爆壹爆

尖咀神秘 Secret Club

Ads by Google

最近夜遊界有一個傳聞,話尖沙咀有一間好神秘嘅 spa骨場,而且收費超貴,比一般五星級骨場仲要高添,不過冇乜人知呢間場喺邊度。爆哥人面廣,終於搵到呢間場嘅網頁。嘩,佢個名已經好神秘喎,叫做「 Secret X Spa Club」,個網頁係全英文,除咗有好多性感相片外,仲寫明各種服務項目。

啲服務字眼好鬼露骨,例如有「 shower together」(一齊沖涼)、「 Body to body Slide Massage」(人體滑動按摩)、「 Sexual erogenous areas reflexology」(性敏感部位按摩),有一項仲叫「 Happy End Massage」添,擺明唔正經啦。至於收費就得人驚囉,分「堂食」同「外賣」,由六百至三千幾,仲標榜所有技師都係十九至廿四歲嘅高質少女添。不過,網頁上冇地址,要好神秘打電話預約,先會俾地址客人。
爆哥於是打電話去 booking,睇吓間場咩料。聽電話嘅女職員口音,應該係泰國人,廣東話麻麻哋。爆哥之後跟指示,去到金馬倫道一幢舊式商住大廈,間場連招牌都冇,門口仲有密碼鎖。按鐘後,有一名著住行政制服嘅女職員開門。以為呢間場收到咁貴,一定係豪裝啦,點知入到去先發覺,同旺角砵蘭街收三百五十蚊嘅指壓場差唔多,裡面大概有六間房,部分有獨立浴室。而網頁所講嘅高質少女,原來是一個年過三十,貌似新移民嘅女子。呢間場,擺明專做唔熟行情嘅遊客生意,扮 secret劏到啲客一頸血。




男人的秘密,大家流傳的神秘網頁。


哇,馬檻咁扮高檔。


呢位阿姐就係高質少女啦,講緊十五年前。 熱血候選人 傳來自江湖

今年區議會選舉好似特別熱鬧,因為有好多新面孔。而一向行為激進聲大大嘅熱血公民,就派咗六個人出嚟選。爆哥近日睇佢哋嘅 fb,當堂嚇咗一跳,佢哋為咗順順利利,話事人黃洋達,率領班候選人去古廟拜神,成個造型好似電影「黑社會」拜關公一樣。
咁重江湖味,跟住就有人喺社交群組,瘋傳一張案件文件嘅相片,話熱血其中一個參選人蔡文龍,曾經喺○八年犯過自稱三合會成員罪行,一二年又犯過藏有攻擊性武器添,而個被告咁啱都係叫蔡文龍。爆哥上星期去咗香港仔,直接查問佢呢單嘢堅定流,蔡文龍就澄清話犯事嘅人唔係佢。佢都曾經查過黃頁,全香港有五十幾個蔡文龍,同名同姓唔出奇,又話自己只係十幾年前犯過一次法,就係不小心過馬路,之後就一直都奉公守法啦。
同選區仲有:民建聯彭永基、民主黨羅健熙同獨立候選人鄧嘉樂。







翁靜晶挑寶蓮寺方丈機

爆出定慧寺風波嘅翁靜晶,呢期搞到好多人頭痕。上星期五晚,爆哥收到風知佢去中文大學,旁聽一個佛學講座,講者之一就係下任寶蓮寺方丈淨因法師喎!嘩,咁嘅組合,梗係以為翁會連環質問佛門醜聞㗎?不過去到冇火爆場面,翁靜晶好淑女咁冇搞寸個 party,佢只係問淨因法師,如果有佛門中人戴 Rolex坐 Benz,生活非常奢華,應該如何看待呢?
翁靜晶問得含蓄,反而呢位擁有倫敦大學亞非學院佛學博士的淨因法師仲答得直接:「你以為和尚都是好人?學佛的人都是好人?你以為燒香的人都是好人?」佢又話:「如果沒有錯沒有缺點的人根本不是人,他是神!有缺點才可愛,人生最大的優點就是不完美,把不完美變成完美才是真正的道理。」
咁好人壞人冇爆機場面,專登來睇熱鬧嘅爆哥即刻眼瞓,閃先。

爆哥乜料

金融界撈家,穿梭黑白政商界,朋友遍布旺角至中環,每星期都八到
唔同料,同《壹》仔讀者過吓癮!

tvb4life 發表在 痞客邦 留言(0) 人氣()