娛樂偵訊

擺門氹四大出頒獎禮 無綫俾周柏豪做男一

Ads by Google

09年因版權問題,無綫跟四大唱片公司反面後,過去五年星光不再,只有自己友出席的《勁歌》頒獎禮場面冷清;經陳國強多番斡旋,今年 9月頭馬余詠珊再出面擺和頭酒,以團結振興樂壇做招牌,企圖拆彈。不過四大之一的環球唱片唔受氹,余詠珊於是再出招,以音樂電影角色換出席率,搵華納歌手周柏豪做男一,務求搵到外援「振興」自己頒獎禮。

搶頭啖湯

年尾的音樂頒獎禮擺明是分豬肉獎,但無綫仲要爭頭啖湯,搶在十二月二十日做第一個派成績表。唔想開壞頭,九月中,余詠珊搵埋老公、星夢音樂揸弗人何哲圖一齊扮「矮仔」,吹雞請各大唱片公司食飯,席上主動派糖,表示要開更多音樂節目讓其他歌手演出。
「食完嗰餐飯之後,余詠珊佢哋仲有繼續跟進,希望進一步搞番好啲關係。好似 Sony嘅林奕匡,雖然今年佢個勢冇舊年咁好,但都有一首歌,無綫會照俾獎佢, Sony亦答應交人。」知情者說。
過去幾年,大台硬封殺四大唱片歌手,到頭來損人不利己,惡果自嘗。
「呢幾年無綫淨係捧自己友,但華納都有辦法做到周柏豪同連詩雅上晒位,今時今日,靠攞獎根本冇用,無綫亦知道硬招唔掂,所以改用軟功,佢哋準備咗份大禮俾華納,搵周柏豪做音樂電影《愛情來的時候》其中一部男主角,女主角亦唔會求其俾個蛋散出嚟,好大機會係 Grace(陳凱琳)。」




今年《勁歌》總選頒獎禮,得自己友加英皇撐場,最大粒星只有容祖兒,場面冷清。





九月中,余詠珊出馬帶埋老公何哲圖跟唱片公司食飯,不過擺完「和頭酒」,未見關係完全修好。


黃翠如跟洪永城屬方丈馬房,兩人又齊齊被安排拍《愛情》片。


交換禮物

據了解,無綫今年會重手炮製音樂電影,佘詩曼同終於肯續約的馬國明有份外,隸屬余詠珊馬房的黃翠如、洪永城及吳若希都在陣中,暫時周柏豪是唯一外援。
「周柏豪可以做男一,華納嗰邊都會做番啲嘢,所以衞蘭同連詩雅今年一定會出席 TVB頒獎禮。三大唱片公司叫做搞掂,目前只係得環球唔就範,除咗自己話事嘅李克勤會同祖兒一齊攞獎,陳慧琳要開個唱唔會到,至於 Eason就要去加拿大做騷。」知情者說。
無綫開閘自救,但環球唱片唔賣賬,公司的助理總經理譚先生回應說:「我哋已經冇去幾年,之前亦冇派歌手參加季選,所以全環球簽咗約嘅歌手,都唔會參與。」




吳若希近排緋聞多多,但依然有份拍《愛情》電影被力捧。


陳凱琳有機會跟周柏豪合作,在電影中飾演情侶。


無綫去年開拍微電影《愛情來的時候》,搵來韓星及台星演出,十分大陣仗。 得寸進尺

無綫和環球唱片因歌星合約及版稅問題爭拗,去年一度破冰,環球旗下歌手陸續亮相大台節目,但因無綫得寸進尺,令到雙方的關係再倒退,重回冰河期。



14年 4月 合作告吹
無綫希望邀請譚詠麟和李克勤為 14年的世界盃節目唱主題曲,並要求擁有歌曲版權,基於版權是唱片公司財產,環球不同意無綫提出的不合理要求,最終合作告吹,再度激嬲無綫。



14年 6月 請食白果
《勁歌金曲》優秀選第一回,環球的吳雨霏和 Mr.有份角逐,但賽果卻爆冷慘食白果,之後無綫再邀請出席第二回優秀選,環球睬你都傻。



15年 8月 俾都唔要
無綫綜藝節目監製麥鎮東向環球唱片借將,得到陳慧琳、吳雨霏及盧冠廷答應俾期做《星光熠熠耀保良》表演嘉賓,但余詠珊突然反口,飛起 Kelly同 Kary,再度辣㷫環球。

撰文、攝影、攝錄:娛樂組

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()