《踢踏狗》贏得多個國際獎項,包括相當於 Broadway Tony Award的 Oliver Award,今次首次登陸澳門,帶來與別不同的踢躂舞表演體驗。

大舞台

《踢踏狗》一雙腳踢出火花

Ads by Google

跳舞好講天分,對於天生唔好動嘅人來說,要跟隨拍子擺動身體已經是天大難事,不過有一種舞步,就算幾無節奏感,睇到都會好想跟節奏擺動,就係踢躂舞!集勁舞、戲劇及現場演奏於一體的《踢踏狗》(Tap Dogs),自 1995年首演以來,一直巡迴世界各地演出,今次去到澳門威尼斯人劇場,繼續以熱情注入強大力量,將呢種舞步傳承落去!

無對白 靠摩打腳講故事

《踢踏狗》由澳洲編舞家 Dein Perry構思,將踢躂舞加入其他舞蹈、雜技以及戲劇元素等等, 1995年首演,曾於六大洲演出,有超過 1,200萬觀眾入場欣賞過,最威水係 2000年悉尼奧運會開幕禮率領一千名演員大跳踢躂舞,場面震撼。
六位主角係鋼鐵工人,因為踢躂舞而結緣,各有不同性格,舞步及跳舞風格都充滿個人色彩,但一齊跳嘅時候默契十足,引人入勝。全個舞台就係靠呢六位演員,無華麗歌衫,無演奏樂隊,佢哋著住裝上鋼片嘅皮鞋,靠嘅係用腳跳出來嘅聲音,行一步路都係一句對白,就連舞台上嘅裝置都要自己落手落腳調校,當成故事嘅一部分,既可以增加團員對舞台嘅歸屬感,演起來更加有默契。




六位成員來自不同國家, Chris Erk(左三)係老大哥,單獨演出機會特別多。


故事背景係喺工廠地盤,工廠內的每樣物件,都可以成為舞蹈嘅一部分,如鋼鐵支架、金屬地板等等,當然要加少少機關啦。


六個大男孩喺舞台上跳來跳去,驟眼睇以為佢哋亂跳,其實每一步都計好晒,舞台設計、音響和燈光效果,全部完美配合。

喺台上表演嘅成員有六位,佢哋各有所長,令表演內容更豐富。《踢踏狗》雖然巡迴演出已經二十年,不過唔同分隊演出,有唔同元素,好似今次呢一團就會加入新道具好似籃球、手提燈等,當然唔少得最經典嘅玩水、玩火花及倒吊倒立跳踢躂舞一幕!《踢踏狗》賣點係 80分鐘不停跳,最大挑戰是體力,一開場就跳到尾,無得休息,所以平時要跑步及做 gym鍛鍊身體,小心保護雙腳,絕對唔可以受傷!
今次領隊到澳門嘅首席舞者 Chris Erk, 15歲已經加入《踢踏狗》團隊,有 18年經驗,團員都對佢有讚無彈。睇佢哋演出,幾分鐘已經流晒大汗, Chris不諱言體力係最大嘅敵人,好多人跳到 40歲左右已經係極限。「十多年前我加入《踢踏狗》時,資訊未像現在般發達,我聽師兄們說有個騷很棒,叫我一定要去看,看完之後就迷上了。我希望我們的演出可以像前輩們的一樣,能夠感染觀眾,帶來感動,將踢躂舞傳承下去。」不論文化背景,薪火相傳都是重要的課題。




演員喺台上演出嘅同時,亦要幫手轉換場景及安裝機關。


無音樂背景都可以跳舞,靠嘅就係兩位女鼓手在台上輔助的節拍。


每次演出前,台前幕後都會彩排一次,檢查舞台布置的安全,所有細節都一絲不苟。


《踢踏狗》來自澳洲,演員嘅鞋都配合時代用上澳洲工人靴,於鞋底裝上鋼片,不過兩三個星期就要換一對。

撰文:關錦雯
攝影、攝錄:梁炳權

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()