Webber

新舊媒體x Pomato

Ads by Google

傳統媒體愈來愈難做,大台收視差、香港電影冇人睇!
反之,新媒體大行其道,門檻低、成功快,令年輕人寧願發展新媒體都唔願意加入傳統媒體。
有人質疑呢班年輕人,如早排大台真人 show嘅網絡紅人一樣,將網上拍片視為踏腳石,最終都只會去傳統媒體發展。
今期 Webber主角 Pomato就係浸會大學電影學院高級文憑嘅一班畢業生,佢哋要話俾大家知佢哋唔做電影,誓要發展新媒體,創造新時代!

Webber's profile
Pomato
YouTube: Pomato Production
fb: Pomato Production
Website: http://pomato.hk/ 
獎項:
香港發展局、青協 m21主辦:「你」想地方短片比賽金獎(大專組)
香港知識產權會主辦:台港兩地短片由我創銅獎(大專組)
香港青少年發展聯會主辦:納米電影創作比賽最佳編劇(公開組)
MCL Cinema主辦: Most Popular Award
香港藝術發展局主辦:鮮浪潮本地競賽入圍作品

1.各散東西繼續拍


Pomato最威水嗰次,應該係憑《盲點》入圍鮮浪潮本地競賽。

Pomato八人本身係電影高級文憑同學,畢業後各自升讀不同的學位課程,琪琪:「香港地只要有個 degree,人哋睇你都唔同啲。」雖然各散東西,但仍自組團隊,堅持拍高質短片參加比賽,並放上 YouTube,同一般鍾意拍乜就擺上網嘅 YouTuber唔同。琪琪:「我哋係將比賽片和工作片放上網,冇需要追片同定期更新。」高 Ling:「唔想做啲低質、即食嘅片,想人哋睇到我哋係專業。」

2.高 hit rate又如何


呢條《 No Battery No Memory》獲得香港青少年發展聯會主辦的納米電影創作比賽最佳編劇獎,雖然短短兩分鐘,但懸念和鋪排技巧甚佳。

眾人都承認,現今科技發達,令見工模式都唔同,魚蛋:「 YouTube係我哋嘅 portfolio,人哋睇到會搵我哋。」點擊率從來不是考慮範圍,家富:「高 hit rate,多人讚又點?我寧願拍專業嘢,俾專業人讚我哋!」宜家好多 YouTuber都盲目搶點擊,客戶搵一班高點擊 YouTuber只當佢哋係明星,收宣傳效果。 Pomato就話唔想做明星,只想做專業嘅製作團隊。

3.死唔入電影圈


呢條《再一次》係佢哋第一次參賽嘅短片,仲好叻叻咁拎咗金獎,畫面拍得好靚,好細緻,氣氛亦塑造到好 warm,基本功十足。

曾經,佢哋都抱着一個電影夢,追過後先發現同現實有好大差距,高 Ling:「參與一部電影可以好漫長,你睇《一代宗師》拍咁多年,當睇到成果,我可能已經唔記得咁辛苦為乜?」讀攝影、燈光及美術指導嘅肥賢亦表示做電影攝影師係遙不可及:「除非你師傅肯俾機會你,否則可以做幾十年助手!」當然,電影亦有較穩定職位如製片,曾任製片嘅 Kiko就話:「做電影助製其實只要冇乜大錯,係可以穩定咁升上去,但做耐咗會頹,變咗普通打工仔一樣。」

4.點解分新、舊


比賽片外,佢哋亦會將平時 freelance工作放上網。工作時亦會見到好多名人,例如導演黃修平,真係後生可畏。

現正主修新媒體相關課程嘅家富解釋何謂新媒體:「只要資訊傳播速度快就係新媒體。」不過,香港新與傳統之間仍然模糊,阿齊:「蘋果日報發展蘋果動新聞,佢哋係新媒體定傳統媒體?」 Jeffery:「點解要分?做傳統媒體嘅人都想做新媒體,兩樣嘢一齊發展緊。早前大台真人騷,一班新媒體人去傳統媒體,互相影響。」家富:「我鍾意睇電影、電視,但我做新媒體係冇問題。」新媒體係大趨勢,有一日新媒體都會變舊,將來可能會出現另一樣嘢取代網絡,活在當下就好。

撰文:陳可兒
攝影:陳子禮

 

文章標籤

全站熱搜

tvb4life 發表在 痞客邦 留言(0) 人氣()