青雲路

兄妹檔拍住上 空手道打出國際

Ads by Google

現今孩子的課外活動多多,但真正喜歡又能認真發展下去的,卻少之有少。擁有共同的興趣是幸運的事,哥哥 Chi Ming(劉知名)和妹妹 Grace(劉慕裳)一同迷上空手道,更是難得! 2人屬於空手道中的系東流,主攻套拳,即一套包含攻擊、防守、反擊等技術的連貫動作。現時 Chi Ming和 Grace的世界排名分別為第 15及第 6,是體壇的生力軍。他們希望藉着於比賽上取得好成績,令更多人認識及喜歡上空手道。

採訪當日, Chi Ming和 Grace於香港體育學院的空手道館進行訓練,不要小看 2人細細粒粒,身體動作敏捷靈活之餘,更招招有力,拳拳颼颼有聲,瞬間被他們的氣勢震攝!兩兄妹皆為空手道香港代表隊成員, Chi Ming加入作全職運動員 3年, Grace則於半年前開始全職運動員生涯。
今年 27歲及 24歲的 Chi Ming和 Grace,畢業於浸會傳理系和城市大學多媒體設計系,分別打空手道 15及 13 年, Chi Ming說:「 00年,小六升中一嘅暑假,因為嗰時睇劇集《撻出愛火花》講柔道,睇完好想學,就問媽媽可唔可以學,但點知屋企樓下得空手道班,細個覺得差唔多,咁就開始咗。」

受哥哥影響


Cin Ming(左一)與 Grace(左二)皆參加了去年 6月於香港舉行的第五屆東亞空手道成人及第四屆東亞空手道青少年錦標賽,分別奪得隊制銀牌及女子個人銀牌。

空手道中分為摶擊及套拳,初時 Chi Ming兩項都有練習, 09年因入選精英項目而揀選主力打套拳。多年來他得到不少獎項,如青少年組冠軍等,從中獲得不少成功感。妹妹 Grace也很有運動天分,小四時,她已是校內的運動健將,身兼短跑、足球、籃球、羽毛球及乒乓球等校隊的隊員,「平時喺屋企見哥哥練習空手道,好想一齊玩,加上細個成日病,媽媽會鼓勵我玩唔同嘅運動,佢都好贊成我練空手道。」於是,她於 02年開始踏上打空手道之路。
Grace的運動神經比較好,很多動作都很快上手,中三時發現自己於空手道的潛能,一般參加比賽都可進入決賽,決定減少其他運動,集中練習空手道,「我好想做得好啲,測試一下自己嘅實力可以去到邊。」

共通話題


Grace(右一)於 2015年在日本橫濱舉行的第十三屆亞洲空手道錦標賽,奪得女子個人形項目的第二名。

兄妹 2人相繼在 06及 07年加入香港代表隊,因他倆有共同的興趣及朋友圈子,故增加了交流的機會,「我哋平時都會傾下空手道考試嘅注意事項,同埋比賽嘅策略。」 Grace說:「哥哥會幫我執啲動作,同埋提點我比賽時要留意嘅節奏。」至今,他們仍會不時就拆解動作、研究新動作等而討論,可見兄妹倆的感情很好。
加入港隊後,令 2人眼界大開, Chi Ming坦言 06年第一次代表香港出賽十分緊張,「當時係參加新加坡舉行嘅亞洲青少年錦標賽,最後入咗 8強,比賽前仲去咗台灣習訓。見到好多唔同國家嘅選手同評判,知道原來大家嘅評分準則都唔同,外國可能着重速度同身形,我當時偏瘦,所以返香港後,就開始做多啲 gym練大隻啲。」

兄妹同場比賽


除了器械訓練,他們平日更會跑步練習。 Grace更笑說自小已是短跑校隊,至今仍很喜歡跑步。

要數最難忘的比賽, 2人異口同聲地說起 12年的世界大學生錦標賽, Chi Ming表示:「每個項目只會揀兩個人,我同妹妹好幸運地被一齊揀中去斯洛伐克比賽。我哋喺同一個比賽場地打,大家都好緊張留意住對方打成點。最後妹妹拎到女子第三名,我就拎男子第五,呢個係我哋第一次世界性嘅獎項。」
然而,人生的道路總沒這麼平坦, Chi Ming坦言自己亦曾經歷低潮期,「 13年,我已經打過超級聯賽,拎到第三,世界排名亦試過排 11,一下子完成咗當時嘅目標,雖然開心,但同時失去咗方向,唔知點繼續落去。我搵咗好多前輩同教練傾偈開導自己,為咗重拾動力,最後 set一個高啲嘅目標畀自己,希望參加世界盃同埋打入世界前十。」

極速復原奪第二

作為運動員受傷難免,去年 3月, Grace發生了小意外,「我肩峰鎖骨關節韌帶撕裂,要休息 12個星期,但我 6月會有東亞錦標賽,真係好驚復原唔切,亦都好怕冇得繼續打。」這時,她才發現自己對空手道的投入程度比想像中大,憑她堅毅要康復的決心,於 8星期內便可以再次練習,並於 6月比賽時奪得第二名。
Chi Ming感言幸得家人支持,才可以一直走到現在,「 3年前畢業後,我成為全職運動員,屋企人初初都有微言,但見我空手道嘅成績愈嚟愈好,就慢慢放心。」除了希望能於世界錦標賽取得好成績外, Chi Ming和 Grace亦希望讓大家認識空手道,不再用「玩」來輕視,然後得到更多人的支持。




兄妹 2人不時一起練習, Chi Ming表示:「大家會互相執下動作,希望每個細節都做得再好啲。」


除了空手道的練習外,他們平日亦需要接受體能訓練,以提高技巧、力量、速度、穩定性及協調性。 Chi Ming所做的 Split Jerk及 Grace做的 One Arm Kettlebell Jerk,主要為了提高爆發力。




Val(香港體育學院體適能教練)
我幫咗 Chi Ming同 Grace訓練大約 6年,佢哋打空手道要強化全身肌肉,所以要做 Split Jerk、 One Arm Kettlebell Jerk同出拳等訓練。一般人以為運動員一定要以練大啲肌肉為目標,但我哋嘅宗旨係需要佢哋維持身體健康嘅訓練,準備比賽。睇到佢哋進步,好開心!

後記:早睡早起身體好

Chi Ming和 Grace與記者一同於體院飯堂午餐,看到記者點了一杯可樂, 2人一臉羨慕,原來身為運動員的他們,為了保持身型及營養,平日都被禁止喝可樂的。他們更說,為了讓各運動員早睡早起,宿舍的 wifi到 12mn便會中斷。天呀!記者平日這個時間才開始玩電腦呢,運動員真不易當!

facebook@Karate Bro& Sis Hong Kong

點入行?

現時政府及香港體育學院會對精英運動項目作重點支持,如田徑、羽毛球、單車、劍擊、空手道、賽艇、游泳、乒乓球、三項鐵人和武術等。除了得到世界級教練、訓練設施及海外比賽機會外,運動員還可獲得宿舍、津貼及獎學金。

不同級別不同資助
體院精英訓練資助評核準則,會就不同組別的精英運動員提供每月財政資助,以下以全職及標準資助的金額計算。

精英甲+組別運動員 不少於$30,960
精英甲組別運動員 不少於$24,690
精英乙+組別運動員 不少於$18,510
精英乙組別運動員 不少於$13,280
精英丙組別運動員 不少於$9,520
成年隊組別運動員 不少於$6,180

加入成年隊的最低要求是於國際成年比賽中名列前 2或 3名次或按個別體育總會較高的達標要求,或乃現役青少年甲、乙組別之受助人首年晉升為成年隊。而精英組別則需於不同世界級賽事中奪得獎項或名次如奧運、世界錦標賽等,才具備資格。 Chi Ming及 Grace現時為精英乙+組別。
香港體育學院: http://www.hksi.org.hk 

投 Grace一票

Samsung香港傑出運動員選舉於 16年 1月 9日至 2月 15日開始投票, Grace亦參與其中,投票詳情可參閱: http://sportstar2015.hkolympic.org 

撰文:霍芷晴
攝影:陳嘉元
(部分圖片由被訪者提供)

 

    tvb4life 發表在 痞客邦 留言(0) 人氣()