Phone火台

最接近的距離  SHARP AQUOS CRYSTAL 2

Ads by Google

張小嫻話:「世界上最遙遠的距離,不是生與死的距離,不是天各一方,而是我就站在你面前,你卻不知道我愛你。」好感性抽象!不過 SHARP就用理性實際嘅數字話畀大家知,手機屏幕同機邊最接近嘅距離,其實可以近到不足 2mm。
SHARP手機玩呢種「無邊」設計,已經唔係第一次,肯肯定係得到用家欣賞,先至會食過翻尋味。最新呢部 CRYSTAL 2唔只繼續以無邊框造型掛帥,規格亦較上代有所提升,更加入埋 Grip Magic等新穎功能,多啲嘢玩,唔係得個樣!

Spec.
系統: Android 5.0
處理器: Qualcomm S400 MSM8926 1.2GHz四核心
記憶體: 2GB
屏幕: 5.2" 720× 1,280 S-PureLED
鏡頭: 800萬像素(後)、 210萬像素(前)
制式: 4G、 3G、 2G
儲存:內置 16GB、 microSDXC(最高支援 128GB)
電池:內置式 2,030mAh
體積: 71× 136× 11mm
重量: 153g
顏色:白/黑/紅/藍
售價:$3,680(水貨)
查詢:三禾電氣( 2374 0618)

聽聲靠骨傳導

雖然 CRYSTAL 2屏幕外上左右 3方仍有約 2mm邊框,但已比一般手機幼得多,而且覆蓋屏幕塊玻璃嘅邊位,又被切割成斜面,令屏幕折射出嚟嘅影像更加貼邊,睇落堅有「無邊」效果。呢個設計可令機身造得更細,就算部機有 5.2吋芒,揸上手只似揸緊 4.X吋手機,單手用機都唔論盡。由於機頂已冇空間放聽筒,所以部機係靠骨傳導技術將通話聲傳畀用家聽,照舊將機頂貼住耳仔就聽到聲。




仔細睇,屏幕外圍嘅邊框真係幼到好似冇一樣!


呢代追加番 IPX5/7級防水防塵功能,機頂 SIM同 microSD咭插槽有防水蓋保護。


手機背部呈弧形,幾好揸手,而且機身好輕。


機頂冇位放前置鏡頭,於是擺喺機底,自拍要練過對位。 單手用機都方便

CRYSTAL 2仲喺左右機側內置感應器,靠佢哋提供新加入嘅 Grip Magic功能,例如手機熄咗芒,只要掂一掂是旦一邊嘅感應器就會着番芒;或者有來電時捽機側就可將鈴聲音量收細,更加方便單手用機,夠心思。不過睇番 CRYSTAL 2嘅 spec.: S400四核心 CPU、 2GB RAM、 800萬像素鏡頭、 720p屏幕,規格比目前好多手機低一截,好在佢$3,680嘅機價,喺日系手機之中已經算平,鍾意無邊設計又唔使用到頂級規格嘅用家可考慮。




機背只有圓點凹紋作點綴,保持日系手機一貫簡約設計,不過背蓋冇得打開換電。


無邊設計另一優點係支援 Swipe Pair功能,可將兩部機合成一個大屏幕,但首先你要有兩部機。


具備 Mini Apps功能,能夠全屏用一個 app,再自定 size用第二個 app,邊上網邊睇片最有用。


感應器藏於兩邊機側下方,人手掂吓佢哋就能使用 Grip Magic功能。 

《試芒》
雖只用 720p屏幕,解像度稍遜,但有新研發嘅 S-PureLED技術補數,三原色特別靚。實試色澤真係好 sharp,而且打側睇都冇乜變色,可視角度好高!



《試相》
800萬像素鏡頭質素唔及頂班 SHARP手機,油畫化問題幾明顯,顏色亦唔夠準,但以手機相嚟講,仍算合格以上。

撰文:陳兆奇
攝影:陳嘉元

 

    tvb4life 發表在 痞客邦 留言(0) 人氣()