A.C.G.U.

反傳統 6變 9 新細代 1: 9 Iron man列隊閱兵

Ads by Google

唔係 689!係 6變 9!著衫公仔最早要數 1964年的 G.I.JOE, 1比 6( 12吋)身型被視為全球標準,話最適合小朋友拎住玩,但時至今日, figure已屬成人玩物、一買又話要儲齊幾十隻鐵甲奇俠,隻隻 12吋邊度有位放!香港人創意無限,食腦商人將 6字倒轉變 9字,反傳統推出 1:9/ 9吋 figure,短短 8個月內快速建立版圖,成功解決玩具冇位放的土地不足問題。

( A) Mark 39  Starboost
少有的白色太空裝甲,首創磁力機關,將 figure放在附送的 display架上,就會自動亮燈。$1,180

( B) Iron Patriot
亦即是戰爭機器 2的「美國隊長」色,配色金屬感重,暫時為監修中作品。約$1,180

( C) Mark 37  Hammer head
暫時市面還未有其他廠製作此深海裝甲,用料十足,但可動性亦唔差。$1,180

( D) Mark.7
《復仇者 1》經典裝甲,肩甲、手甲有大量換件用作放飛彈用, 4片背翼亦可張開。$1,180(本年 2-3季發售)

( E) Hulkbuster
達 42cm/16吋高,全身着燈、關節全可動、磁石胸甲。 2月初發售/$3,680( Mark.43需另購)

( F) Mark.43
Mark.42的改良版,雙腳因應跟 Hulkbuster合體玩法,股關節可拉得更闊。(如想增加 Hulkbuster腳部活動幅度,亦可拆腳)$1,050

( G) Mark.5
來自《 Iron man 2》,特色是修身線條、全身外露細節,雕刻量比其他款式多。$1,150(本年 3-4季發售)

( H) Mark.42
系列第一作,含金量相對最高,比例均稱好靚仔。$1,050

( I) War machine Mk.2
根據《復仇者 2》設定製作,更係首隻附人物面相及發光開關面具的款式。$1,180( Toysoul限定版)

頭一隻最難搞


創意總監Sky Ip阿青

King Arts前身為一家迪士尼玩具代工廠,但其老闆始終想創作屬於自己品牌的玩具,於是趁住美國超人電影熱潮開始製作高質素 figure,因 1:6版權已有所屬, King Arts轉戰 1: 9,初時玩家都幾冇信心,因為冇同比例玩具襯埋一齊放,起步唔易,創意總監 Sky Ip阿青都認同,搞 9吋係比 12吋難好多:「 1:6係經過多年實驗結論,放入櫃坐低睇最靚嘅比例。」但佢解釋,玩具已進化數十年,款式五花百門,加上市面玩具款式眾多,《鐵甲奇俠》都 40幾款裝甲,玩家根本冇地方儲晒,所以玩具二手市場先至咁旺,因為要賣走一批先有位擺另一批。 9吋 figure優點係收藏空間唔需太多、又賣得平,但講到尾都要做到足以跟 12吋比較的精密度,記者自己由第一款 Mark 42開始玩, K.A.冇乜犯到細廠常賴嘢的「件撞件刮花」、「多餘可動甲其實郁唔到」等白痴問題,令我唔太滿意的彈簧膊甲,亦已改用正式關節,愈做愈好。
阿青話:「其實初初搞 mark 42因為開發需時,加上當時有某 figure品牌易主,好多網民擔心我哋都有起貨問題。」好在佢哋及時搬鋪執靚門面、改善 facebook更新率挽回用家信心,直至玩家收到 Mark 42、玩過覺得 OK後,就有信心再買第 2隻。現時約 5款已發售作品反應都算幾好,新款如 Mark 45,訂單數量比 Mark 42大增 7-8成。

究竟有乜好?

《玩味》
9吋比 12吋更適合拎上手玩,比如 Hulkbuster就獨家可安放整隻同廠 Mark 43入去,玩合體都玩一晚啦!



《重量》
細隻唔代表冇「手感」, K.A系列係按每隻款嘅比例去調節「含金量」,比如呢隻大龜甲 Mark 37便重達 520g。



《分件》
一隻 9吋 figure為方便組合、平均使用金屬塑膠、上色,竟然要分 150至 200件配件,真係大開眼界!



《細節》
阿青對奸角奧創呢款 figure非常自豪:「市面其實冇廠出過佢最終形態,但我睇完戲覺得一定要做,於是將隻初版大執,改到可以換甲換埋最終形態。」($1,480/本年 2-3季發售)

隊長雷神帶隊  Phase 2.0計畫始動

記者都唔係盲撐,對 King Arts有個終極疑問:「一路出 Iron man都有少少悶, 1:9仲有冇其他角色?你哋其實係咪未有技術出人型?」阿青話:「 plan緊啦,會傾 DC漫畫英雄同埋其他日本作品,但首先會出幾款《復仇者》,不過形式上唔係着衫,因為衣料問題仲解決緊,等解決晒先出就太遲,所以會改用類似 BANDAI S.H.F.形式出,但上色會細緻好多。」轉頭阿青已經畀咗雷神同美國隊長我影相,兩款角色特點都係以裝甲服為主,所以用塑膠解決並唔會覺得難睇,尤其雷神補上一件布製長袍,當堂醒神晒,襯埋同系列 1:9 Mark 7影,冇違和感。

究竟有幾高?

12吋
即是 1比 6着衫公仔,沿自美國孩之寶 G.I.Joe系列,日本 Medicom、香港 Hot Toys都係賣呢個比例。

9吋
1比 9大約有 9至 10吋高,高過 BANDAI MG模型少少,大小適中能製作出比較像樣的細節,也不太阻地方,放入櫃排陣、放上枱影相都好 fit,話唔定將會慢慢流行。

6吋
當年《星戰》之父 Lucas因 12吋太大隻,食腦地諗到改出 3.75”,等玩家可以買成隊白兵、或者整部 X-Wing,但近年亦因為玩具迷對細節的要求,順應民意以 6吋為主。



雷神的隱藏伸縮關節比較多,明顯係遲過隊長開發,雙手的肌肉紋幾吸引,整體冇 BANDAI批《復仇者》 S.H.F.咁漫畫化,但整體身型都要再執執佢。(約$650、推出日未定)



隊長個頭嘅上色我問過已好接近大貨,如果做到呢個級數絕對收貨。不過整體有少少身長腳短、頸都好長,要再修一修。(約$650、推出日未定)



盾牌同雷神鎚如無意外應該會用金屬物料。

做 9吋 其實唔難至奇

問到設計 9吋最大難度,阿青話:「 9吋 figure多細位薄位,仲要藏起大量發光、可動 gimmick落 9吋身型、好花功夫。另一問題係適材適所,唔係全身用晒合金就好,太重玩得唔就手,金屬件刻線同細位亦較粗糙,分件、選料、打磨、上色全部係心機。」
阿青又話,一件 figure要令人覺得靚,設計師需要訓練自己審美眼光同 sense:「唔係話拎住電影公司 file照倒模就得,要按產品比例微調細節,呢方面日本人做得最好,全世界係得佢哋可以拎完版權後自由發揮,希望日後 King Arts人型都做到呢點。」再睇番雷神同隊長,雷神頭雕係首辦件,上色水準高係必然,相信大貨會比較接近美國隊長個標準,但都總算靚仔過 BANDAI同 Figma,而且已跳出港產電影 12吋只以「做得似劇照」為標準的框框,有少少廠牌個人風格。問番售價,兩款都係賣 6百左右,比 Iron man平好多,未來仲有 Tony Stark同 Hulk。不過記者真係想 King Arts快少少拎到其他版權,裝甲 Batman!唔該!



呢套 Tony Stark就係真正開發中的 1:9着衫 body,但 K.A.都話現時只能做到呢類 tee或者西裝,仲需要一定時間去研究同規劃。(參考作品)

其實 K.A.強項係細節同配件,咪就係好玩同型仔配件先囉!好似呢套《 IM2》變身架,仲有裝甲櫃、小黃臂,大把嘢玩。(參考作品)






King Arts由代工廠變身精品 figure生產商,短短 8個月有此成績真係唔錯。右圖係早前趕工生產 Toysoul版 WM2,左圖見到未?冇錯, Hulkbuster已經趕緊工啦!快快趕好就可以放農曆年假。







睇睇其他細 figure

MEDICOM RAH220 Masked Rider V3
十幾年前 Medicom都曾經嘗試推出平價的 22cm,呢款 V3係後期改良品,身型靚配件精細,但始終係冷門,出完 1至 7號就冇玩落去。另外,同廠亦利用 RAH220 body推出過《鋼鍊》男主角愛德華,剛好表現出其矮仔身型。






大塚計畫 1:10
日本老餅廠,大塚特色係為節省成本,衣服係未完成,要自己修剪自己穿,後來仲搞過金屬 body,有努力過。後來因經營不善,大量劈價貨流出,好似 Black、龍騎都係兩百幾買到,但冇幾耐間廠都執埋。






King Arts
旺角信和中心 604室( 3956 8060)

撰文:鍾世傑
攝影:傅新發、劉宇軒

 

    全站熱搜

    tvb4life 發表在 痞客邦 留言(0) 人氣()