新車激試

野心之作  Lexus RX200t F SPORT

Ads by Google

日牌 Lexus要打低德國名牌嘅野心,早喺 90年代已展現出嚟,不過礙於名牌效應,苦心經營 10年先叫做開始產生威脅力,繼而推出更多重要車款,直接對撼德國車。
RX車系自 1997年以 Toyota Harrier孖生兄弟車登場後,一直扶搖直上,第 3代開始成獨立車系,發展到今日最新第 4代,更加大車身、大幅強化車上設備、甚至用埋歐洲車最流行嘅 2.0公升 turbo引擎,實行同 M-Benz、 BMW等豪華 SUV睇齊!一眾德國 SUV睇路嘞!

Lexus RX200t F SPORT Spec.
引擎: 1,998c.c.直四 turbo
馬力: 238ps/4,800-5,600rpm
扭力: 35.7kgm/1,650-4,000rpm
傳動: 6前速自動、附+/-模式
車身: 4,890× 1,895× 1,690(mm)
軸距: 2,790mm
車重: 1,965-2,070kg
耗油: 8.6L/100km
車價:$649,000
查詢:皇冠汽車( 2820 4020)

當 M-Benz嘅 SUV車系改名改到亂晒龍嘅時候, Lexus RX車系始終如一,未有甚麼 Coupe版、開篷版出現,呢一點實在難得,起碼話畀人知佢好專心做一件事。其實,第 4代 RX喺去年 10月底東京車展展出前,台灣市場已率先賣街,香港代理都唔輸蝕,以 RX200t F SPORT成為 2016年頭炮新車。




側面就睇到 RX(左)車身明顯更長,而且車頭部分較凸出。


老實講, RX(左)嘅車尾裝飾一啲都唔比 ML輸蝕,有齊尾翼同車底擾流。 誇爆車頭扮大部

要向德國 SUV挑機,首要條件係夠大部!當然去到 Audi Q7咁嘅 size就留畀 Lexus LX車系, RX要針對 GLE及 X5,以上代車身尺碼實在唔夠料,為此今代車身加大唔少,車長由上代 4,770mm加至 4,890mm,比同場 M-Benz GLE嘅前身 ML仲要長多 87mm!不過細心睇睇其他數值,其實新 RX只係車長勝過 ML,闊度同高度都略遜,更有趣係 RX軸距只有 2,790mm,比 ML嘅 2,916mm短得多。能夠以短軸距造出大車身,就說明了前輪至車頭位置、後輪至車尾位置都造得較長。事實上,新 RX個車頭設計十足十日本動漫啲戰機一樣,根本搵唔到一幅圓渾表面,全部由起晒角嘅線條組成,而且同中央漏斗形網格鬼面罩極之相襯,惡辣到不得了!此外,新 RX嘅頭、尾指揮燈首次用上走馬燈設計,由中央向外閃動,有 Gimmick!




C柱位嘅角窗原本平平無奇,但設計師喺外面加上黑框同電鍍邊,型晒!


白色車身配黑色加電鍍倒後鏡,效果非常好!


Lexus家族式鬼面罩,令車頭形狀更尖。 舒適性媲美 GS

一部好嘅 SUV除咗要外表睇得,仲要令人坐得舒適。 Lexus對車廂舒適性都有相當高要求,當年初代 LS400房車一出即令德國豪房汗顏,所以就算 RX未去到 LS咁誇,但都一定唔會差。 RX嘅軸距唔及 ML長,令後座空間尤其腿部位置唔算十分出色,但都比 GS寬敞,而且由於有巨大天窗,令視野空間感強烈,呃到吓人。不過講到前座, RX就堅係用料足又坐得舒服,全因 F SPORT版配 sporty座位,而且誇到有自動冷暖功能, GS都未有,冬暖夏涼!正!

由於配上 F SPORT Package,測試車更用埋 20吋輪圈、 F SPORT包圍、 F SPORT軚盤、金屬腳踏、擋風玻璃投射式表板、專用儀表板及後座太陽擋等,車價比普通 RX200t貴$100,000,盛惠$649,000,都仍然比歐洲對手平十幾萬,如果唔係 F SPORT版,更加平成廿幾萬,絕對物超所值!




RX嘅後座可以 40:20:40分割摺合椅背,又可以一拉掣摺合,但坐墊就唔可以翻起,載物空間亦唔係完全平坦。


ML後座可翻起坐墊及 60:40摺平椅背,令載物空間增至 2,010公升。


筆者坐入兩車後座,發現 RX空間稍遜,但大天窗可令空間感好返啲。


RX200t F SPORT用咗半桶形皮座,包承力比 ML更好。 5種模式任設定

面對德國嘅 SUV強敵,車廂要做得舒適、乘坐感要好,已經係基本入場費,想引到潛在客戶碌卡,必定要加多啲 hi-tech嘢拋吓人!新 RX嘅 F SPORT儀表版由彩 mon.構成,左方小屏幕負責行車資訊,由行車里數、耗油量、轉向角度、油門深度、迫力力度、四驅分佈,以至 turbo bar數都有,勁過好多歐洲跑車!

除此之外,以往 Lexus只會為車輛最多配 4種行車模式設定,分別係 ECO、 NORMAL、 SPORT S及 SPORT S+,當中以 SPORT S+表現最激進,引擎保持高轉數及 AVS電子避震調到最硬。今代 RX特別追加第 5種駕駛模式「 CUSTOMIZE」,顧名思意可由用家獨立設定引擎、避震及冷氣,配搭出個人喜好。




RX200t F SPORT非常齊料,電動座位有齊冷暖功能,仲有電子泊車手掣及 Auto Hold功能。


F SPORT專用軚盤有 F SPORT章及用紅線縫合。


天窗由車頭伸延至後座頂,但只可開啟前半部分。


金屬防跣腳踏都係 F SPORT專屬,靚仔!


表板設計參照 LF-A,但中央就唔可以移動,只可以改變屏幕顯示、內容,有齊 ECO表、 turbo表、四驅出力分佈等。


行車模式除咗有 ECO、 NORMAL、 SPORT S及 SPORT S+外,新加入 CUSTOMIZE,用家可個別設定引擎輸出、避震及冷氣。 行車剛柔並濟

SUV趨向跑車化係既定事實, RX未有消息推出「 RX-F」、亦都冇 Coupe版本,要畀人跑車感覺,只可以從行車表現落苦功。測試車為 RX200t F SPORT,配用來自 NX200t嘅 2.0公升 turbo引擎,馬力達到 238匹,而且 35.7kgm強大扭力喺低至 1,650rpm已輸出,所以就算車重達 2,070kg,起步都一樣爽朗有勁,只係高轉運作時聲浪稍大,唔及 V6咁靚。由於新引擎用上 VVT-i、 D-4S及停車熄匙系統等技術,耗油量低至 8.6L/100km,比上代 RX270更慳油。
筆者試車時反覆切換 NORMAL及 SPORT S+模式,發覺引擎輸出及避震反應有顯著分別,以 SPORT S+模式攻入彎角,車身傾側唔大,支撐力足夠,令人更有信心;而 NORMAL模式就好適合巡航使用,引擎、波箱都表現平順,避震對路面凹凸不平有出色過濾效果,可以當佢房車咁用。







Lexus嘅 6速波箱表現出色,而且以往用家口碑好好,可靠耐用。


2.0公升 turbo引擎來自 NX200t, 238匹馬力算唔錯,惟運作聲音比 3.5公升 V6大。 德、日對手唔係流

Lexus RX車系要打出名堂其實一啲都唔易,除咗 M-Benz GLE之外,同佢差唔多大部有 BMW X5,性能同牌子都更有吸引力,就算日本對手都仲有較冷門嘅 Infiniti QX70,所以 Lexus為 RX轉新款,真係絞盡腦汁。



操控稱王- BMW X5 xDrive35i
BMW X5一直以嚟都被評為最佳操控 SUV,完全承襲車廠跑車血統,就算入門 X5 xDrive35i都使用 306匹、 3.0公升直六 turbo引擎,加速性能出色,而車系仲有頂級 X5M坐鎮,絕對係高性能 SUV表表者。車價$765,000起



另類選擇- Infiniti QX70 3.7
同 Lexus一樣係日本豪牌代表嘅 Infiniti,都有一款 QX70 3.7同 RX對抗。採用 320匹、 3.7公升 V6引擎,喺香港可以話係非常冷門選擇,普及程度遠不及 RX。此外 QX70 3.7車款都比較舊, 2009年已經以 FX37之名面世,至 2013年 facelift改名。車價$729,000

撰文:袁國基
攝影:葉曉明

 

    tvb4life 發表在 痞客邦 留言(0) 人氣()