劉亞仁今年演出兩套電影,票房大賣躍升一線,回歸電視界演出《六龍飛天》,人氣繼續旺盛,入伍前最後一擊梗係搏到盡。

電視精

次世代一哥 劉亞仁古裝劇賀台慶

Ads by Google

最近大台嘅台慶劇有啲口碑,話晒係年度重頭劇,即使靠外援都要做得好好睇睇!韓國方面一樣有台慶劇睇, SBS電視台廿五周年台慶五十集長劇大製作,係由劉亞仁主演嘅《六龍飛天》。開播第一集已經高開 12.3%,比早前大熱嘅《龍八夷》首播成績更加好,男主角劉亞仁愈做愈紅,仲跑贏金秀賢及周元,成為新一代師奶殺手!

鐵血君主愛上民女

以歷史人物做主角嘅韓劇,一年總有幾套。之前有車勝元嘅《華政》,口碑同收視都唔錯,今次《六龍飛天》一樣係講朝鮮皇帝。《六龍飛天》以朝鮮建國初期為背景,男主角劉亞仁飾演朝鮮王朝第一任國王——「鐵血君主」李芳遠,六龍係指以佢為首嘅六位對初期朝鮮建國有貢獻嘅大人物。先講少少歷史背景,李芳遠本來並唔係咁有霸氣,身為高麗諸侯嘅第五個仔,甚至無繼承家業嘅壓力。後來遇上啟蒙導師鄭道傳,漸漸激發起慾望及野心,最後成為朝鮮太宗。齋講如何建國嘅歷史未免太悶,當然唔少得感情線,女主角係申世京飾演嘅民女,自細勇敢堅強,絕對唔容許欺凌弱小,正義感滿瀉。善良窮家女遇上皇室貴族,自然互相吸引走埋一齊,不過正室又點會罷休,當然唔少得爾虞我詐嘅後宮橋段。其實韓國歷史唔似中國咁複雜,來來去去都係嗰幾個歷史偉人,李芳遠喺好多電視劇都出現過,不過起用劉亞仁呢個廿幾歲嘅演員去演繹,主要講年輕時代就比較少見,而且劇中加入故事性情節,唔似一般史劇咁沉悶。結果首播高開 12.3%,播到第八集都仲維持到雙位數,不過五十集長劇係持久戰,後勁先係最重要!




劉亞仁一早已經宣布拍完《六龍飛天》之後,會喺下年入伍,而家儲定人氣,期望當完兵退伍可以維持得到。


第二男主角卞耀漢,是首次喺免費電視台拍劇,飾演鄭道傳嘅護衞,同劉亞仁展開一段熱血友誼。


拍古裝劇必須有動作場面,拍攝之前用咗一個月時間練武,希望拍出嚟更加逼真緊張。 入伍前最後一擊

《六龍飛天》備受注目,最大原因係男主角劉亞仁,呢兩年人氣急升,最近有調查公開名單,新一代韓劇男演員邊個會跑出,十年內主導電視劇界,劉亞仁打低金秀賢、周元、李鍾碩等勁敵,成為冠軍!事實上劉亞仁有別於其他小生,上年嘅《密會》同金喜愛搞不倫戀、今年嘅《燥底師兄生擒富二代》做敗家仔,到今次《六龍飛天》,幾部作品中展現完全唔同嘅演技,早被認定為最具實力嘅年輕男星,雖然下年就要入伍,不過好多業內人士都睇好佢,當兵唔會影響未來發展。女主角申世京同劉亞仁係第二次合作,之前佢哋喺《時尚王》合作,收視一般,之後申世京嘅幾套劇,收視插水,被封為「收視毒藥」,不過經過《六龍飛天》,應該可以除去惡名喇!




童星出身嘅申世京,同劉亞仁甚有默契,劉亞仁仲爆料話佢喺片場食烤肉先有力做戲,唔似其他女演員扮細食 keep fit。


男女主角通常都係由寃家開始,今次劉亞仁同申世京都唔例外,而家劇情先講緊少年時代,仲有排玩曖昧。


飾演鄭道傳嘅金明民係韓國名演員,已經有十年無拍電視劇,今次出山,吸引眾多師奶劇迷關注。

撰文:關錦雯

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()