中環人語

李氏互相觀摩

Ads by Google

自認「冒牌股神」嘅四叔李兆基,○五年成立兆基財經專注「炒股」,高峰期持有股票市值以千億計;近日兆基財經企業旗下子公司兆基財經撤銷在香港註冊,當中有乜玄機呢?

小宗翻查兆基財經向稅局遞交註銷之通知日期,為去年九月十七日,其時大陸官媒狂批李嘉誠「撤資」,什麼「別讓李嘉誠跑了」、「與其挽留,不如目送」等輿論炒作得㷫烚烚;雖然兆基財經企業成立之時已在英屬處女島註冊,只是事有湊巧,四叔偏偏揀呢個時候註銷香港子公司,難免令人諗多咗,同屬龍年的四叔和誠哥,今年八十八歲,兩位大孖沙互相觀摩又有乜出奇?亦都係咁,自從李嘉誠重組長和系之後,市場憧憬下一個到四叔,大家唔見四叔不斷增持恒地( 12)股票咩?分分鐘學長和系倒模重組,將四叔愛股煤氣( 3)嘅價值釋放出嚟!




四叔與誠哥有不少共通之處,同屬龍年,四叔長子李家傑及誠哥次子李澤楷分別都未婚生子;本週日,四叔為孫兒擺百日宴。


四叔在香港註冊的兆基財經,去年九月十七日向稅局撤銷註冊。 金融逍遙客:翻啅「好酒好蔡」五次

游走於中港台併購、私募投資的金融多棲動物,現為多間上市公司主要股東及董事




Signature dish脆皮遼參

近年香港無論在哪個領域,都令人有沉淪的感覺,香港人也漸漸地失去了過往的那份自信。但有一個行業香港仍然獨步全球,呢個行業就係飲食業。逍遙客行勻歐亞非,都搵唔到一個城市可以喺一條街上,食齊中英美法蘇日意嘅餐廳,仲係間間都有咁上下水準。國內朋友對香港至今無一不讚的就是美食,歷史的沉澱養成香港人識飲識食,造成香港飲食業競爭也異常劇烈,能在香港成名的餐廳必有獨特看家本領。
最近城中老饕熱門話題就係岳少間「好酒好蔡」,睇識煮識食的劉健威、牙刁嘴利的蘇施黃寫食評,簡直將廚師蔡昊擺上中菜神壇。究竟有何特別?適逢老友亦係岳少餐廳集團嘅小股東,逍遙客在試菜時已悄悄光顧,又喺短短兩個月間翻啅五次。論裝修硬件,由加拿大名師 Jane Waterous掛畫到小至一盞燈,有鄧爵士把關,一行入去已感覺貴而不俗,亦會知張單唔會平。飲食期間蔡老師(普通酒樓叫廚師,茶餐廳叫廚房佬,堅持被稱老師看來也是另類 brand building策略也)對套餐內每道菜的做法原理一一解釋,上湯浸螺片是如何又高溫又急凍,又如何如何改變分子化學結構,單憑飲過鹹水又有科學知識又識吹水,喺香港中餐界已少見。
對於一生只淥過出前一丁的逍遙客,真係恨自己慧根不足,聽蔡老師的講解好似聽緊喇嘛唸經,只能低頭默默切 signature dish脆皮遼參。嗰碗上湯清香到無與倫比,厚着面皮趁眾人傾聽講解之際,又靜靜叫多咗一碗淨湯。成餐飯從三十六個月鵝頭到鵝肝飯,都有令人耳目一新的感覺。至於煮法是否真正「高大上」,逍遙客就要借用曹仁超嗰句名言「木宰羊」。買岳少家族的股票,近半個世紀以嚟的經驗肯定唔多愉快,但幫襯佢名下餐廳,譽滿天下的 8 1/2、唐人館、鮨魯山及最近摩洛哥名扒房 beef bar,雖然價格五星級,但永遠交足功課,使一千蚊實俾足一千蚊價值嘅嘢,呢點都算唔話得。老友投資多年回報如何?只見佢舉杯微笑:「落少少注做咗十幾個有朵餐廳哎吔股東,有聚腳主場又有飛士,講回報囉,飲杯飲杯!」

中環寸嘴:落盤等於女人揀 bra

工廈大王楊耀松長子,是各大有名食肆之 VIP,喜歡研究城中有錢佬對食之要求,透過美酒佳餚,察看人生百態,讓讀者「嗒」落有味。

嘩!呢兩個禮拜個市好澎湃,收咗市都要落盤(外匯),搞到個人好 high。朝早搞掂晒啲盤先有機會抖抖,去和記大廈試間「馥」,吔吓日本菜,個 set lunch抵食,日本餐之中都夠重分量,係杯餐茶越南咖啡淡身啲,以我哋日理萬機嘅人嫌佢唔夠 watt數囉!
晏晝難得清閒,再殺去太子大廈頂樓 SEVVA歎下午茶,啲友問我 Zero-cost盤點做法喎,咪好似女人揀 push-up bra咁囉,「 Maximize the upward profit& minimize the downside loss」,盡量個 portfolio要堅挺,力抗地心吸力,呢個時候啲股票再唔買下行燕梳,囉吓囉吓好易冇㗎,明知間樓就嚟冧,仲唔買定保險,當係飲少支酒囉。唔好以為可以 buy low sell high,以為股票跌咗落嚟揸住佢死等會上返嚟,好似芝士、紅酒咁漚臭佢咩!咁樣好易連棺材本都縮埋水,到時要去外國買塊背山面海嘅靚地,挖個窿跳落去啦。




坐喺太子大廈頂樓 SEVVA,剛好有陣子陽光,輕鬆吓先,銀行佬打電話嚟都唔得閒睬佢!


呢間日本餐分量,十足麥記 BIG MAC實而不華先企得住!


Set lunch個餐牌同夜晚係兩回事,晏晝先抵食咋。 何東家族多是非

《南華早報》刊登一則通告,以為何東家族有白事,睇真啲又唔係,呢位 Robert Hotung係何鴻章次子何猷源,又叫何源,都仙遊四年;上個禮拜五係佢死忌,其兄長 Michael(何猷浩)特意在報紙刊登通告,向胞弟表達思念之情。何猷源早年懷疑頂唔順何東舜銘與父親何鴻章在美國打官司的壓力,四年前在美國大宅暴斃,五十四歲就英年早逝,不過內部族人又唔係咁睇喎,認為呢張通告是長子何猷浩要展示自己是家族的繼承者,他與兩個細佬何猷彪和何猷豹反晒面;豪門族人兄弟內訌,為乜,仲使講咩。




何鴻章(中)是何東長孫,曾與其子何猷彪(左)及何猷豹(右)對簿公堂,後來冰釋前嫌,但去年底,何鴻章向三子何猷威追討金幣及象牙屏風的官司又開審了。


上週五刊登在《南華早報》的告示,何猷浩 Michael以「兄長」身份表示對胞弟 Robert的思念。

    文章標籤

    中環人語 李氏 互相觀摩

    全站熱搜

    tvb4life 發表在 痞客邦 留言(0) 人氣()