅滋賀縣就有全日本第一大湖琵琶湖, 670.33km2面積有超過半個香港咁大!從大阪出發揸 1粒鐘車就到湖嘅南端大津市,沿途仲會經過萬博紀念公園上個月 19號先開幕嘅全日本最大商場 lalaport EXPOCITY,就算唔喺大阪停留都夠你 shopping!建議路線係沿住湖嘅西邊行 1個鐘左右欣賞湖畔風光,咁就到達高島市滑雪同食和牛嘞!

滋賀縣琵琶湖觀光網址: http://www.biwako-visitors.jp/ 

Check Point 1:湖畔好風光

圍住琵琶湖嘅滋賀縣分 5個主要地區,但其實唔太多嘢玩,主要都睇吓風景,沿途停幾個公園已經可以從唔同角度睇湖畔靚景。從大阪出發時先喺導航輸入「矢橋帰帆島公園」電話,就可以到達南端湖邊,再輸入「大津湖岸なぎさ公園」電話,就可以行埋跨湖嘅琵琶湖大橋過湖嘅西岸。不過沿湖西北上去高島市嘅途中就有必到景點「白鬚神社」,因為呢度個海中鳥居就係琵琶湖嘅地標,梗係要落車影相、打卡啦!




從大阪去滋賀縣一落高速就係大津市,行多 5分鐘就去到湖邊。


喺湖嘅唔同角度睇,都有唔同風景,有啲位置更加一望無際。


去到白鬚神社內有免費泊車位,海中鳥居就係地標。

白鬚神社
地址:〒 520-1122滋賀縣高島市鵜川 215
電話:+81 74-036-1555
大津湖岸なぎさ公園
地址:〒 520-0042滋賀縣大津市島の関地先
電話:+81 77-527-1555
矢橋帰帆島公園
地址:〒 525-0066滋賀縣草津市矢橋町字帰帆 2108
電話:+81 77-567-1969

Check Point 2:初心者滑雪體驗

雖則話近年日本大雪,但喺大阪要見到雪嘅機會都極渺茫,滋賀縣落雪嘅時間亦唔多,不過冬天去就可以上雪山滑雪!從高島市中心揸 20分鐘車就可以到達箱館山滑雪場,呢度出晒名係入門級滑雪勝地,¥ 4,500就租到全套雪撬架生,仲有大量導師,教學收費一人¥ 7,000一小時,多一個學員都係加¥ 1,000,基本上一粒鐘已可學識基本滑行,兩個人使一千蚊鬆啲就可以學滑雪同玩足一日!唔夠羌滑亦唔緊要,場中有好多小斜台畀小朋友玩滑雪兜同砌雪人,而且上落雪山嘅纜車可以飽覽琵琶湖靚景,大人細路都啱玩。




關西北部走一圈約行 570km, 4日 3夜都玩得晒。


滑雪場有 3條唔同難度滑雪道,¥ 4,800纜車劵已包埋坐吊車上山頂。


一對一教學¥ 7,000一個鐘,就算教練唔識英文,身體語言都教得你明。


場中有多個小雪丘,專畀小朋友玩,唔玩 ski都可以租雪兜滑吓。


坐纜車上山時會見到積雪愈高愈多,望番落去仲可以睇到大半個湖。

箱館山スキー場
地址:〒 520-1655滋賀縣高島市今津町日置前
電話:+81 74-022-2477
網址: http://www.hakodateyama.com/index.html 
收費:停車場¥ 1,000/日、纜車劵¥ 4,800

Check Point 3:牧場即食近江牛

去日本只係識食神戶牛實在太膚淺喇!因為日本黑毛和牛品種繁多,就喺關西已經有同神戶牛齊名嘅松阪牛同近江牛。而琵琶湖西北面就正正係近江牛嘅產地,喺高島市揸 20分鐘車更加可以直踩飼養近江牛 no.1嘅宝牧場!一駛入去已經可以見到牛棚,再揸入停車場旁嘅精肉.宝亭更加可以喺牧場內即食最新鮮嘅近江牛!自選 3種部位拼盤仲要平到¥ 2,800,而且近江牛脂肪比例同油香媲美神戶牛,肉味更過之而無不及,抵過去神戶食多多聲啦!




宝牧場除咗養牛,仲內設宝亭燒肉店,營業至晚上 9點。


一入牧場就會見到一大群乳牛,日頭畀¥ 500仲可以玩雪糕製作體驗。


燒肉店內除可以即食,仲可以外賣新鮮近江牛,部位齊全。


除純種近江牛外,另有近江混種和牛,呢個拼盤平到¥ 4,800!


近江牛每碟 3件,最貴嘅牛舌¥ 2,200(下)、最罕嘅牛股溝肉都係¥ 1,900。

精肉.宝亭
地址:〒 520-1414滋賀縣高島市朽木宮前坊 1033
電話:+81 74-038-3747
網址: http://www.cowcowfarm.com/ 

【 Day 2】丹後 日本三景合時蟹

一般遊客認識嘅京都,都係止於悶爆嘅京都市同宇治市,只係佔整個京都府唔夠 1/6。其實京都府一直北上伸延至日本海,被稱為「海之京都」嘅丹後地區先係日本本土人熱門嘅渡假勝地,不過夏天並唔多人去,大部分都係去滑浪,冬天先係旺季,因為 11月至 3月正正係關西山陰地區松葉蟹嘅盛產季節,成個地區都有最新鮮同最平嘅松葉蟹食!加埋被譽為日本三景嘅天橋立同日本最美麗漁村嘅伊根舟屋群,已有足夠理由要你遠道而來玩兩日。

Check Point 1:日本海軍古倉庫

要去松葉蟹盛產嘅山陰地區,第一個據點就係舞鶴市,從滋賀縣高島市出發去要揸約個半鐘車。一進入舞鶴市就有必到嘅紅磚公園,因為 3座建於 1903年嘅紅磚屋係當時日本海軍嘅兵工廠倉庫, 2012年開始改為博物館,除有舞鶴市嘅歷史展品,仲有大量由古到今嘅日本海軍紀念品賣。最緊要係旁邊仲係現時日本海上自衞隊嘅軍港,可以近距離望到軍艦,星期六、日甚至可入內參觀,軍事迷非去不可!




舞鶴紅磚公園停車場海邊,可以同海上自衞隊軍艦合照,必到!


3個紅磚倉庫除一個賣紀念品外,其他都會定期更換展品。


舞鶴市所有大儀式都會喺度舉行,拍攝當日就係成人禮大日子。


紀念品中最好賣就係海軍咖哩,有多種唔同口味。


有大量印上古今日本海軍艦艇嘅海報、毛巾、襟章獎等,連大和號都有!

舞鶴赤れんがパーク
地址:〒 625-0080京都府舞鶴市字北吸 1039番地の 2
電話:+81 77-366-1096
網址: http://akarenga-park.com/ 

Check Point 2:松葉蟹集散地

睇完日本海上自衞隊嘅架生,諗起釣魚台就慶慶哋,又到午餐時份,一於對日本嘅松葉蟹動武!舞鶴港嘅海鮮市場可以話係最大嘅松葉蟹集散地之一,每年 11月休漁期完結內裡都會變成一片火紅,充斥大量生熟松葉蟹!遊人可以去各海鮮檔揀蟹, king size大蟹都係約¥ 5,000一隻,店舖會免費為你泡製,刺身、白烚定 BBQ悉隨尊便!但千祈唔好睇漏其他海產,因為當地直產鯛魚平到¥ 1,800一條、甘蝦¥ 1,000一箱,食完你唔會再有心機喺香港食日本嘢!




大中小松葉蟹價錢一目了然,另有可作刺身嘅大活蟹約¥ 20,000一隻。


店舖會為客人免費煮蟹,只係要等 10分鐘左右。


場中有 2間餐廳,海膽拼吞拿魚或魚子都係¥ 2,200。


吞拿魚同日本海鯛刺身一樣平到癲,斤幾重咁大條只賣約¥ 2,200。


識食嘅都知清酒配蟹膏係一絕,場內仲有食蟹專用清酒。

道の駅 舞鶴港とれとれセンタ
地址:〒 624-0946京都府舞鶴市浜舞鶴港福井 905
電話:+81 77-375-6125
網址: http://toretore.org/ 

Check Point 3:彎腰褲浪睇天橋

食到爆之後最好散吓步,從舞鶴港海鮮市場揸約半個鐘車就可以去到丹後地區最出名嘅日本三景天橋立,呢度其實係一個由海水沖積而成、橫跨阿蘇灣嘅沙洲,但要領略呢個地方名嘅由來,就必須要搭無遮無擋嘅吊車去山上嘅天橋立 Viewland,因為相傳居高臨下彎腰從褲浪底反轉望落去,就會覺得條沙洲好似條橋從地下伸上天咁,因而得名天橋立。當然睇完未必個個人都 feel到,但 Viewland呢個公園的確景色優美,入面仲有摩天輪、小火車同高空迴廊畀你同情人或小朋友溫馨一番,¥ 850吊車劵同¥ 600泊車費,抵畀啦!




凳仔寫明「股のぞき台」,就係畀你用屁股對住天橋彎底腰倒轉睇。





喺褲浪下倒轉睇天橋立就係咁,你覺唔覺天連地呢?


Viewland山下停車場¥ 600任泊平盡全區,仲係自助入錢落錢箱。


怕凍唔敢坐無遮擋嘅吊車,亦有行路軌嘅電車上落山,但 15分鐘一班。


圓形嘅智慧之輪係天橋立地標,¥ 300買小木碟掟中圈入面,個人就會醒啲。


舊式摩天輪轉得極慢,但可高角度睇天橋立, old school亦更浪漫。


場中有高空路軌單車,¥ 300踩一圈。


電動車夠晒 kawaii,載小朋友最開心。

天橋立 Viewland
地址:〒 626-0001京都府宮津市字文珠
電話:+81 77-222-5304
網址: http://www.viewland.jp/ 

Check Point 4:連島沙洲踩單車

上山睇完景千祈咪急住攞車走,因為天橋立唔只可以遠觀,仲可以褻玩!吊車站行過對面馬路係智恩寺,呢度係市集地區,除咗有手信賣、有海景 café同有快艇或遊船環遊阿蘇灣,仲有單車租可以踩上天橋立沙洲!踩過特色嘅紅色迴旋橋、種滿松樹嘅沙洲,去到對岸嘅籠神社。慢慢踩影埋相,甚至喺沙洲上嘅 café食埋甜品,來回都係約個半鐘左右,咁啲蟹就落晒格啦!




沙洲上面兩旁都種滿松樹,其實冇乜風景,叫做有啲詩意。


智恩寺對出大街有嘢食、有嘢買、有單車租,但停車場收¥ 1,200。


橋立大丸既係手信店同餐廳,亦有單車租,¥ 400租 2小時已夠玩。


智恩寺海旁有特色快艇載人遊阿蘇灣,但 10分鐘收¥ 2,500。


天橋立仲有呢條紅色迴旋橋先接通兩岸,有大船經過就會 90度轉開。

橋立大丸
地址:〒 626-0001京都府宮津市天橋立文殊海岸
電話:+81 77-222-4151
網址: http://www.hashidate-daimaru.co.jp/ 
租單車收費:¥ 400/2小時

【 Day 3】日本海 玩到去兵庫

一日唔會玩得晒丹後,瞓醒 day 3仲有大把地方好去,夜晚更可以踩到過兵庫縣有過千年歷史嘅城崎溫泉添!

Check Point 5:寧靜丹後大澳

被選為全日本最美麗漁村嘅伊根町亦係丹後非去不可嘅景點,因為呢度嘅舟屋群別樹一格,好似大澳咁上層住人、下層泊船,不過伊根町早喺 16世紀已經存在,古舊建築完全保留,而且村中極度寧靜,入到去就好似返咗江戶時代!






舟屋の里公園
地址:〒 626-0424京都府与謝郡伊根町字[!89D0]島 459番地
電話:+81 77-232-0680
網址: http://www.funaya.org/ 

Check Point 6:懸崖山路飛海濱

離開伊根町,就可以向出名踩落去會發出特別響聲嘅嘅海灘琴引浜進發,鐘意揸山路嘅一定要行 178號國道!因為呢段沿海公路依山而建,面向日本海而且圍欄極少,大部分都喺懸崖邊飛馳,《頭文字 D》式彎路全部打機時都見過,嚟到就可以親身感受 G Force!但要留意有唔少野生猴子出沒,千祈咪玩到炒車呀!






琴引浜鳴き砂文化館
地址:〒 629-3112京都府京丹後市網野町掛津 1250番地
電話:+81 77-272-5511
網址: http://www.nakisuna.jp/ 

Check Point 7:土產集中燈飾城

京丹後市除咗蟹靚,仲出名農產品豐富,沿途都有大量賣當地直產生果嘅小攤檔,呢個時節嘅梨同士多啤梨都超當造,求其一檔都正過九龍城超貴生果舖嗰啲!如果對當地其他食材仲都興趣,就可以去西日本最大嘅驛站丹後王国「食のみやこ」,呢度集齊所有本地海產、農產同工藝品。最勁係今年 1月開始全場新增用 80萬粒 LED組成嘅燈光裝飾,每晚 16:30-21:00亮燈,加上人流極少,靚得非常誇張!






丹後王国「食のみやこ」
地址:〒 627-0133京丹後市弥栄町鳥取 123
電話:+81 77-265-4193
網址: https://tango-kingdom.com/ 

Check Point 8:夜遊千年溫泉鄉

其實深入丹後嘅中部,已經非常接近兵庫縣嘅豊岡市,因為店舖通常 6點就收晒,如果夜晚悶,揸 50分鐘車就可以去到有 1,400年歷史、全國聞名嘅溫泉鄉城崎溫泉!特別在沿住楊柳河邊周街啲人都著住浴衣四圍行,因為呢度有 7個外湯,畀¥ 600-800就可以入去浸,每個溫泉各有特色同好意頭,門口仲有印仔畀你吸,遊客都以浸晒儲齊 7個印為目標,溫泉迷唔可以錯過!






城崎溫泉觀光協會
地址:〒 669-6101兵庫縣豊岡市城崎温泉湯島 357-1
電話:+81 79-632-3663
網址: http://www.kinosaki-spa.gr.jp/ 

【 Day 4】豐岡市 雪山之前浸溫泉

既然已經玩到去兵庫縣, Day 4回程當然唔會重覆行回頭路,不過喺城崎溫泉返大阪要成 2個半鐘車程,當然要喺途中搵啲嘢玩。如果琵琶湖個箱館山滑雪場未能滿足玩雪慾望,今次順路就會途經兵庫縣嘅滑雪勝地神鍋高原,呢度冬天長期積雪,一個山頭就有 3個滑雪場,但全屬比賽級嘅中高難度!不過就算唔敢玩,都可以沿途欣賞吓雪景同去神鍋高原道の駅,呢度唔只有齊當地土產同餐廳。最正係旁邊有個神鍋溫泉,畀¥ 600就可以入去雪中沈溫泉!咁餘下返大阪嘅長途車就精神晒啦!




雖然神鍋溫泉細細哋,但唔使 book溫泉旅館就可以試吓落雪浸。


要留神鍋高原道路會有積雪,雖然冇裝雪胎都行到,但緊記要開 snow mode同揸慢啲呀!


其實神鍋高原風景唔算特別,但積咗雪就靚好多,最型係呢個體育館。

道の駅「神鍋高原」
地址:〒 669-5372兵庫縣豊岡市日高町栗栖野 59-13
電話:+81 79-645-1331
網址: http://www.michinoeki-kannabe.com/ 

撰文、攝影:陳致新
車輛提供: Crown Motors(2884 7999)

 

    tvb4life 發表在 痞客邦 留言(0) 人氣()