壹號幹線

我是坤哥!  Suzuki Hustler

Ads by Google

鋤強扶弱的結果往往出乎意料,分分鐘,更會大快人心。
外表毫無殺傷力,扮過棋,試過俾人在節目中大整蠱的坤哥,卻有本事在某頒獎典禮中,奪得「最喜愛歌手」大獎,成件事,好撲朔迷離。
於是,好奇心驅使下,聽了幾首坤哥的歌……
認真講,旋律唔錯,唱功唔差,題材又「堅唔離地」,受歡迎,合情理的。扯得太遠,講番車, K-Car仔一部,擺明冇力冇操控,單靠個樣搵食的 Hustler,其實,好有實力,仲好有內涵,最緊要價錢「堅唔離地」。話唔定,隨時爆大冷!

日本 K-Car條例限制下,全長唔夠 3.4米,用「盒仔式」設計便有利偷盡車廂空間。
外形最為玩嘢,扁嘴扁面、略帶天然呆,有幾分異國短毛貓長相,亦有人認為似 cute版豐田 FJ Cruiser,街道上吸睛能力出奇高,代理更返足 11隻車身色(有 two-tone及單色),無論男女老幼、要姣要萌定要 man,總有一部啱心水。

有增壓,唔掙扎
售價:$149,800
引擎: 658c.c.,直列三汽缸;前置,前輪帶動;渦輪增壓
馬力: 64匹/6000rpm
扭力: 9.7kgm/3000rpm
波箱:無段變速
長/闊/高: 3395mm/1475mm/1665mm
重量: 820kg
耗油量: 27.8km/L(日本國土交通省測計模式)
查詢:香島汽車有限公司
網址: http://www.suzuki.com.hk 

讚一讚:賣萌外形一見傾情;車廂出奇闊落設備又多; 64匹引擎有心有力,裡外都充滿驚喜。
彈一彈:一行快少少,風聲、路噪、機器聲同時「三溝」;純代步型身手,操控有要求者免問。



過往經驗, K-Car引擎通常踩落都係「有聲冇畫」、「得啖笑」,但這台僅得 64匹及 10kgm唔夠的 658c.c.turbo機器仔,居然有好活躍的起步反應,常用速度應用毫不尷尬,順住行踩過百又唔覺好辛苦,表現有心有力,係爭在只得三汽缸,怠速時震動比較明顯囉,唔介意啩?



駕駛感是 Hustler較為弱的一環,操控性、路感、軚感一一欠奉,而且前後都用較窄的 165胎,太高速的話穩定性亦有啲驚,而且風聲、路噪更會隨車速增加而擴大,還是安分守己當代步車吧。



2013年東京車展上亦出現了概念版的 Hustler coupe,斜頂設計極之搞鬼,後門抽亦隱藏於 C柱變成 coupe look,如無意外多會緊接投產,除非唔係。



留意番「對大燈」,竟然是 HID再加 LED日行燈,識得自動着,又識得自動調校高低,再送多你一對霧燈,邊個仲夠膽話平車一定設備差?



為強調 RV(休閒車)化,車內滿布儲物位及杯架,簡單如一塊太陽擋都有鏡有卡片夾, OK,你贏!



Engine-start、停車熄匙、 ESP開關,仲有發熱椅,何謂造車誠意?
恐怕盡在於此了。



中控台一樣玩四四方方設計,部分車廂飾板可跟隨車身色,若日後要拆出來 DIY改其他顏色,其實話都冇咁易。留意冷氣為恒溫式操作,真皮軚盤附設多功能操作,果真是高級 K-Car。



前座係 bench seat設計,兩條「麻甩佬」坐建議翻低手枕劃清楚河漢界會冇咁尷尬;若陪女朋友抑或心儀對象大可「有咁近貼咁近」,有乜用途?你懂的。



前助手席底另有乾坤,收藏了便攜式膠籃,用來去街市買濕貨,一流!另外,最底部藏有另一枚鋰電池,作用是替 S-eNe系統於熄車後提供額外電力,有助降低引擎負荷,變相慳到油。



可簡單地變成「睡床 mode」,用處何在?畫公仔,總不用畫到出腸的……



後排坐姿確實係平車格局,但請睇真空間,在全無 PS下各方面都闊落到暈,日本人的「偷位神技」,真係令人佩服到五體投地。



不設轉數錶,只有簡單的燈光顯示,其實聽聲已可判斷一切,少少聲=常用低轉區域;開始嘈=3000-4000rpm左右;好嘈=近 6000rpm好高轉,還是收油為妙。

買完車,再喪改!

結合 RV元素的 Hustler,設計理念 sell多用途及形象千變萬化,在日本一推出便賣個滿堂紅,平靚正好用固然是成功因素,但其實更厲害絕招是:無限改裝配件 back up,想點改就點改!




代理剛引入的專用帳篷,其實是流動更衣室,每個角位都附設磁石貼,裡面亦有遮掩布,最適合出外景影結婚相或是去沙灘換泳衣。


收摺式單人床褥,較易解決本地土地供應不足問題。

講到改車,最放心當然係「原廠改」。針對 Hustler用途上無限可塑性及「持續發展潛力」,原廠早已準備了幾款針對水上、野外、釣魚、滑雪專用的改裝套件,保證稱身啱睇之外,最吸引是才不過幾萬円一套,買齊都唔覺肉赤。
若套裝唔啱心水,大可以À la carte散叫逐樣執,無論是輪圈、車身拉花、徽章、飾件,以至車廂內的椅套、地毯、燈飾都可以按閣下要求改裝,要打造一部最啱自己口味的 Hustler,實在話都冇咁易。


















撰文:廖宏俊
攝影、攝錄:方保山
mailto:features@nextdigital.com.hk

 

    tvb4life 發表在 痞客邦 留言(0) 人氣()