安室奈美惠相隔三年再次舉行香港演唱會,仲早半年嚟到宣傳,可見重視程度。

外太空

女王來襲 安室奈美惠

Ads by Google

時下人人都可以係女神,只要喺 Instagram放吓自拍、改圖改到變 V字面,呃 like話咁易。恕我呢啲 80後唔識欣賞,女神可以通街都係,不過能夠成為天后就無幾多個,好似有好想睇但睇唔到嘅麥當娜,或者係日本歌姫安室奈美惠。下年三月安室將會嚟到香港舉行演唱會,最近仲專程到港率先宣傳,好錫香港 fans呀!

巡迴演唱 44場

喺日本樂壇,安室奈美惠可以話係上咗神台,近年即使唔宣傳,新曲及大碟一樣受歡迎,甚少喺電視上演出,所以歌迷想睇佢唱歌,無得慳一定要買飛入場睇佢演唱會。今年安室舉行《 namie amuro LIVE GENIC 2015-2016》巡迴演唱會,喺日本 15個地方做 44場,以日本歌手嚟講算係大規模,不過依然一票難求。今次佢仲挑選咗香港同台灣兩個地方做海外演出,下年 3月 5及 6號喺台北小巨蛋演出兩場,到 26號再嚟到香港,喺亞洲博覽館演出。 2013年安室奈美惠第一次喺香港舉行 20周年演唱會,相隔三年重臨香港,歌迷都非常期待!




安室喺記者會上全程笑容滿面,不過低抄影上去,好似見到有雙下巴,睇嚟天后要再操 fit啲先得喇!


安室嚟香港三日兩夜,星期日晚到埗時見到大班 fans接機,冰山美人都被融化親民揮手!


安室今年 38歲,演唱會跳足兩個鐘,運動量好大,不過佢都堅持帶最好嘅表演俾觀眾,天后級果然零舍不同。 跨界別合作 追求創新

今次《 LIVE GENIC》喺 9月於埼玉揭幕,貫徹佢一向「少說話多做事」作風,全個演唱會無傾偈環節,唱足兩個鐘,難得開金口嘅兩句說話係一開場問「大家 high唔 high?」,以及完場前「多謝大家,拜拜!」,真係講多一粒字都無!演唱會華麗別致嘅舞台設計,加上精彩強勁嘅舞步及唱功,迷倒 fans!其實安室奈美惠出道廿二年,人氣依然咁強勁,其中一個原因係佢力求追新,不斷搵有才華嘅人合作,今年尤其厲害,可以話係「 Crossover之年」!最令人矚目嘅係同虛擬歌手初音 Miku合作,連海外嘅動漫 fans都非常興奮,可以同 J-Pop女王合作,簡直係實力嘅肯定!另一個安室嘅合作對象係台灣天后蔡依林,安室仲專程為佢嘅演唱會做嘉賓,唔知今次亞洲演唱會, Jolin會唔會做番嘉賓客串吓呢?




蔡依林同安室嘅合唱歌《 I'm not Yours》玩中國古代風, MV中化身美艷歌姫,被網友大讚好似貂嬋同妲己咁靚。


虛擬歌手初音 Miku(左)喺日本人氣強勁, fans話想睇到安室同佢合作嘅 MV,就有呢個全 CG製作嘅製成品, fans覺得初音靚啲定係卡通版安室靚啲呢?


安室新曲《 Red Carpet》下個月推出,不過封面一出就被網友惡搞,因為佢身後嘅紅布好似五星旗,仲改到安室變咗解放軍,真係老貓燒鬚!

撰文:關錦雯
攝影、攝錄:梁炳權

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()