要有規律的午膳時間,切忌食 tea當食 lunch。

職刻十大

打工仔防癌 10式

Ads by Google

近日世衞將加工肉類列為第一類致癌物,與煙草、石棉並列。消息一出,令平日在茶記食開腸仔、煙肉做早餐的上班族,即刻冇啖好食。〈職刻十大〉為各打工仔女的健康着想,向中、西醫及營養師搜集意見,整理了 10個防癌貼士,令大家可以健健康康,做到退休。

1. 3餐定時定分


中醫師林廸龍

註冊中醫師林廸龍表示:「飲食失調,經常食得過飽或用餐時間唔規律,都會令人體陰陽失調,加上痰、瘀、熱等病邪互相結合,長期持續可形成腫瘤。打工仔要防癌最簡單就係 3餐定時及定分量,飲食有規律。」

2.黃耆、黨參提神


相信有不少打工仔每朝都要一杯「回魂啡」,但為健康着想,應改用黃耆、黨參焗水飲。

世衞將咖啡列為 2B級致癌物,唔飲咖啡,林醫師建議可用黃耆、黨參焗水代替,「黃耆補氣,黨參益氣生津,適合有氣冇力、容易疲倦者飲用。黃耆、黨參各 2錢,用熱水焗 20分鐘即可,但陰虛火旺者不宜飲用。」

3.防癌湯水

防癌食品眾多,林醫師推介了防癌湯水,「薏仁、蓮子都係防癌食品,可以煲薏仁蓮子百合湯。熟薏仁 30克,其他材料各 50克,再加瘦肉 500克,水滾後慢火煲個半鐘即可。除預防癌症外,仲健脾利水,養心補腎。」

4.藍莓防大腸癌

大腸癌是香港第二號癌症殺手,健諾營養中心營養顧問 Angela表示,藍莓可預防大腸癌,「藍莓所含嘅紫檀芪,能有效對抗大腸病變,預防大腸癌。加上,藍莓當中嘅花青素,係效果好好嘅抗氧化劑,有效抑制血管發炎、癌細胞等。」




藍莓洗乾淨就食得,帶返公司食好方便。


營養顧問Angela 5.薑黃調味


薑黃是效果顯著的抗氧化劑,可抑制自由基,保護細胞。

平日煮咖哩會用到的薑黃,原來是癌症剋星, Angela表示:「外國嘅實驗中發現薑黃可殺死癌細胞,即使係存活落嚟嘅癌細胞,生長嘅速度亦會減慢。雖然薑黃抗癌仍有待進一步研究,但平時煮餸不妨多用嚟調味。」

6.燕麥粥早餐


燕麥粥不旦方便,口味亦有很多選擇。

食腸仔、煙肉做早餐易傷身, Angela建議用燕麥粥取代,「天氣開始凍,大家可能嫌食粟米片、鮮奶凍冰冰,不妨早餐改食燕麥粥。唔使煮,用熱水一沖就食得,簡單方便,返工超趕都整到。」

7.勿吃隔夜菜


綠葉蔬菜所含的硝酸鹽成分最多,要避免隔夜食用。

上班族會帶飯返工, Angela提醒不要吃隔夜蔬菜,「綠葉蔬菜有較多硝酸鹽,煮熟後放置嘅時間過耐嘅話,喺細菌分解作用下,硝酸鹽會還原成亞硝酸鹽,有致癌嘅風險。如果要帶飯,最好揀瓜類蔬菜。」

8.蒸飯好過叮飯


坊間有不少蒸飯器,設計輕巧,適合放在公司加熱飯菜。

除了避免叮隔夜綠葉蔬菜外, Angela表示翻熱飯盒用蒸法更佳,「微波爐加熱食物會致癌呢種說法依然存有爭議,但我建議大家可以蒸飯,而唔好叮飯,食物營養流失得少啲,飯餸味道亦比較可口。」
購買點: http://www.fingershopping.com 

9.癌症剋星蕃茄

多吃蔬果能防癌眾所周知,家庭醫生關嘉美認為番茄更是首選,「番茄可促進一啲有防癌作用嘅細胞分泌,同時亦有效清除自由基。不過,番茄係脂溶性,烹調時加啲油,人體吸收嘅效果更佳。」




番茄愈紅,茄紅素愈多,營養價值愈高。


家庭醫生關嘉美 10.手機勿放床邊


睡覺時應關掉手機,並放在遠離床邊的位置。網上圖片

好多上班族都是用手機當鬧鐘,關醫生表示手機可能會增加患癌風險,「手機會發出小劑量嘅幅射,如果長期接觸,有機會增加腫瘤生長嘅風險。雖然手機致癌有待進一步證實,但大家喺時候改改手機放床邊瞓覺嘅壞習慣。」

撰文、攝影:杜曉婷

    tvb4life 發表在 痞客邦 留言(0) 人氣()