專題 Log In

龍和道變 M-Benz越野戰場

Ads by Google

一年前,香港人對真普選嘅堅持令龍和道變行人路;一年後, M-Benz為顯示旗下 SUV實力,上個禮拜就再次將龍和道變到面目全非,運嚟數以噸計嘅碎石沙泥,將中環摩天輪下嘅維港海濱變成越野戰場!

相信大家對中環龍和道嘅海濱場景都非常熟悉,呢度年頭係嘉年華會、年中係荔園、年尾係美酒佳餚巡禮,但就從未試過好似 M-Benz今次起個沙丘出嚟咁誇張!因為廠方搵咗 M-Benz Driving Academy高級駕駛駕駛課程嘅首席教官 Mr. Peter Hackett,帶埋一班現役 GT3車手嚟 set場,碎石、爛胎、木樁、沙丘、泥漿地等乜嘢爛路都有,仲要成個 M-Benz SUV車系全齊任試,為嘅就係話畀大家知佢哋唔係剩係得個樣, 4Matic四驅同一系列輔助系統都真係堅!不過講到尾最緊要係為最新到港嘅中型 SUV—— GLC造勢。

零技術脫險境

雖則 M-Benz搵嚟專家坐陣,但其實主要作用只係 set場同控制試車流程,因為無論 GLA、 GLC定 GLE,只要有 4MATIC四驅、越野模式同 DSR落山車速控制系統,任何一個有車牌嘅人,跟住雪糕筒嘅路線行,都可以輕易過晒以上所有崎嶇路面。除咗顯示到 M-Benz車系嘅輔助系統有幾強之外,亦可見專家 set場嘅功力。

三輪過小沙丘

全場最激係呢段要過 3個升高達 1m沙丘嘅路段,因為沙丘會將對角前後轆升高離地, GLC同 GLE駛過時唔單只唔會撞底,得三個車輪著地仍然可以前進,全靠 4MATIC四驅系統識將動力自動分配去有抓著力嘅車輪。不過 GLA因為離地距低啲,就要行另一條低約 1/3嘅沙丘路嘞。










除 5個 On-road駕駛模式外,仲有 4個 Off-road駕駛模式,揀 Incline就可以行晒。 衝住過泥漿浴

維港同龍和道之間嘅活動空間,地下本身已經冇舖石屎,今次 M-Benz仲要喺上面舖滿沙泥,再喺試車路線加入廢胎同打橫攔路嘅樹幹做障礙物,對於車身高同有四驅系統嘅 M-Benz SUV車系仍然全無難度,身為 GT3車手嘅導師仲要不停喺沙地上激飛到沙塵滾滾畀人試坐。不過最過癮係一段淋濕晒嘅泥漿地,喺上面停定大腳踩油起步,四個轆竟然一啲都唔打滑, Traction Control嘅控制力果然堅!
















屏幕有行車資訊顯示,轉向角度、車身斜度同 G force等全齊。 極斜爬上二樓

場中最大嘅沙丘有成二樓咁高,斜度超過 30,先喺外圍打側駛過,成架車斜晒仍唔會翻車!再慢慢爬上沙丘頂部,仲要喺中途停定,放晒油門、 brake,唔拉手掣防溜後系統一樣可以 hold住部車。上到頂落番斜時,又有 DSR落山車速控制系統,一樣唔使踩油門、 brake,就會自動以 set咗嘅 2km/h慢溜路斜。













DSR系統(右)可以自動控制落山車速,用定速巡航系統就可以 set定目標車速。 地獄價撼對手

雖然今次有齊大中細碼 SUV試,不過主角始終都係最新嘅中型 GLC。同之前喺瑞士、德國同法國試嘅版本比, 211匹 GLC250型號基本上一樣,但特別啲嘅係香港會引入之前未試過嘅 245匹 GLC300,仲有加晒紀念章同用鑽石形縫線內籠嘅 Edition 1初回限定版!雖然今次冇得做街道測試,但大家最關心嘅售價就終於公佈, GLC250入門版竟然以 50萬有找開賣,車款最新但都比同級平成 5-7萬!而最貴嘅 GLC300雖然 245匹馬力比 272匹嘅 Audi Q5 3.0 TFSI同 306匹嘅 BMW X3 xDrive35i低少少,但 60萬定價就平咗 7萬以上!以 M-Benz嘅牌頭都竟然會賣得平過人,可見 GLC肯定會搶晒同級市場。






撰文:陳致新
攝影:葉偉豪
部分相片提供: M-Benz HK

    tvb4life 發表在 痞客邦 留言(0) 人氣()