新車激試

只有更熱血  Honda Civic Type R

Ads by Google

上世紀 90年代係日本跑車嘅火紅年代, Honda「 Type R」系列嘅大名更加係家傳戶曉。眾多「 Type R」車系中,以 Civic Type R最膽正命平,車輕、高轉引擎、好彎,早已成為 Civic Type R嘅代名詞,一度成為 MK人士朝拜神車!由 1997年第 1代 Civic Type R至今歷時 18年,正好 18年後又一條好漢!第 4代 Civic Type R只不過剛剛日本推出,香港代理已率先引入,而且係多年來第一款行貨 Type R。
究竟最新一代 Civic Type R進化到乜嘢地步?仲係唔係停留 MK車神階段?唔使估估吓嘞!《搵車快線》搵嚟歷代 Civic Type R同場現身,睇吓新一代有幾堅!

全新一代編號 FK2嘅 Civic Type R,其實只係今年 3月先喺日內瓦車展展出,仍然由英國 Honda製造,所以日本市場都要喺剛剛舉行嘅東京車展上先現身,而且日本只有 750部限量發售,香港代理快人一步,年中已收訂,據知首批車主喺聖誕前就有新車揸,而我哋《搵車快線》更加喺 10月中已經試車。睇到報導先打算買車?唯有排 2016年 quota嘞!




FK2(左)嘅車身造型雖然係 5門揭背車,但車尾凸出,似上代 FD2。


基因突變

廠方用「 Race car for the road」呢一句宣傳新車,目的就係進一步加強 Civic Type R嘅賽車元素,但唔係一句說話就可以呃人買車,必須要有強而有力嘅真材實料先可以令人信服。歷代 Civic Type R其實都刻意賣弄跑格外表,上代 FD2尤其厲害,不過對住今代 FK2,真係可以企埋一邊! FK2雖然用 5門揭背外表,但四輪有明顯誇張拋沙板設計,肌肉橫生如變形俠醫,而且基因突變後,車尾更誇到用四出式尾喉及雙層尾翼!如果要數日本原裝車誇張之最,筆者一定揀 FK2!誇張之外, FK2都有細心位,好似 19吋原裝軨圍紅邊、車身下半包圍又用黑色,令整體望落冇咁雜亂。
第 1代 EK9車主 BT:「我就覺得新一代好似受咗幅射咁,成身一嚿嚿,好多多餘嘅嘢。不過外觀真係好個人,我知𠵱家所有新車都係朝呢個方向設計,咁先至有收視,唔可能再好似 EK9咁低調。以前嘅 EK9全車最惹鬼都只係對凳,新一代全身都惹鬼!」




前輪沙板極其誇張,上下方都散熱孔,確保前輪有最好散熱效能,中央部分仲係一體成形嘅輕量化製作。


首用四出式尾喉,而且中間有導風板,減少高速時車底氣流。


戰鬥味重

冇錯,新一代 FK2外表實在嚇鬼,但其實又點只外表夠煞,甚至車廂佈局都誓要迫你車手上身!進入車廂,一對巨型紅黑色布料桶凳會完全吸住你目光,包承力好得嚟比同場 FD2嘅前座軟身,有一定舒適性。不過由於桶凳上只繡上「 Type R」字,唔及 EK9及 EP3嘅鮮紅桶凳由 Recaro代工咁巴閉。後座方面,一如前 3代都係雙座位設計,不過首次加入可調式頭枕,配合埋腳位空間冇凸槽,高佬朋友都唔會投訴。




EP3EP3係首款由英國製嘅 Civic Type R,亦係唯一一款用中控台波棍。


EK9元祖 Civic Type R車廂極之簡單,當年一對火紅 Recaro桶凳成為偷車焦點。


FD2FD2冇咗 Recaro桶凳,但後座就首次加頭枕。

第 2代 EP3車主 Dan:「新款改成 5門 hatch back係好事,因為歐洲市場好興呢類車,而且我幾欣賞佢將後座門手抽收喺 C柱位置,令車側望落有 3門車嘅形態,實際使用又有 5門車嘅方便,雖然後座都好少用,但上落時都唔使前座乘客吓吓落車。至於對前座,我就覺得佢幾好坐,未至於令到個人郁都郁唔到,大腿位有少少鬆動,長時間坐都唔侷促。」







前輪配 235/35R19輪胎,再加上 brembo 4遮鮑魚及 350mm鑽孔碟,好收!


唔係睇見都唔信!後座竟然可以潛落地台,得出全平尾廂,實用!


前座椅背其實唔厚,後面仲有散熱孔造型。


後座只用紅色安全帶,未有跟前座同一 design,但座椅其實偷到勁輕。


前座紅色配黑色,而且大腿位置較闊,視覺或乘坐感都一流。 赤紅為記

紅色一向係 Honda Type R家族嘅代表顏色,所以 FK2除咗前座滲入紅色外,車內多處都用紅色點綴一下,好似真皮軚盤、座椅繡紅線、安全帶、就連地毯都有紅邊,實行要你被赤紅熱血氣氛包圍。此外, FK2嘅軚盤其實前所未有咁豪華, 3、 9點位分別有定速系統、音響及行車資訊設定掣,拍得住 Odyssey咁齊料!
第 3代 FD2 RR車主 Jun:「新款多咗好多方便、舒適性嘅設備,整體高級咗好多,我部 RR都仲要插車匙然後撳掣撻車,新一代直頭又 Keyless、又定速系統、又停車自動熄匙,設備拍得住啲德國車,相信係因為新車想進一步打入歐洲市場,所以先咁齊料。」




連尾翼都用誇張形狀及雙色設計, FK2真係歷代最招積。


進入+R模式,表板即變成紅圈顯示。 撳+變身

以前嘅 Civic Type R簡單、冇乜電子嘢,但新一代冇可能再 cheap落去,而且加大馬力輸出要有一定新系統配合,先可以更易駕馭,當然都要搞下 gimmick。 Fk2加入「+R」掣,簡單講就好似食咗大力丸咁,進入+R模式,表板會先泛起紅光,引擎會變得高轉,冷氣會減弱。而轉向系統輔助力都會減少及變得敏感,更重要係懸掛吸震筒會加硬 30%,令整體駕駛感覺改變。老實講,筆者覺得+R模式唔算好極端,因為始終用棍波操作,加速反應早隨駕駛者心意,吸震筒就算硬 30%,如非駛過好爛嘅路,筆者仍然覺得+R模式日常使用都可以,當然如用 Normal模式,整體可以舒適到接近家庭房車。




中控台愈來愈簡單,連一個扭掣都冇,反而軚盤就多咗設定掣,高級晒!


㩒個「+R」掣,就可以全車進入戰鬥模式,連中控台顯示屏都有更多顯示。


上層速度表以跳字顯示,而上方仲有轉波指示燈,右邊方格係波檔顯示。 首玩 Tubro

Civic Type R可謂見證日本小跑車嘅發展,由 EK9嘅 1.6公升直四引擎,發展到 EP3及 FD2嘅 2.0公升直四,再到今代 FK2嘅 2.0公升直四 Turbo!馬力由當年嘅 185匹變成現時嘅 310匹!最大扭力更因為 Turbo幫助,有成 40.8kgm, 0-100km/h只需 5.7秒,係量產前驅車加速之王!係, FK2係一部 310匹嘅前驅車,你擔心佢會入彎推頭難以操控?唔好用你嘅汽車常識去估計 FK2,因為佢真係估唔到咁好彎!筆者喺多彎嘅鹿頸一帶試車,好幾次以一般頭驅車會推頭嘅速度入彎,但 FK2車頭好似有膠水一樣黏住轉彎軌跡,車尾乖乖跟住車頭而行,冇推頭、冇甩尾,唔講會以為佢係四驅,但又冇四驅嘅沉悶感覺,整體靈活得多!




FD2配 6速手波, RR嘅引擎比普通 FD2更強,經 MUGEN改造後,馬力達 240匹!


EP3係首部英國 Civic Type R,波棍外表奇特全為更貼近軚盤,而且引擎仍然有高回轉特性。


EK9採用 1.6公升引擎配 5速手波,引擎可以上到 8,400rpm紅區,發揮自然吸氣引擎極限。

唔使問阿貴都知 FK2肯定係史上最堅嘅 Civic Type R,筆者更認為佢可以喺彎路上 K.O.掃把佬及露筍,不過快咗嘅 FK2仲有冇以往嘅 Civic Type R高回轉引擎特色? Sorry,冇晒!因為 FK2紅區只係 7,200rpm,亦再冇引擎高轉嘅「 TEC聲」,換嚟較沉實排氣聲同放氣嘩佬聲,以及唔需要等轉數都有嘅加速力,畢竟針冇兩頭利嘅。




5.7秒完成 0-100km/h,係目前加速最快量產前驅車!


首次轉用 VTEC Turbo引擎,雖然冇咗自然吸氣引擎嘅高轉風味,但馬力達到 310匹,更重要係有 40.8kgm扭力,加速力隨傳隨到!


6速手波係 Civic Type R傳統,今代都冇改,保留最原始操控,但留意波棍前面,加咗停車自動熄匙掣。


3代有雙生兒  Civic Type R(FN2)

第 2代 EP3開始由英國生產,去到第 3代更爆出 2個唔同版本嘅 Civic Type R,日本採用編號 FD2嘅 4門版;而歐洲就採用編號 FN2嘅 3門揭背版,引擎、波箱規格都一樣,但馬力只有 201匹,軸距只得 2,620m。香港早幾年都有水貨引入,不過因為實力同外表都唔及 FD2,所以少人用。

撰文:袁國基
攝影:葉偉豪

    tvb4life 發表在 痞客邦 留言(0) 人氣()