梁振英 WTF( welcome to facebook)一週,幾乎日日都要貼自己調理農務相,就算齊昕當眾連摑阿媽兩巴後, 689照樣有心情分享種米心得。

眾人諸事

689 fb調理農務  like數砌低曾俊華

Ads by Google

梁振英千方百計要成立創科局,但自己卻喺創新科技上大落後,到上週日先開始用 facebook,賬戶起初仲時有時冇,又一度唔俾網民留言,同時唔俾人見自己有咩朋友。

究竟 689個 fb呢週表現點?佢默默耕耘下,截至本週日為止已出咗二十五個 post,即平均每日出多過三個,真係勤力過返工,但內容大部分都同調理農務有關,由種花種米種瓜到種果,甚至連養蜂採蜜都有,中間只夾雜幾單公務活動相,似乎 689上 fb係為私多過為公,連家人出事都照晒自己嘅閒情逸致!
雖然 689喺現實世界極不受歡迎,但貼農務相就可呃 like,幾張蓮花相一星期間就獲得九百多個讚好,另外種葡萄、水蜜桃、小蜜瓜等嘅讚好數字動輒都過五百以上,佢趁萬聖節前夕貼自己去海洋公園哈囉喂嘅探班相,讚好數更直逼千個大關。
其實,梁班子中有玩 fb嘅又豈止 689一人,司局長中最少就仲有財爺曾俊華、教育局局長吳克儉同發展局局長陳茂波,但一度被視為下屆特首「黑馬」嘅曾俊華,近期 fb成績就不敵 689,對上一個逾千讚好發帖已經係上月初喺秘魯同美國聯儲局主席耶倫見面。如果 fb算係某種民望反映, 689呢鋪終可為扳回一城而沾沾自喜吧!




689分享自己去海洋公園哈囉喂嘅探班相,兩日間 like數直逼一千大關,反而曾俊華分享自己出席香港高爾夫球公開賽,經過一週 like數連二百都唔夠。


馮敬恩肯肯定冇錄音?


馮敬恩當日參加會議時著的恤衫,胸口位置清楚可見冇袋,似乎可以排除佢偷錄音嘅嫌疑。(莫智謙攝)

商台上週獨家公開兩段港大校委會會議錄音,主席梁智鴻上週五就喺未經校委會討論下,「自把自為」向法庭申請禁制令,被狠批嚴重損害新聞自由!由於港大校委會據知沒為會議錄音,故外界推測係有人私藏錄音工具參加會議。私家偵探張大偉聽過錄音後,亦認為可能性好大,「段錄音中啲『沙沙聲』,係部機放衫袋時因為郁動造成嘅衣服磨擦聲」,他又估計用錄音筆機會較大,「我哋做呢行一聽就聽得出,錄音筆細唔易被發現,而且音質效果好,但就會較易錄埋呢啲衣服磨擦聲。」
佢話錄音者應該係將支筆放喺胸口向外衫袋位,「如果放其他衣袋,會錄到更多磨擦聲,胸口位效果先咁清晰。」究竟「深喉」是誰至今仍係個謎,但翻查當天會議前後相片,港大學生會會長馮敬恩當時身穿嘅藍色長袖恤衫就冇任何衫袋,似乎可排除他是偷錄疑犯吧!其實當日並非所有與會者都知悉有沒收手機安排,有人卻可以早着先機帶錄音工具出席,足見係有備而來。

《文匯報》贈閱版
去年已通街派

盛傳會接任港大校委會主席嘅李國章,早前自爆自己唔睇《文匯報》同《大公報》,即時換來《文匯報》嚴辭回應,呼籲佢先訂閱該報一年,甚至提出可免費贈閱一年,以便增進佢對《文匯報》嘅客觀了解。
究竟免費睇《文匯報》係咪就能加深對該報了解,以至培養出閱讀該報嘅習慣?翻查報導,其實《文匯報》早喺去年 8月開始,已推出咗贈閱版,喺港九新界多處免費派發,當時《文匯報》就明言,此舉係要擴大影響力,但客觀效果係點,睇吓李國章嘅評價,大家都知道答案啦!
話分兩頭,《文匯報》又唔係冇影響力嘅,最少該報帶頭將陳文敏獲推薦副校嘅消息外洩,更有多篇針對性嘅攻擊文章,成為現時港大風波同洩密事件嘅始作俑者,至於《文匯報》有冇正式接觸李國章安排贈閱,該報至截稿前都未有回覆。




《文匯報》去年八月起已經推出贈閱版通街派,但李國章似乎一樣唔睇,該報現時主動提出可贈閱一年,恐怕作用有限。


黃洋達老婆瞞夫用交友 app

智能電話普及,今時今日要「交友」真係易過借火。有寂寞嘅男讀者就報料,話星期日孤家寡人,諗住喺外國盛行嘅 dating app「 Tinder」度識吓新朋友,點知個 app幫佢篩選嘅一堆女性用戶當中,赫然見到有熱血公民創辦人黃洋達嘅老婆陳秀慧,陳嘅賬戶喺星期六仲係 active,唔通呢位政壇人妻仍有「交友」需要?
黃洋達就話自己未聽過呢個 app,平時亦都冇 check老婆電話,唔知老婆有冇用 app「交友」。平時相當熱血勇武嘅黃洋達,今次只係用平淡冷靜嘅語氣回應︰「係呀?咁我表示震驚囉。我一陣質問吓佢先。」呢個 app嘅登入方法,包括透過 facebook賬戶登入,系統會自動分析用戶嘅共同喜好、地理位置等,再篩選合適對象,只要互相 like大家,就會變成「 match」,然後就可以互聊,唔知 37歲嘅秀慧 BB在剛過去的「萬聖週末」有冇收穫,又會同網友傾啲咩呢?




政壇人妻陳秀慧疑瞞住黃洋達用「 Tinder」,更公開自己 37歲芳齡,似乎對「交友」自信十足。


陳秀慧公開的照片中,包括她小鳥依人依偎着黃洋達嘅合照。

撰文:巫不言
mailto:news@nextmedia.com

文章標籤

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()