現時在中環摩天輪擔任 supervisor,給正修讀旅遊業管理的 Chester有發揮所長的機會,同時累積相關工作經驗,最重要是管理層的知識能成為了他將來找工作的踏腳石。

青雲路

返兼職變主管 做個真.有為青年

Ads by Google

讀書時做兼職是不少香港學生的常態,兼職不只是賺錢,當中亦有無限可能,現時還在讀書的 Chester,在 14年成為香港摩天輪的前線兼職員工,憑着積極的工作態度,很快得到上司賞識,個多月便升為主管,讓他未畢業已接觸管理層的工作,令他比同輩走得更遠。

Owlish Online是一間提供網絡市場推廣及人力資源服務的公司,為不同的活動項目招募兼職人員,同時提供訓練及管理,現時的項目是與 Swiss Aex合作,為他們管理香港摩天輪的前線兼職員工。 22歲的 Chester是其中一位 supervisor,負責安排 part time同事工作崗位,評核同事工作表現、處理客人投訴、與不同部門協調、編更等工作。
現時是理工大學旅遊業管理 3年級生的 Chester,小學時曾隨家人移民到墨西哥,於 10年與家人回流香港,在港讀書期間從事過不同類型的兼職工作,直至 14年,他加入了 Owlish Online,「之前做過 7仔、文員、補習,嗰陣見摩天輪請緊兼職,好似幾好玩咁,於是去應徵 junior staff。」
前線工作,需要接觸來自不同國家的遊客,需要有良好的溝通能力,令學習多種語言的 Chester能發揮所長,「我喺墨西哥生活咗 8年,對西班牙文都好熟,另外,讀副學士時揀咗法文及英文,摩天輪多旅客嚟玩,試過用西班牙文同一對西班牙情侶溝通,佢哋第一時間表現得好驚訝,仲好開心咁同我分享去咗香港邊度玩,之後嚟玩埋摩天輪,喺工作上運用到自己識嘅嘢,有一種特別嘅喜悅。」

個多月升主管

只工作了個多月, Chester便晉升為 supervisor,得知消息後, Chester當然十分歡喜, Owlish Online創辦人 Karl表示︰「香港摩天輪項目需要約 8位嘅 supervisor,負責管理約 100名員工,每日有 3更,想盡量安排每更有一位 supervisor當值,當時 Chester每星期都返到 3、 4日,算係比較固定嘅班底,加上佢嘅外語能力及處理事務嘅態度唔錯,決定升佢試吓。」
上任後, Chester首先要面對同輩的質疑及管理下屬的問題,「班同事多數係同自己差唔多年紀,好易玩埋一齊,當自己做咗 supervisor後,喺工作上發現問題要出聲,但會當朋友咁講,唔敢鬧佢哋。有時都會感覺到佢哋唔多服自己,試過提個同事專心啲,唔好成日玩電話及郁嚟郁去,佢會反駁番我轉頭,好似對罵咁,最後驚動埋上司先搞掂件事,嗰刻都有啲心灰。」




雖然是 supervisor,但 Chester亦要到前線工作,好像帶領客人,及為摩天輪開關門亦是其工作之一。


以身作則

經過上司的開導及自己對其他主管的觀察, Chester明白公私分明的重要性,「要慢慢去改變,好似工作時講嘢會正經啲,唔再嘻嘻哈哈,同時要同同事約法三章,返工還返工,放工點玩都冇問題;另外自己要做個榜樣,好似返工準時,喺工作崗位唔玩手機等,做咩事都有規有矩,𠵱家同同事合作已經順暢咗。」
除了摩天輪外,公司有不同的項目讓 Chester參與,令他有新的挑戰及體驗,「聖誕節時,公司與 Little Christmas Hat project合作喺街邊擺檔,賣慈善聖誕帽,除咗管理人手外,自己都要落手落腳去叫賣,未試過賣嘢,初初問人買唔買聖誕帽,好多時都冇人會停低,慢慢摸索到先講我哋係做緊籌款義賣,再 sell會易好多,嗰時夜晚 1、 2點仲要返 office點貨埋數,真係好辛苦,不過學多咗嘢,係一個難得嘅經驗。」




作為 supervisor, Chester(左三)在工作前需要與同事進行 briefing,「提醒同事一啲注意事項,好似近排天氣涼咗及有驟雨,公司會有暖包及遮畀佢哋用。」


當有新同事加入時, Chester便要擔當領路人的角色,讓他可以盡快融入團體中。 In人學見工技巧

成為了 supervisor, Chester要參與招聘新同事的事宜,角色的轉變,讓他有很大得着,「雖然知會同老闆一齊去 in人,但自己工作經驗唔多,個心始終有啲怯,起初唔知問咩,咪跟住老闆個框架去延伸,原來有時啲問題冇咩正確答案,我哋有情境題,好似會扮飲醉酒嘅人要玩摩天輪,睇佢點應對,面對故意刁難你嘅客人時,壓力下會表現失措及冇笑容,從中睇番佢應變力及親和力,呢啲對我都係一個啟發,第時見工知點應對。」
現時 Chester每星期返 4至 5日,每日返 8小時,月入約$9,000,還有兩年才畢業的 Chester,表示會繼續在 Owlish工作,吸收經驗,「讀呢科需要累積與旅遊相關嘅工作經驗,摩天輪嘅工作算係其中一種。𠵱家都係叫接觸管理層嘅工作,喺兼職嚟講係好難得,自己都想喺度學多啲嘢;加上喺接觸客人時,仲可以練埋自己嘅廣東話及普通話,會安排多啲時間返工。」




在不同的項目中, Chester可以有不同的工作體驗,試過在貨倉點貨、執貨及埋數。


在剛過去的聖誕節, Chester要帶領同事在尖沙咀及銅鑼灣街上義賣聖誕帽,鍛煉了他的說話技巧。


在冬日購物節時,公司調派 Chester(左一)參與擺賣小朋友產品的攤位活動,培養到他面對小朋友的耐心及相處方法。 


Chester不時要向老闆 Karl匯報同事的工作狀況,當有新的活動項目時,上司亦會向他了解有沒有潛質的員工可以推薦。

Karl Owlish Online老闆:
喺度做嘢要日曬雨淋,但 Chester成日好好笑容,有啲位可能辛苦啲,好似開車門位會比較大風,佢都冇怨言,返工準時。見到佢對工作有活力及熱誠,覺得佢有潛質,當時我哋有個 supervisor空缺,就畀個機會佢試吓。

後記︰不做廢青

原來 Chester亦喜歡打機,初到香港時更是怕羞仔一名,「當時廣東話唔太好,朋友唔多,唔夠膽同陌生人講嘢。」但 Chester有個夢想是希望能讓母親盡快退休,過好生活,推動他做一些自己不想做的事,「邊個唔想 hea喺屋企打機就算,但有目標要完成時,你會知要點做。」原來有夢想可以讓人不做廢青,你有夢想嗎?

點入行?

Owlish Online老闆 Karl表示公司常常與不同的機構合作,對於前線兼職的員工需求很大,歡迎有興趣的年輕人加入,「我哋嘅工作需要接觸唔同國家嘅客人,其中英文及普通話溝通技巧一定要有,另外工作態度好重要,嚟面試唔係話見兼職就可以踢拖 hea着,只要見到佢有責任心及表現良好,都會有機會晉升。」有興趣的人士可以將履歷表寄去 mailto:hr@owlishonline.com

晉升階梯

Assistant Manager/Manager(Full Time)
月薪$18,000或以上

Officer/Senior Officer(Full Time)
月薪$10,000-$15,000

Supervisor(Part Time)
時薪$60-$70

Senior Staff(Part Time)
時薪$50-$60

Junior Staff(Part Time)
時薪$40-$50

撰文:曾志恒
攝影:傅新發、陳子禮(部分圖片由被訪者提供)

 

    tvb4life 發表在 痞客邦 留言(0) 人氣()