新車激試

浪攝流試 潮 K王 Suzuki Hustler

Ads by Google

久違香港市場嘅 K-Car終於再臨, Suzuki Hustler挾住日本年度風雲車人氣而來!話明係 K-Car,性能當然心中有數,差唔多款款 K-Car都同一水平, Hustler之所以喺日本紅到爆,就係靠外表同埋形象,簡單講即係靠樣搵食!
Hustler青春感覺濃烈,主打鮮色車身、 cutie造型,更罕有套入 SUV概念,一系列照片、廣告,都將 Hustler塑造成「戶外向」嘅 K-Car。講到 Hustler幾適合戶外活動用都假,不如搵個真係以車為家、幾日先返一次屋企嘅攝星達人「不動明王」試一試佢,就知佢夠唔夠資格成為浪人 K-Car!

不動明王 profile

全職星空攝影師,自 2009年開始攝星,喜歡拍攝深空星體之餘,亦擅於使用傻瓜機攝星。作品《維港銀河》曾登上《蘋果日報》港聞版,接受過香港電台《鏗鏘集》、《香港故事之自遊香港》、無線電視新聞部、鳳凰衞視等媒體關於香港攝星嘅訪問,於本地 IT雜誌同報章撰寫攝星專欄,同時擔任不同團體嘅攝星班導師。最近更研究用手機攝星,希望攝星能成為最普及嘅玩意。

Suziki Hustler Spec.

引擎: 658c.c.直三 turbo
馬力: 64ps/6,000rpm
扭力: 9.7kgm/3,000rpm
傳動:無段變速自動
車身: 3,395 X 1,475 X 1,665( mm)
軸距: 2,425mm
車重: 820kg
耗油: 27.8km/L
車價:$149,800(首批優惠價)
查詢:香島汽車( 2332 0091)

上世紀 90年代可以話係 K-Car喺香港嘅全盛時期,經典車款一籮籮, Honda Beat、 Mazda AZ-1、 Daihatsu Move Turbo, Suzuki Wagon R等等,跑車、 Cutie車、開篷車乜都有。不過熱潮 10年就過,全因唔似日本本土有特殊稅務優惠,車價同 1,300c.c.車差唔多,馬力又差一截,香港人玩過就算,致令 K-Car沉寂十多年。不動明王喺 2000年都加入 K-Car車主行列,買咗部 Subaru Vivio RX-SS。「 K-Car代表住青春,我以前部 Vivio熱血,呢部 Hustler就有個性又有活力。」




Box形車身用盡 K-Car尺寸上限,但配上精緻頭尾燈同流線邊位就即時潮咗!


同大部分 Box形 K-Car唔同, Hustler有較明顯嘅車頭,加埋黑膠拋沙板,扮足 SUV。 11色全力攻勢

縱使 K-Car喺有限規範下已經做到好多元化,但終究 K-Car喺日本係好多新牌仔第 1部車,所以最好賣都係萌樣 cutie樣, Hustler都逃唔出呢個命運,可愛啲會更易被少男少女接受。 Box造型係方便營造最大車廂,但 Hustler如果平淡搞個 box外表,只會重複 Wagon R,所以今次用過心思喺頭、尾泵把及四輪沙板,用咗 SUV或越野車嘅黑色塑料,即時成部車多咗粗獷味,男車迷會 buy呢一環。太 man又會得失小姐少婦們,所以 Hustler又喺車頭加返電鍍鬼面罩同燈框,增添精緻感覺。
最誇係代理今次引入嘅係頂級版,豪到連電暖凳都有!而且日本市場 11隻車身顏色全部都返齊, 5款淨色車身、 6款雙色車身,而 6款雙色車身中,白色及黑色車頂各 3款,相信買車時都幾花多眼亂!不動明王:「盒形車唔係咩新鮮事,但 Hustler個藍白色款搞到好似部縮水 Toyota FJ Cruiser,好過癮!不過如果佢有埋頂架就更好,一來實用性更高;二來 outdoor味更濃。」




好多大牌要加錢先有嘅外圍 LED日行燈連自動開關 Xenon大燈, 15萬嘅 Hustler原裝已經有。


雙色車身版本嘅側鏡,會用埋車頂同色,仲內置 LED指標燈添!


冇天窗係最大遺憾,但雙色車頂都有擾流坑紋,仲留咗位裝旅行頂架。


尾燈都用 LED,指揮燈同後波燈罩仲精緻到加咗蜂巢紋, H形徽章又勁似 Hummer!


咁細部 K-Car原裝配 15吋軨有型又穩定,好在用 165/10R15幼胎唔太嘥油。


因為引入嘅 Hustler係頂級版,所以好多大牌要加錢嘅 keyless go同著車掣已經畀埋你。


布質座椅嘅格紋暗花夠精緻,仲有車身同色圍邊,而且有輕微防污、防水功能。


中控台同門板都有大幅飾板,正常係配白色,但橙色同黃色特別版就會跟車身色。


發佈會當日未返齊 11隻色,但最 sharp嗰 7隻色已到,只差黑、白、灰同卡其。 變床更好瞓

由於 Hustler車身只得 3,395× 1,475× 1,665(mm),同你講車廂好大就呃你,喺有限空間發揮無限可能,從來都係 K-Car最過癮之處。「近呢幾個月我多咗喺車上面過夜,主要係因為晚上要長時間喺荒野影星空,所以帶上車嘅嘢愈嚟愈多,攝影器材、枱凳、 cock set、食物、食水、甚至會喺車內鋪單人床鋪!」不動明王部 Jazz都唔算大車,前座又唔可以摺平,所以尾箱基本上如亂葬崗,甚至漫延至後座!咁究竟當部 Hustler係 Jazz咁用又會點呢?
Hustler只有 4座位,但後座可以 50:50前後移動 160mm,摺合椅背時坐墊仲可以自動降低,輕易得出更大全平坦尾箱。而且為方便用家儲物,後座背有防滑膠墊,與尾箱之間空隙又有墊板遮蓋。「 Hustler呢一個 design好好,配合埋前座都可以摺平,我可以輕鬆鋪床,而且瞓落去背部更平坦,空間同 jazz差唔多,但一定好瞓咗。」




Hustler除咗可以摺平後座,前座乘客席都可以摺埋(右),令單人床鋪可用盡空間,你睇不動明王瞓入去仲有大把腳部空間。





不動明王部 Jazz前座摺唔埋,所以瞓入去只係剛剛夠位。


除可以摺平全部座位外, Hustler座位仲可以變成雙人卧床,可惜欠缺一個天窗睇星星。 細位見細心

座位變化可以令車廂空間起死回生,但不動明王車上嘅生活用品多到嚇親人,如果單靠未摺後座嘅尾箱,空間實在有限,載唔晒 Jazz尾箱嘅物件。不過唔緊要, Hustler有多樣小巧又實用設計,方便到不動明王。首先中控台首飾櫃分上下兩截儲物,上截嘅櫃門可以成為一張平坦細枱仔。而乘客座位底部原來亦內藏膠籃,不動明王話最啱用嚟放日常梳洗用品。此外,為方便掛物,前座前方及椅背都有掛勾,最啱買宵夜用。而且前座有活動手枕,影相影到手攰上車都有得挨下。「我最鍾意後座平地台,我部 Jazz都冇,可以放多好多嘢,你睇大大支腳架可以平晒咁放。」




Hustler因為要偷盡後座空間,所以尾箱好淺,床墊同膠箱要企直擺,而且有幾袋 Jazz尾箱放得落嘅嘢都擺唔晒,但其實後座可以推前 160mm咁就擺得落,再唔夠咪摺平晒後座囉(右)!





Jazz車身大尾箱亦深啲,單人床墊同儲物膠箱都可以放平擺。


後座全平地合擺長形物件如大腳架都冇問題,而且腳位超闊落,擺完嘢載人都唔會好迫。


首飾櫃門可翻落嚟變成枱仔,可乘重 1.5kg。


前座司機位唔只坐墊伸延到乘客位嗰邊夠晒鬆動,仲有個內藏儲物格嘅大手枕。 香港地夠用

其實 Hustler打出 K-Car牌頭,性能上已知冇驚喜,採用 658c.c.直三 turbo引擎,最大馬力 64匹,最大扭力 9.7kgm,好多馬力狂一聽到可能會嗤之以鼻,「行得郁嗎?」「開冷氣上唔上到斜?」少年,你真係太輕狂了! Hustler車重只得 820kg,低轉扭力充足,加速其實唔慢、唔吃力,試車坐 3人一樣表現爽朗。「以前嘅 K-Car都係 64匹,但今時今日車體更紮實,就算車速上到 100km/h,車內都冇雜聲,懸掛又帶有啲 sporty感覺,冇以前啲 K-car咁𠺘,整體行車表現比十幾年前嘅 K-Car大有進步。」




引入 Hustler之前 Suzuki專登派工程師嚟香港視察路面,確定 Hustler啱行先肯出口,實際試車表現亦同一般日本 1.3公升小車分別唔大,而且 140km/h極速已遠超香港車速上限。


後座嘅闊落程度其實拍得住 Noah之類巨型 MPV嘅中排,而且坐墊都唔算太短。


長方形中控台係簡單啲,但可以令前座空間感更大,而且用咗圓形出風口、冷氣掣同表板,加埋全幅飾板,完全唔覺 cheap。


雖然睇落兩張前座好似連埋一齊好平坦咁,但其實背部同坐墊都有凹位,代步揸都唔會𠺘來𠺘去。


後座對應 ISOFIX兒童座椅,最啱潮媽帶細路出街 shopping!


後座門板都有兩個杯架,超多雜物嘅女士大把地方擺嘢。

由於 K-Car限制馬力輸出, 64匹早就摸頂,車廠再向高性發展都嘥氣。 Hustler反而朝慳油、環保方面發展有更好出路,首先標準配停車自動熄匙系統,而且有 S-eNe Charge動能回收系統,可以轉化滑行或煞車時嘅動能為電能,再儲存到乘客座位底嘅鋰電池,幫輕電力輸出,從而慳油。以 27.8km/L耗油計算,行每公里只係$0.5,慳油到爆!




停車匙熄、循跡系統、電暖凳同射燈開關掣喺晒軚盤右下方,司機好就手。


話咗係日本頂級版,所以兩張前座都有電暖功能,但喺香港用嘅機會唔多。


雖然表板設計簡單,但個 mon.其實有好多資料顯示,動能回收狀態、速度、轉數、耗油、續航距離、停車熄匙時間同慳咗幾多油等乜都齊!


不動明王以前都係 K-Car車主,仲話而家啲 K-Car紮實咗好多。


圓形表板除有白色底燈,仲有藍色裝飾燈,簡單得嚟都幾精緻。


前座乘客席底攞開個購物籃後,就可以見到 S-eNe Charge動能回收系統嘅鋰電池,所以停車自動熄匙時都仍然可以有冷氣。


658c.c.turbo引擎有唔錯低轉扭力表現,配合車身只有 820kg,載 3人起步都唔怠慢。


無段變速波箱冇+/-模式,只有 S模式,可以用更高轉數榨取出力。 流浪車必備

你以為好似不動明王咁以車為家好難?佢當然有屋企,只不過每隔幾日先返去一次洗吓衫呀,換吓架生咁,你估真係鑽木取火咁原始咩!不過現代人以汽車流浪,都有好多用品要準備, Hustler就方便到佢嘞!



原廠靚帳
不動明王話,男人老狗喺車內換衫都冇人理,所以佢都冇帶換衫帳篷。但如果有女士同行,最好就梗係好似 Hustler咁有個原廠 fit位尾箱帳篷,用磁石固定位置,又可以拉開拉鏈用支架撐起變篷頂,落雨都可以野餐!售價未定,有興趣可以向代理查詢。



太陽能充電
電源方面,不動明王推介用太陽能充電,車內其實已有大大小小太陽能充電器,不過最誇都係大到可以當太陽擋咁用嘅發電板,凌晨瞓覺前放喺大銀幕,第日中午起身已充滿幾舊電池,夠電話用幾次,淘宝幾舊水有交易。



大量分電插
有時唔一定咁好太陽,而且當夜晚冇電時,就要靠車引擎發電,而一般車只得一個點煙插,所以不動明王有多個分插,可以應急之用。但佢話最好梗係好似 Hustler咁,尾箱都有電插,咁就 perfect嘞!



煮食靠水袋
Cock set係緊要,但冇水就乜都唔使煮!而且清潔水源可以食用之餘,清洗食具都好緊要,所以不動明王隨車有個 8L水袋,方便儲存、運送之餘,可以掛起靠地心吸力自動出水。而且佢仲好 buy前座底個籃。「呢個膠籃本來用嚟放鞋,不過我用嚟放梳洗用品就最方便,可以成籃攞出嚟去公共浴室用,而且又可以當水桶打水!」

撰文:袁國基
攝影:葉偉豪

 

    tvb4life 發表在 痞客邦 留言(0) 人氣()