為了是次展覽, Mandy花了千幾蚊,向文具鋪老闆購入絕版 Yes Card機一部。「娛記正傳」由即日起至十一月八日,在太子道西 204號二樓舉行。

坦白講

青春如紙媒 黃燕玲

Ads by Google

黃燕玲( Mandy),小時愛追星。九三年中五畢業,加入《 Yes》雜誌,由扭 Yes Card變成影 Yes Card。其後曾在《金電視》、《忽然 1周》、《頭條日報》等刊物任職娛樂攝記。○八年轉行揸的士,現時是私人司機。近日為了「娛記正傳」圖片展翻箱倒篋,挖出幾千張陳年明星相,青春記憶返晒嚟。




吻下來,豁出去。當年 Mandy曾拍下電光火石的一剎,可惜菲林和硬照都失落在信和了。《蘋果日報》圖片

首先我要多謝信和。信和唔單只令我賺到錢,更重要是它將硬照發揚光大。相要曬出嚟,先保留到嗰一刻。如果冇信和,我啲相只登喺雜誌,都未必會剪存。睇番當時啲衣著、甫士,真係好頂癮!影像拿在手才有真實感,喺電腦睇始終差啲。
那個年代,每日都有 MV、電影探班,下晝三點影完、交菲林,就去飲茶吹水。到六、七點已經曬好,賣遍信和,唔會慢過依家啲即時新聞好多。專影靚嘢的大佬每筒菲林可以賣到四百蚊,影相影到買車、買樓、搞移民的,大有人在。我影幾筒有幾嚿,就好開心了。每月計落都執到兩萬幾。
經典太多,散失的亦多。經典之一,係古天樂被慾海肥花強吻。九四年佢仲係白面書生,呢張相當時喺信和竟然都有人搵。頂,要嚟做乜呀?但而家搵得番就發達囉。我最好賣的一幅相,應該是黎明《阿 Sir早晨》的劇照。有一幕講他打棒球,揮棒後伸脷。我曬了 5R,搵佢簽名,但佢話:「我覺得唔可以出街。」然後沒收!呢幅相當時最少賣咗幾百張,而家想搵番都難。明星相好似薯片咁即食,再好賣的,一星期後已被掃埋一邊,好多菲林就此丟失。

到二千年,已經冇人再買明星相。一來互聯網盛行,二來有叫座力的香港明星愈來愈少。港星唔掂,搞到我自己都覺得唔掂。○四年,我轉職《忽周》做狗仔隊,以另一種形式繼續追星。狗仔有狗仔的經典,○七年,我在《頭條》,某次在夜場門口乾等,到深夜都冇料到。見到顏福偉出來,上了的士。娛記的觸覺話我知,單人匹馬坐前座,一定有古怪,咪開車吊住佢。的士行咗十幾個車位,忽然急停。我撲上車頭,鏡頭貼住玻璃,影到幾多得幾多。事後先知有勁嘢。顏福偉隻手擒住司機個褲襠,對鏡頭扮咗幾個鬼臉。仲唔係風化案?但編輯話:「佢有錢,可能告到我哋甩褲喎。」結果成輯相冇出街。
事隔一個月,顏福偉被的士司機指控非禮。《星島》搵番啲連環圖出嚟,話係獨家猛料。唓,其實又咪係倉底貨。做得咁辛苦都唔知為乜,不如轉行。反正做狗仔時都試過扮的士司機。某日竟然載到樂基兒。以前日等夜等都等唔到,如今自投羅網,仲俾咗幾蚊貼士。
而家人人都係記者。有次我喺置地見到個細路,眼大大好熟口面,轉個頭就見到許晉亨。唔係唔影嘛?我 send條片俾《蘋果》,爆相爆片仲有一千蚊。無可否認,呢啲料睇片係好過睇相。有啲事實不能改變,無論點樣美化,紙媒始終會沒落,但回憶要好好 keep住。

撰文:蔡慧敏
攝影:葉漢華
攝錄:關永浩
mailto:news@nextmedia.com

文章標籤

tvb4life 發表在 痞客邦 留言(0) 人氣()