新車激試

金玉其外  Maxus G10

Ads by Google

過去一、兩年有唔少國產車引入香港,雖然大家可能冇喺街見過,但今年亦再有國產車攻港,聽都未聽過嘅品牌 Maxus引入兩部商用車 V80同 SV62嘅同時,竟然仲帶嚟一部睇落極級豪華嘅七人車 G10,$369,000定價只係半部 Alphard頂級版嘅價錢,點可以唔睇睇佢係咪真係咁抵成夾大件?



Maxus G10 spec.
引擎: 1,995c.c.直四 turbo
馬力: 218ps/5,500rpm
扭力: 33.7kgm/2,000-4,000rpm
傳動: 6前速自動波、附+/-模式
車身: 5,168 x 1,980 x 1,928(mm)
車重: 2,100kg
售價:$369,000
查詢:新宇汽車( 2880 1228)

喺柯士甸站對出十字路口塞車時,望住喺馬路都可睇通全屋嘅豪宅時,根本就唔需要懷疑點解有人會畀 2萬幾蚊呎去買間咁 open嘅屋嚟吸廢氣,因為今時今日香港有好多嘢已經唔係畀香港人買嘅。汽車市場亦一樣,喺車迷連韓國車都仲有啲歧視嘅情況下,引入國產車根本就冇預到會賣得好。咁引入香港把鬼咩?咁你又錯嘞!因為香港市場一向都係大陸人嘅指標,正如奶粉、藥品一樣,香港有得賣嘅車就係信心保證,絕對有助喺大陸銷售,喺一個省嘅出車數目可能已經多過香港最好賣嗰款車,搞一大餐攞嚟香港賣,咪當畀宣傳費囉!

買起英牌免創作

大家以為蝗蟲購物團嘅購買力已經好勁? No!習總周圍使錢去收買啲第三世界國家先叫堅!大陸車廠亦唔弱,周圍去買起啲破產外國車廠,唔知係咪國仇家恨嘅關係,特別鐘意買啲過氣英國車廠。除咗曾經叱吒一時嘅 MG同 London Taxi之外,連 1896年已經成立、專出貨車嘅 LDV Group都唔放過,以前港英政府常用嘅 Leyland就係佢嘅出品,不過上海汽車集團喺 2009年收購咗之後就改名叫 Maxus「大通汽車」。對於冇創造力又錢多嘅公司,有乜好過直接買起人哋個品牌同技術?所以 Maxus可以掛住「英國品牌」個名即時推出多款貨車, 2013年更連 MPV都玩埋推出 G10,仲巴閉到係由意大利都靈設計室設計!嘩,又英國、又意大利咁,對汽車無知嘅大陸暴發戶同農民,仲唔成箱人仔咁攞去出車咩!




上汽集團差不多買起晒英國 Rover集團冇人要嘅品牌, Rover房車改名榮威,旗下嘅 MG就繼續出新款,仲有舖引入香港嘅癮, 2013年已引入過 MG6房跑車,大家喺街見過嗎?


頭燈跟足潮流,有 LED日行燈同 HID大燈,只係鬼面罩啲電鍍質感就爭啲。


以前 Rover旗下嘅 LDV Group專出貨車, 70、 80年代港英政府常用嘅 Leyland DAF警車等政府用車就係佢哋出品,當時香港仲有好多 Leyland巴士添。


LED尾燈有骨位而且形狀立體,為較為簡單同肥大嘅車尾增添唔少動感。 數字強勁國產偈

講咩都假,買車最緊要安全, G10聲稱車架用咗超過 50%高剛性鋼材同 Layer Build雙層焊接技術,仲 7個位都有齊三點式安全帶,還有甚麼 ESP 9.1循跡系統、 RMI防側翻系統等等,不過冇提供任何撞擊測試報告……唔緊要, G10副國產 2.0公升 turbo引擎數據上好勁,有齊 GDI直噴技術同 DVVT雙可變活瓣正時系統, 218匹馬力拍得住啱啱先 facelift嘅 M-Benz A250 Sport!仲要用德國大廠 ZF製 6速+/-波、底盤由 Lotus調校!可惜筆者可能學藝未精,揸落都係覺得係「貨車底」,駕駛位置高、軚盤、油門偏重,馬力係夠,但引擎轉數提升感覺較粗糙,波箱自動拖波反應亦唔太快,而且高轉時引擎噪音唔細。車身較高視野係清晰,避震亦夠支撐力,轉彎時車身唔會好側,但軚感較模糊,轉向反應唔太敏銳,行過凹凸路面時嘅緩震表現亦只屬入門車級數,同操控舒服輕鬆嘅日本 MPV完全唔同。




2.0公升直四 Turbo引擎係國內自主研發,夠力但感覺粗糙,轉數唔太願上,加速反應唔算快,高轉噪音亦頗大。


雙圓表板設計簡潔得嚟都幾靚,用紅色針配紅色光圈,仲有中央小屏幕,不過顯示嘅資料唔多。


ZF製 6速+/-波箱拖波感覺實在,但相信係電腦控制調校未爐火純青,反應唔算快。


原裝配 16吋合金軨,款式都幾花巧,行車亦穩定,不過襯落巨型車身就好似細咗啲。 空間無敵欠細心

老實講,除咗個一望就知係大陸車廠嘅廠徽外, G10有齊 LED日行燈、硬朗車側腰線、立體尾燈嘅外形真係唔差。有對中排大班椅嘅真皮車廂,除咗中控台老土啲之外,整體上睇落亦幾豪,三排都有天窗嘅內籠空間仲要超闊落,以 37萬有找呢個價,香港真係無敵手!設備上仲有中控台 touch screen音響、中排吊 mon.同從未見過 MPV有嘅 220V家用三腳電插頭。不過 MPV嘅重點其實係要夠細心,特別係習慣咗日本 MPV嘅香港用家,已經奄尖到連歐洲 MPV都睇唔上眼, G10只取其形,喺香港注定畀人噓!




中控台設計簡單而冇 design味,冇任何搶眼位,好在識得用啞色木飾板襯銀色裝飾,已叫做追上潮流。


三排座椅頭頂都有大天窗, size仲大過初代 Audi Q7,加上車窗夠大,開揚感十足。


中控台 7吋屏幕介面似足 Android,但其實只有簡單播碟功能同後波鏡頭顯示。


皮革軚盤用料算唔錯,粗幼手感亦啱啱好,仲有埋 keyless go同着車掣。


真皮前座外形高級,包圍力亦唔錯,但全手動調校就麻煩咗啲,而且座墊較硬身。

最基本係超過 1.9m高嘅巨無霸車身已經入唔到好多停車場,繼而周圍搵個電趟門掣,發覺呢對重過 Hiace成倍嘅趟門竟然係全無電動功能!算,爬上離地距勁高嘅車廂歎吓對中排大班椅先,點知又係全手動調校,啲鉸位仲要硬到死,都係落車玩吓個尾箱算罷啦……代理為顯示 G10個尾箱有幾巨大,已擺定 4個大行李箱喺車尾,搬開佢再睇吓座椅有咩變化先? Oh!尾排竟然只可以前後移同校斜度,唔可以摺平收埋落地台底,咁我點擺單車呀!不過,今次代理供測試嘅只係樣辦車,筆者上大陸官網睇番,國內嘅 G10係可以加電趟門、電尾門、後排亦可以摺埋嘅,中排甚至有電動、冷暖風同按摩功能添!不過 full option版嚟到香港就唔知要賣幾錢囉……




中排兩張大班椅空間無敵, set咗皇帝位都仲夠位畀後座乘客上落車,而且頭枕有側翼,亦有腳墊,可惜冇電動調校。


中控原裝已有吊 mon.,可播 DVD,但打開同摺埋都係要手動。


最罕見係前座大手枕後面有 220V嘅三腳插頭,最大輸出都有 150W,唔只用嚟同電話充電比插 USB充電更快,手提電腦或小電器都用得。


尾箱原本已可直擺 4個大行李箱,將後座推前擴展深度,仲可以將 4個行李箱打橫擺。


第 3排座椅極厚身,空間仲闊過大部分 MPV中排,但只可前後移同調校椅背角度,唔可以摺平。

撰文:陳致新
攝影:葉曉明

 

    tvb4life 發表在 痞客邦 留言(0) 人氣()