Major

外遊咪咁_ 你不可不知的旅遊冷知識

Ads by Google

送禮勤一單 barcode事件,除咗令全城笑佢__之外,仲喚起一班旅遊愛好者對旅遊知識嘅好奇心。農曆新年又就快到喇,大家應該都定咗旅行大計,《 FACE》為大家搜羅一堆出發前、出發途中,和出發後嘅旅途冷知識,唔好做__頭!

機場地勤話你知
Alvin@FACE UStar 2015
Alvin曾任職香港航空地勤 1年,可以話到俾大家知搭飛機前、後嘅小知識,大部分都同個人財物有關,仲隨時有得免費 upgrade。

行李寄艙要小心


送禮勤已過改自身,又識反諷自己,唔好再笑佢啦。

原來遲啲去櫃位 check-in,行李係會放得上面啲,令行李損毀嘅機會降低啲。不過 Alvin提提大家,執行李時真的要檢查清楚有冇疑似違禁品,佢話曾經有個旅客件行李寄咗艙,正在閘口等上機時,突然被公開叫名,原來係經過行李部 scan過後,發現行李入面有疑似子彈物體,最終發現原來只係子彈型鎖匙扣。

遲 Check-in可以坐前啲 

當你到機場 check-in時,地勤人員只會隨機出位俾你,而航空公司一般會將經濟艙前排座位、近太平門座位先扣起,嗰啲位普遍比較寬闊,你越遲 check-in,越有機會坐呢啲位。若果真係遲 check-in遲到連嗰啲位都 full埋,就有可能 upgrade你去商務或頭等,不過只係齋坐,飛機餐都只係食返經濟艙啲嘢。不過 Alvin提提大家,因為每間航空公司嘅登機櫃位關門時間都唔同,所以一定要知清楚,萬一 miss咗班機,就算你係天王都唔會俾你上機。

免費 Upgrade要識人

若果唔想為 upgrade而冒以上嘅險,但又真係好想貪小便宜 upgrade,其實好簡單, Alvin話:「識人就得。」因為其實地勤人員真係只要喺系統打幾隻字就得,所以識人真係好重要!港女可以考慮唔溝空少/機師,溝地勤都有著數!







大台李詩韻曬頭等機票,但點解係 MR?(順帶一提,機票上其實隱藏你個人資料,唔好亂貼上網。) 寵物要寄艙

家陣好多人都當寵物如珠如寶,視如己出,連去旅行都唔捨得丟下寵物。若果要帶埋寵物去旅行唔係唔得,但申請過程相當繁複,例如要去申領寵物健康證明書、又要符合香港漁農署動物出入境規定,寵物箱又有特定限制。以上規定視乎各間航空公司規定,詳情要自己問返 airline。最慘係,你嘅寵物係冇可能陪你搭飛機,佢只會如普通行李一樣寄艙,過程有咩事真係喊都無謂。







行李損毀冇買旅保都有得賠


歌手 Dave Carroll曾被聯合航空弄斷結他,仲得唔到合理賠償,一怒之下作首〈 United Breaks guitars〉上 YouTube,唔只賺番支結他,仲有成 800萬點擊。

有時出短途 trip,真係想慳一百幾十唔買旅遊保險,但世事往往難預料。若果回程時真的發現行李有損毀,但又冇買旅保,其實一樣有得賠。記者妹就試過搭長榮航空被丟爛咗個喼,嬲到即刻去機場行李部投訴,雖然過程繁複,仲要等兩粒鐘,但最終因為航空公司發現到係佢哋嘅過失,所以都有得賠錢。 Alvin話:「其實好多旅客都因為怕麻煩而唔去投訴,但其實機場行李部係有齊哂每個牌子行李箱嘅資料,若果真係爛得好嚴重,又發現係航空公司嘅錯,真係有機會賠返個新嘅畀你。」

10年空姐的空中大爆料

家姐(化名)
現任國泰航空空姐,任職約 10年



《與炸彈同眠》
家姐:「公司有指引話如果遇到懷疑炸彈,就要將佢移去安全地方,當然唔係半路丟去海中心,而係移去飛機內一個對飛機破壞力最低嘅地方,通常都係最近機門嘅位置,之後機長就會即時搵地方降落,而我哋通常只會同啲客講機件故障,啲客隨時同緊個炸彈瞓都唔知㗎。」



《遇氣流受傷發爛渣》
家姐:「其實我哋做空姐嘅,所有同安全有關嘅守則我哋都唔會妥協,但偏偏有啲客就好唔聽話,明明扣安全帶指示燈亮起,死要企起身,有次個客死都要去廁所,勸極都唔聽!好喇,卒之喺個廁所度遇到氣流撞到受傷,點知投訴返我哋轉頭囉!」



《男人老狗敷 mask》
家姐:「有好多女士上機覺得乾都會敷 mask,但有次我見到係個男人敷 mask,仲敷到瞓着咗,派餐嗰陣都唔知叫唔叫佢起身食好,我哋班空姐都忍唔住笑。其實男人老狗敷 mask冇問題嘅,但見佢不停喺廁所出出入入,搞呢搞路,真係好搞笑囉。」

外遊精明 tips團


Wendy@FACE Ustar 2015

Wendy為現任兼職旅行社領隊,雖然經驗嘗淺,但在考領隊牌及帶團經驗中可以話到俾大家知一啲旅遊小 tips,有啲細微細眼位平時可能真係唔多留意。

旅遊景點要小心

去得旅行,必然有機會去到旅遊景點, Wendy提醒大家,若果去睇古蹟,有著住古服嘅人主動走埋嚟同你影相,唔好立亂影,因為通常都要收錢;而家陣好多旅遊景點都唔准用自拍神棍,例如意大利羅馬鬥獸場、新加坡聖淘沙、法國羅浮宮等等,如果唔守規矩隨時會被拘捕。










日去經典古蹟唔好亂用神棍。 入酒店要影相

入住酒店房前,一定要仔細檢查清楚入面有冇任何損毀,如果不幸有的話,就要即刻同酒店職員講。若果幸運地酒店仲有吉房就換房,若果冇就要影低相做證據,否則離開時酒店隨時屈你整爛!破壞旅行 mood就無謂。

銀聯咭免手續費

去旅行帶信用咭是常識吧!除咗一般 Visa和 Master Card之外,家陣有好多國家都會收銀聯咭,而所收嘅手續費亦相對較低。不過留意,不同發咭銀行嘅銀聯咭所收嘅手續費都唔同,一般來說,如恆生、匯豐會相對較高,其他中型銀行就會相對較低。若果想知清楚,最好問返你嘅發咭銀行。







日本大部份電器連鎖店,用銀聯仲有額外折扣。 旅保最好跟旅行社買


Do姐為旅發局拍廣告講解旅保重要性。

意外就係意料之外,唔好為咗慳旅保嗰一百幾十而損失慘重。 Wendy話若果要買旅保,最好跟旅行社幫你買,因為萬一一個唔好彩,旅行社會一條龍幫你同保險公司跟進,而若果自己出去同其他保險公司,或者銀行購買的話,就要自己一腳踢。記者就真係試過喺外地唔見電話,返到香港要自己上網填表、又要寄信、又要寫聲明,真係煩到 hihi㗎!

同旅行社買 package都要自己 check清楚

家陣好多人都鍾意自遊行,但為咗方便,好多時機票住宿都會去旅行社買 package。 Wendy就提醒大家,因為每個國家對於酒店嘅星級級數標準都唔同,所以即使旅行社話你知係五星級酒店,可能當地只係賓館,所以最好就自己上網 check清楚,同埋睇下網友評論。

空姐 secret 拆解江湖傳聞

坐飛機要飲樽裝水?
對!早幾年已經有好多研究指出飛機上的杯裝水含菌量超標,實情嗰啲水係飛機水箱嘅水,雖然飛完每一轉,都會換過新水入去,但個水箱就唔會點洗,所以啲菌就係咁積返嚟,連空姐都唔會飲,飲返航空公司提供嘅樽裝水安全啲。



飛機生仔終生免費?
小孩你真的太天真了!雖然早排香港航空真係有單生仔事件,係堅感動,不過係唔會有終生坐飛機免費!而且,空姐話喺飛機生仔係超級危險,因為飛機上乜嘢儀器同醫生護士都冇,空姐亦只係學過急救,頂多只能鼓勵佢自然生產,幫唔到啲乜,之後班機仲要中途轉向,隨時影響埋其他乘客!



要識「收買」空姐阿頭?
當然要!飛機一起飛,服務方面最大話事人就係空姐阿頭,好多嘢都係由佢話事。若果你想調位成功,空姐們都要問准空姐阿頭,當然空姐阿頭行走江湖咁多年,唔係你話乜就乜。簡言之,空姐都係人,死 lur冇用,反而識收買人心,可能就更能得到你想要嘅嘢。

撰文:陳可兒
部分攝影:陳子禮

 

    tvb4life 發表在 痞客邦 留言(0) 人氣()