呢度 11位《刺客信條》系列 fans,真係夾好晒個個唔同 look,咁多集主角齊人,連《 Farcry》、《 Watchdog》、《 Rainbow Six》特種部隊都有人扮

A.C.G.U.

Rainbow Six 宅擊秋葉原 UBIDAY 2015

Ads by Google

日本人鍾情一本道 RPG同萌系遊戲,但今時今日,日系大廠遊戲買少見少、改攻手機 game,喜愛用家用機打機的玩家,唔玩美系射擊可能真係冇嘢玩,形成 FPS好似愈來愈 hit。
上星期三( 11月 3日), UBISOFT Japan食住日本連休日,喺日本遊戲文化 stronghold秋葉原搞遊戲同樂日,《 FACE》殺到東京獨家直擊,免費入場食玩買,試盡最新 FPS《 Rainbow Six Siege》,仲有期待指數爆燈的 MMOFPS《 Tom Clancy's The Division》, AKIBA大槍戰!

 







食物車的土耳其烤肉包、炸魚薯條出奇大件抵食,最好笑係個「刺客包」,原來只係印咗遊戲 logo的豬柳強, 450yen少少貴。





畀 100円就可以幫你畫 Ubi遊戲相關嘅紋身彩繪。


UBISOFT的紀念品以服裝為主,全部歐洲設計,用料亦靚約$260


R6刺繡章各約$100、手機袋約$130 番外篇  Ubi可否不要老

呢幾個靚女 reception,記者隱約記得在 UBISOFT 2013已經見過,點解日本女仔好似唔識老嘅?







Ubi日本老頂 Steve Miller 「亞洲區應該 VR掂過 AR」


Ubisoft亞洲總監 Steve Miller先生 80年代開始在日本做遊戲,為人風趣,仲喺記者條 360全景片內客串一角,記得留意!

Steve係日本遊戲通,佢都同意日本、亞洲玩家口味係跟歐美完全唔同,好似 Sony對 PS VR眼罩,佢就幾睇好:「 AR方面我知道嘅仲未夠多,而 Ubisoft已經有着手研究 PS VR遊戲,可以講多少少。我睇好 VR在日本前景,唔單只因為亞洲人住家普遍較歐美細,物理上冇咁及 AR(需要跟實景互動),而且日本人好珍惜私人空間,打機都喜歡單機多過連線, VR眼罩畀到一個密室佢哋,啱晒口味。」
而提到 FPS/歐美遊戲在日本係咪愈來愈受重視,佢解釋:「歐系遊戲在日本仍然係小眾,其實係日本的大作沒落,去晒搞手提小品,喜歡大場面、靚體驗嘅家用遊戲機主,唔玩歐廠作品就冇嘢玩,所以的確係推廣好時機,尤其近年 e-sports電競在亞洲大熱,我唔可以好實際話你知 Ubisoft未來有乜動向,但我哋未來一定會在 e-sports上擔任一個推動角色,會細心聽 e-sports參加者要求。」

日本少有 歐美 game同樂日


刺客袖中劍 cosplay道具約$400

日廠勢弱,歐美 FPS已經係家用機遊戲主流,而當中 Ubisoft同 EA都算最照顧日本市場,尤其 Ubi每年都會揀個假期搞免費同樂日,喜歡歐美遊戲嘅朋友都唔會錯過。
UBIDAY 2015地點位於秋葉原電器街,相比其實唔係喺東京開嘅東京遊戲展,真係就腳到喊。成個展分兩層,地庫排隊試玩區似一般 game show,但重點係地面大堂,好似開緊歐洲嘉年華咁,成個氣氛好 free,大批 fans同 cosplayer唔使講(相比 ACGHK踢班 cosplayer上 3樓自閉,玩家可在 UBIDAY場內免費自由行動同影相,仲有專用 locker更衣室任用,差別太大!), stage上有製作人講座、比賽,可以排隊紀念品,又有小食車賣 UBI遊戲特製食品,竟然仲有 100 yen假紋身玩,仲要免費入場,行過都忍唔住入去𥄫𥄫。

地庫有個打機室 《 Tom Clancy's The Division》遍地開鎗

睇完地面嘉年華,一齊到 BF1開始參加試玩會,頭炮一定係玩亞洲區首次公開試玩的《 The Division》,我刊仲咁啱見到監製 Julian Gerighty( Massive製作室),原來佢 97年前係半個香港人,點可能唔吹幾句!
末世、戰亂,呢堆被美劇拍得老掉牙嘅題材,融入 Ubisoft最新大作《 Tom Clancy's The Division》變成 MMORPG+FPS遊戲後,卻又另有一番新鮮感。呢個無政府狀態未來紐約城係使用 open world地圖,主角所屬的應變部隊 Division以單兵小團隊形式,目標一致、分頭出動,恢復社會秩序、解開世紀病毒之謎,重過新生活。 open world地圖近年非常流行,任務任你揀,監製 Julian Gerighty仲話:「如果你好鍾意做獨行俠,你係可以一個人打到尾,完全唔跟人組隊。」當下唔少開放世界遊戲都被人圍插冇目標、冇劇情, Julian話佢隻作品絕對唔會:「唔會,故事都幾完整,有分支揀,唔計搵道具個類 side story任務,打 40小時左右就爆機。」咁會唔會又係啲唔湯唔水 open ending,要買 DLC先解到謎?「當然會有 DLC,但絕對唔使擔心,唔買下載資料都睇到真 ending。」另一好消息係,其中文版已開始翻譯劇本,可以落足眼力睇結局。




遊戲中係會無縫接入戰鬥,冇撈碟時間,仲會直接撞見其他玩家,埋身就開火,好鬼激。





監製在訪問時反問我覺唔覺隻遊戲有少少 lag、動作唔順暢,原來個 setting未 fine tune好,強烈要求我哋再試一次,果然 frame數調節過、即時靚晒。


監製 Julian Gerighty原來係個瑞典人,英文勁到曾經在 20年前來香港國際學校教書,係咁問記者香港變成點。我順勢就叫佢一定要來香港搞試玩,睇睇香港變成點。 亞洲區首試  3vs3vs3 Dark zone九人亂鬥


2013年 E3正式公布以來,一直得條播片,繼年初在德國 Gamescon發出新一輪資料,終首次在亞洲區展出,人龍打晒蛇餅,要等 2個鐘先試玩到一場 9人 PvP(長約 20分鐘)。

記者正式試玩完,覺得你首先要忘記佢係一隻 FPS,而係一隻拎槍射人的 FPS介面 RPG,武器威力、各種能力平衡度都唔太真實,唔會再有 sniper一槍爆頭殺人嘅情況,好多時要埋身射幾槍先殺得死人,不過記者幾喜歡佢嘅人物係冇兵種、職業分別,可以自由升任何技能、使用任何武器,打造 1個真正「人人唔同」的遊戲分身,加埋打寶、儲道具等中毒度極高元素,成個 feel我會話係寫實版《 Dxxxxx》。(唔敢開名)
記者當日玩 3vs3vs3三勢力 PvP Dark zone地圖,一個冇咁多規則、劇情,玩家自由組隊爭資源嘅 PvP戰場,你甚至可以臨場反面搶晒所有戰利品,唔會影響正傳劇情,你要先鬥快搶資源,再送到場中間等直升機,成功運走先算嬴一 round,成個打法都幾新鮮,最少我呢個 FPS弱者都頂到一陣,值得我花時間練, Julian話佢成日同做 Dark Zone版圖嘅 Red Storm團隊對打,因為「作客」所以成日輸……佢都要練習下!(預定 2016年 3月發售)

《 Rainbow Six Siege》

呢隻新《 R6》最好玩在於強調「一攻/一守」的戰術、技巧分別,故事模式中多數係要攻入恐怖分子根據地,戰術小隊有各種特色隊員,呢位最叻爆門、個位就拎住個巨盾開路,相對地,某啲支援兵種中兩槍就死,所以一定要明白自己優點/弱點,開戰前就要揀定人物、分工合作,戰術要求高,唔係咁適合同啲亂打亂撞嘅人一齊玩。( 11月 13日發售)







《 For Honor》

呢類武將打兵仔遊戲,看圖作文冇玩過就一定會吹係「鬼佬《無雙》」,實際上試玩後記者覺得完全唔似《無雙》,佢嘅細緻度同地型變化都比《無雙》更豐富,攻城時更講求技巧。而 1 on 1打 duel時,成個操作係同系列完全唔同,可以節上/左/右 3種握刀姿勢間變化,都幾講技巧。(發售日未定)







《 The Crew Wild Run》

玩法係用車隊去追殺敵車,新改良版加強大車轆、高速引擎、越野車身,撞得更甘。( 11月 17日發售)

《 Rssassin's Creed Syndicate》

新一集《刺室信條:梟雄》將故事搬到倫敦,記者喺屋企已經打緊,遊戲我就唔影啦,影對孖生兄妹主角你睇啦!(已推出)

撰文:鍾世傑
攝影:傅新發
Special thanks: Ubisoft HK、 Ubisoft Japan

    tvb4life 發表在 痞客邦 留言(0) 人氣()