呢兩個火柴偶嘅造型,取材自古時日本父母慶祝 3月 3日女兒節時所穿嘅傳統服飾,除了表現出父母對女兒嘅愛,亦突顯到設計師嘅手藝。

Play House

捱不大捱不大 早午晚畫火柴

Ads by Google

利申:筆者冇好似阿 Sa喺演唱會唱〈女校男生〉咁唱錯歌詞,我記得陳曉東首〈劃火柴〉係「捱不大,捱不大,遺失中找註解。來得快、完得快,早午晚劃火柴。」不過今次介紹嘅「 The Glow of Love」展覽係另一回事。

說話日本火柴藝術團隊 Kokeshi Match Team嘅設計師經常早午晚親手畫火柴,將一支支毫無修飾嘅火柴,變成一件件以「愛」為主題嘅藝術品。之但係呢種藝術嘅生命絕唔似劃火柴咁來得快、完得快,而係能夠保存落嚟供大家慢慢欣賞。唯一不變嘅,就係呢堆火柴藝術品同樣係「捱不大」,需要大家親身到場近距離細看。




48個短裙仔火柴偶,再加一個西裝友,是誰?開估:咪係 AKB48同經理人囉,表達出粉絲對偶像嘅愛。


每支火柴都跟足日本傳說中嘅七福神造型去整,仲要加多隻船,勁多手工。


平坂公美話佢當年喺參觀一個盒子展覽時靈機一觸,覺得喺火柴上面畫公仔好得意,於是展開咗長達廿幾年嘅火柴人偶創作生涯。 火柴人傳達愛

火柴人,大家只會畫喺紙上面,但係 Kokeshi Match Team嘅設計師平坂公美,早喺 1994年就諗到喺火柴頭上面畫人樣,將佢哋造成「柴娃娃」。 2000年之後, Kokeshi Match Team除了開始喺日本各地展出火柴藝術品外,仲將印有公仔樣嘅火柴量產發售,至今已賣出 100萬支,延續咗呢種已被火機淘汰嘅產物壽命。今次香港展覽嘅主題係「從古至今世界各地的愛」,全部作品都由平坂公美親手製作,唔只畫上角色人面,仲用埋黏土、和紙、布料等物,為纖幼嘅火柴加添髮飾衣服,近睇會發現手工相當精細,當中尤以多個日本傳統造型火柴偶最見心思,確實值得觀賞。




除咗參觀,現場亦有機印嘅有樣火柴畀大家成盒買走,每盒$22。





由𠵱家到 2月 13日嘅每個星期六下午 2至 5點,現場仲有職員教參觀者用印章為火柴印樣,可以當禮物送畀人,免費㗎!


Kokeshi Match Team最著名作品,係依照日本父母喺子女出生第 7日舉行嘅「禦七夜」命名儀式而製作嘅場景,繼續傳揚家庭之愛。


呢個系列總共用 8個場景去講男主角「鹽」同女主角「煙草」嘅相戀經過,係現代愛情故事。


展覽主題包括世界各地嘅愛,火柴偶造型當然有取材其他國家嘅人物,例如呢個「愛在法國大革命開花」嘅故仔。 時代廣場連賞四季

1月 31日前去開銅鑼灣,仲可以過埋時代廣場睇「黃貴權的色彩世界—我的四季頌」展覽,入面總共有 51幅記錄四季唔同靚景嘅沙龍,鍾意攝影就不妨去觀摩一下。

The Glow of Love
日期:即日至 2月 14日
時間: 11:00am至 11:00pm
地址: LOG-ON ToGather(銅鑼灣 Fashion Walk 1樓 F10-F16鋪)
查詢: LOG-ON( 2736 3866)

撰文:陳兆奇
攝影:葉偉豪

 

    tvb4life 發表在 痞客邦 留言(0) 人氣()