蘇錦樑買酒時,對方一度表示唔收錢,但佢堅持要俾,仲話「 this is the rule in Hong Kong」,之後自動波擺 pose同人影相。

眾人諸事

卡片蘇逛美酒展 特權買溝女酒

Ads by Google

創科局撥款終於過關,商務及經濟發展局局長蘇錦樑可以鬆一口氣,有讀者向記者報料,創科局撥款通過翌日,見到蘇錦樑現身會展,同老婆輕鬆逛國際美酒展。

國際美酒展由貿發局主辦,上週六最後一日先開放俾公眾入場,當日十二點左右,讀者喺意大利展館見到蘇錦樑同蘇太孖住行,並用一百四十蚊買咗一支 Le Rughe Moscato Dolce氣泡酒,但「卡片蘇」俾錢時話自己唔飲酒,係買俾老婆,之後捧住支酒笑騎騎同參展商影相。
直擊全程嘅讀者好奇怪,因為場內明明不設零售,讀者見到心頭好,想同參展酒莊洽購都失望而回,唔明點解卡片蘇會有特權買酒。翻查「展覽會規則」第 76D條,確係寫明「假若參展商在展覽場地展示價錢或向私人銷售貨品(而兩者皆不合乎展覽會性質及目的)或在展覽場地即時付貨,主辦機構有權即時終止參展商參展資格同封閉攤位」。
記者問過蘇錦樑嘅新聞秘書,佢話局長當日係自己買飛入場,同時否認有特權買酒,因為當日係開放俾公眾,至於參展商可唔可以零售,就要記者問番貿發局。貿發局發言人話,參展商最後一日可以決定係咪零售,但點解「展覽會規則」咁寫,佢哋就無解釋。

港大再洩錄音邊個最開心?

港大風波仍未落幕,梁智鴻校委會主席任期已喺上週五屆滿, 689又冇委任接任人,校委會戰場似乎仲「硝煙」不斷,雖然梁智鴻卸任前向法庭申請臨時禁制令,圖阻再有會議錄音流出,但有人無懼犯禁,轉戰境外台灣討論區,將校委王䓪鳴同校長馬斐森嘅會議對話上載。
政圈近日一直瘋傳,李國章仍係 689心中校委主席嘅不二之選,等區選後先公布;又或等李國章每次開會都當選暫代主席,令佢坐正變成理所當然。咁再有錄音流出,究竟邊個最開心?當李國章盛傳被委任後即有錄音流出,紀文鳳再被委任便有錄音曝光,近日王䓪鳴傳出係校委主席「黑馬」,錄音即時出現,洩密者明顯有針對性部署,除打擊梁粉,更打擊到主席之位嘅競爭者。早前提出公開會議記錄嘅校委會成員陳坤耀,有傳係主席人選之一,唔知會唔會因為早已開誠布公而冇有怕呢?







再有港大校委會會議錄音流出,最新「受害人」係擔任全國政協十六年嘅王䓪鳴。洩密者明顯具針對性,另一校委陳坤耀(小圖)亦被傳係主席人選之一,未知會否成為下一條洩密錄音嘅主角。(《蘋果日報》圖片) 藏漢協會踩場西藏節遭縱火

民間團體「香港與西藏同行」本月同中文大學學生會合作,舉辦第三屆香港西藏電影及文化節,呼籲港人關心中共暴力政權欺壓藏人事件。本週日喺尖沙咀商廈內嘅 1908書社舉行電影放映會,其間幾名可疑男子喺附近徘徊,活動開始唔夠十秒,佢哋就用件外套掩面,大叫火燭兼叫參加者疏散,然後施施然離開會場。
火燭事件擾攘個幾鐘,電影會差啲要押後,消防指後樓梯垃圾桶起火,認為可能有人亂掉煙頭,聲稱事件無可疑。不過記者喺後樓梯搵到燒到變晒形嘅垃圾桶蓋,蓋上竟然放咗錫紙同木塊,好明顯有人早有預謀製造混亂。有參加者認得可疑人士呢幾日都有出席相關活動,睇嚟早已摸清門路。
主辦單位搞呢個活動一波三折,早前中大以題材敏感為由,三度拒絕借出場地展覽;上週一喺中大舉行開幕禮,以及上週六喺 1908書社播放電影時,香港藏漢友好協會曾派人到場拉橫額及派單張抗議「藏獨」,搞到主辦單位一頭霧水。本週五至日仍會有西藏節相關街頭活動及放映會,唔知搞事嘅人仲有咩新招數阻撓搞破壞呢?




位於尖沙咀鬧市嘅 1908書社星期日舉行西藏節活動,但失驚無神火燭,搞到活動差啲要押後。(莫智謙攝)


後樓梯垃圾桶蓋燒至變形,消防話起火原因冇可疑,但記者發現起火地方有錫紙同木塊,睇怕唔係喺商廈後樓梯 BBQ啩。(莫智謙攝)


呢個可疑男子兩次出席西藏節活動,有參加者指火燭期間佢有份「睇水」及大叫火燭,叫人離開書社。(莫智謙攝) 工黨叛將辭政府工參選


本刊踢爆劉舒燕選舉代理人身份後,曾保薦佢入工黨嘅郭紹傑大嘆「家門不幸」。(翁少陽攝)

本刊上期踢爆工黨前成員劉舒燕出選九龍城馬坑涌,佢嘅選舉代理人雷文鋒疑有建制派背景,劉舒燕𠝹泛民選票嘅動機呼之欲出。報導一出街,工黨執行委員郭紹傑喺社交網站大嘆「家門不幸」,其後劉舒燕留言反駁話:「我上年已無交會費,不明白為何成日當我黨友?!」
郭紹傑不甘示弱,大翻劉舒燕舊賬,上屆區選佢唔單只想做義工,仲想參選,協助人民力量對泛民「票債票償」,只因報名當日先發現自己打政府工唔可以參選,「柒到冇朋友」。郭亦批評當日有份保薦劉舒燕嘅朋友「唔死都無用」。
劉舒燕喺破產管理處打工,舊同事話佢係合約員工,九月尾突然急急主動終止合約,可能要賠錢俾政府,其他同事聽到都好愕然。曾堅稱要有全職收入交租嘅佢唔知係咪有其他大水喉射住,先咁勇參選?

撰文:巫不言
mailto:news@nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()