夢雪喺習近平上台前仲主持訪談節目《相約東南》,但習近平做咗習大大之後,懷疑佢已經「被失蹤」。

眾人諸事

銅鑼灣書店事件 第六人被失蹤

Ads by Google

銅鑼灣書店五子失蹤事件,劇情發展愈來愈荒謬,為咗推卸越境擄人嘅責任,「強力部門」真係乜都講得出。五子失蹤原因至今有多個版本流出,例如涉及軍方禁書,亦有人話同習近平嘅情史有關。其中一個牽涉嘅係名叫「夢雪」嘅女主播,記者過去幾星期嘗試搵佢真人出來,意外發現佢都疑似「被失蹤」,自習近平上台後,幾乎再無任何關於「夢雪」嘅新消息。




大陸有唔少報導提起過夢雪,話佢係福建東南衞視製片兼主持人。

近期唔少報導其實都有提過夢雪,都只係話佢係福建東南衞視製片兼主持人,負責一個叫《夢雪時間》(後改名《相約東南》)嘅名人訪談節目,習近平曾經做過福州市市委書記,同一時期夢雪剛好隻身到福建尋求發展,兩人之後有咩故事?書店五子失蹤咗冇人出中共禁書,所以暫時都係個謎。
《相約東南》二○一二年中仍由夢雪主持,但十一月已經換咗趙娜做主持,翌年節目更疑似被腰斬冇埋,夢雪個名亦冇再出現喺電視台網站。習大大一二年十一月中就任黨總書記同軍委主席,究竟係有人大權在握所以要洗底定事有湊巧呢?

小英造勢大會 專影香港靚女

台灣上星期舉行總統同立法委員選舉,香港唔少政黨同社運中人都飛去寶島感受吓自由民主選舉嘅氣氛,包括學民仔黃之鋒、周庭、前學聯秘書長及副秘書長周永康、岑敖暉、社民連黃浩銘、人民力量袁彌明、公民黨梁家傑等。
雖然蔡英文當選毫無懸念,但唔少人上週五晚仍冒住雨到凱達格蘭大道睇小英造勢大會,仲霸定接近台前嘅位置。現場所見,大會攝影師不斷捕捉台下支持者一舉一動喺台上直播,但似乎專影靚女,四次影住周庭,兩次影住袁彌明,亦影過前學聯成員何潔泓。周庭俾人影住就尷尷尬尬「紅都面晒」,坐喺周圍嗰班「左膠」乘機起哄,睇嚟台灣攝影師嘅口味同香港人幾似,都好喜歡呢位形象清純又可愛嘅學民女神。




民進黨搞小英「選前之夜」,會場大銀幕兩度出現袁彌明大頭肖像,似乎好受攝影師歡迎。


袁彌明同一大班人民力量成員到台灣觀戰,睇嚟非常興奮。(郭永強攝) 尖啤爆料 無償幫胡總做嘢 


尖啤(右圖)為咗證明佢唔係貪心之人,上庭爆出曾幫胡總(左圖)擺平一單外交事件,事後有人送八十萬俾佢都唔要。(梁譽東攝)

前全國政協委員劉夢熊同特首梁振英之間嘅恩恩怨怨,好睇過大台啲膠劇。最近尖啤單妨礙司法公正案受審,事前講明會再有料爆,網民買定花生密切期待,可惜最後冇乜料到。
庭上所見,其實尖啤都好落力怒插 689為人涼薄,連佢都被 689玩到盡。例如幾年嚟冇人搵佢做上市公司高層;曾經有個大銀行家朋友,知道佢官非纏身之後,見到佢都運路行;尖啤因為單案,三年嚟都返唔到大陸探年老父母,盡唔到孝道。
尖啤講到激動之際都曾經想「爆料」,但就唔關 689事。佢話當年曾經幫手擺平一單外交事件,係胡錦濤主席親自要求解決嘅,事後有人話俾番八十幾萬佢,佢都唔要,證明自己唔貪心。但主控話唔關單案事,截停咗佢。

外訪大學 唔得掂偷師幼兒教育


近呢半年,唔得掂只有訪問新加坡,行程先直接同幼兒教育有關。(政府新聞處圖片)

教育局局長吳克儉除咗「勤力」睇書之外,外訪亦不遺餘力,根據立法會資料,呢個財政年度佢總共外訪十二次,一共用咗三十日,被批評次數過多,但唔得掂反問一句:「乜嘢叫多?」仲話外訪比留喺香港工作更辛苦,因為外訪要向其他有推行免費幼兒教育嘅地方偷師。
其實香港由爭取至落實免費幼兒教育,前後花咗十幾年,吳克儉竟然一個人邀功,講到成功落實係因為佢夠勤力。睇番呢十二次外訪,有十次係返大陸,但唔少都係同當地大學活動有關;佢又去過美國及比利時,出席當地高等教育活動及會議,只有去新加坡嗰次,先有到訪幼稚園。究竟係研究免費幼兒教育定去遊埠,真係得佢自己先知。

撰文:巫不言

 

    tvb4life 發表在 痞客邦 留言(0) 人氣()