壹科林

無得上網都玩到 離線 apps幫到手

Ads by Google

自從無限流動數據用量計劃選擇愈來愈少,加上公平使用原則之後,流動數據可以話珍貴過魚翅;月中就用完數據,要捱無得上網的日子,痛苦過牙痛無得瞓。
想慳住流量慢慢用,除了有 Wi-Fi先睇片、盡量開網頁版減少數據用量之外,離線 apps一樣幫到手,例如離線地圖、離線影片等,在有 Wi-Fi時先下載資訊,再離線慢慢睇,慳到錢又不怕數據不夠用,一舉兩得。

離線地圖  MAPS.ME

如果有用開離線地圖的用家,可能會話:「 Google地圖都有離線功能,點解要用 MAPS.ME?」最主要原因是 Google地圖支援的地方有限,好似台灣、日本、泰國等都不支援,如果想旅行同香港都用同一個離線地圖,最好就揀 MAPS.ME。使用方法好簡單,開啟 app後,直接選擇想要下載地區的地圖即可。香港地圖會包含在中國地圖之內,大約需 316MB空間。
地圖上亦會提供簡單的景點、食肆資料等,雖然不算詳細,不過作為離線地圖都算合格。最重要是在離線狀態下,都支援 GPS定位,只要在想去的地方點擊一下,就可以進行導航,相比其他地圖在離線下無法導航好用得多。當然只靠 GPS的情況下,定位的準確性會較低,但試用過仍能帶到路,偏差亦都算可接受。




MAPS.ME都可以睇到附近商鋪資料,不過由於容量有限,所以資料不多。


提供搜尋功能,更設有中文,都幾方便。


離線地圖都有導航功能,抵讚。

其他選擇:
Offline maps& Navigation
支援系統: Android
售價:免費

Galileo Offline Maps
支援系統: Android/ iOS
售價:免費

離線網頁  Offline browser

好多人都以為睇小說先用得着離線瀏覽器,其實有不少離線瀏覽器都具有下載相關連結功能,甚至可以自動下載,將想睇的資訊網站每日預先下載到手機,隨時想睇都得。而其中比較好用的,就是這款由 Gashaw Mola推出的 Offline browser,可以自定與想離線瀏覽的主頁相關的連結數目,同時亦可設定自動更新頁面數目及畫面質素等,並根據手機容量或記憶卡容量,作出設定。
支援系統: Android




設好下載連結頁面的數目,設定數目愈多,需要下載的資料亦愈多。


可開啟自動下載功能,自動將更新頁面下載到手機,不過長期開會令耗電量大增,針無兩頭利。

其他選擇:
OfflineBrowse
支援系統: iOS
售價:免費

離線煲劇 McTube( iOS)、 Fastest Video Downloader( Android)

睇韓劇、日劇,通常都會用睇開的影音播放器下載到手機,不過如果是 facebook,睇到精彩影片又想 share,每次都要 load一次,數據都好快用完。所以最慳流量的方法,是先將影片下載到手機,然後先播放俾朋友睇,就不怕浪費數據。無論 iOS或是 Android,都有推出下載影片離線睇的 app,使用時可先選擇影片的質素,然後下載。不過由於版權問題,千萬不要將影片下載後傳出,否則好易惹上法律責任。




只要輸入名稱,即可下載影片到手機,好方便。


支援 facebook影片下載,毋須每次左搵右搵。

其他選擇:
下載所有視頻
支援系統: Android
售價:免費

玩離線要準備……


64GB的 microSDXC快卡,售價約$150,想離線玩就無得慳。

想離線用途有不同功能,當然首先要有張容量夠大的記憶卡,單是一個地圖、幾段影片,隨時就會佔用上 GB位置,如果下載埋大型資訊網站離線睇,容量隨時更加多,所以最少要使用 64GB以上的記憶卡,先最穩陣。

撰文:蘆甘
插圖:祝健中
mailto:features@nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()